EPH LO50.SFM 28/10/2003 L. L. M. LOZI ST1 MONGU ZAMBIA

BAEFESE

LIÑOLO LA PAULUSI KWA

BAEFESE

Litumeliso

1

1 Ki na Paulisi, muapositola wa Jesu Kreste ka tato ya Mulimu. Ni ñolela mina balumeli ba ba pila mwa Efese, ba ba sepahala mwa bupilo bwa bona ku Jesu Kreste.

2 Mulimu Ndat'a luna, ni Mulena Jesu Kreste, ba mi fe sishemo ni Kozo.

Limbuyoti ze lu fiwa ki Mulimu ka Kreste

3 Ku lumbwe Mulimu, Ndat'ahe Mulen'a luna Jesu Kreste! Mwa kopano ye lu na ni yona ka Kreste, Mulimu u lu tohonolofalize ka ku lu fa limpo kaufela za moya mwa lihalimu. 4 Kakuli lifasi li si ka eziwa kale, Mulimu n'a s'a iketezi luna kuli lu be ba hae ka Kreste, ni kuli lu be ba ba kenile, ba ba si na mulatu, fapil'a hae. Kabakala lilato la hae. 5 Mulimu n'a lelile kale ku lu kutiseza ku yena, sina bana ba hae, ka Jesu Kreste. U ezize cwalo kakuli ki mw'a n'a latela. 6 A lu lumbeke Mulimu kabakala sishemo sa hae se si komokisa, s'a lu file ka Mwan'a hae ya latwa.

7 Kakuli ka lifu la Kreste lu lukuluzwi, mi libi za luna li swalezwi. Mulimu u lu bonisize cwalo butuna bwa sishemo sa hae,

8 s'a lu file ka buñata bo butuna! Ka butali ni kutwisiso ya hae, 9 Mulimu u ezize s'a n'a lelile, mi u lu zibisize mulelo wa hae, o n'o patilwe ni w'a n'a itatezi kale ku u peta ka Kreste. 10 Mulelo wo, w'a ta peta Mulimu ka nako ye lukela, ki wa ku ikubukanyeza linto kamukana ze mwa lihalimu ni ze mwa lifasi ni ku li beya mwa maata a muzamaisi a li muñwi, yena Kreste.

11 Linto kamukana li ezwa ka mulelo ni ka tato ya Mulimu. Mi Mulimu u lu ketile, luna Majuda, kuli lu be ba hae ka ku kopana ni Kreste, kakuli ki mulelo ni muhupulo wa hae o n'o li teñi i sa li kwa makalelo. 12 Luna, ba pili ku sepa Kreste, lu lumbe kanya ya Mulimu!

13 Ni mina cwalo. Ha mu utwile litaba za niti, ili zona Litaba ze Nde za Mulimu, mu lumezi ku Kreste, mi Mulimu u mi beyile liswayo ka ku mi fa Moya o Kenile w'a n'a sepisize. 14 Moya o Kenile ki sisupo sa kuli lu ta amuhela seo Mulimu a si sepisize be i li ba hae, mi u tiisa niti kuli Mulimu u ta ba fa tukuluho ye tezi. Lu lumbeke kanya ya hae!

 

Tapelo ya Paulusi

15 Ka libaka le, ki kale ni sa li ni utwela tumelo ya mina ku Mulena Jesu ni lilato la mina kwa batu ba Mulimu kaufela, 16 ku zwa foo, ha ni tuheli ku itumela ku Mulimu kabakala mina. Na mi hupula mwa litapelo za ka, 17 Ni kupa Mulimu wa Mulen'a luna Jesu Kreste, yena Ndate ya tezi kanya, ku mi fa Moya o' ka mi talifisa ni ku mi supeza Mulimu kuli mu mu zibe. 18 Ni kupa kuli mihupulo ya mina i kwaluluhe, kuli mu kone ku utwisisa sepo ye mu bizelizwe ni butuna bwa matohonolo ao Mulimu u a bulukezi bao i li ba hae. 19 Ni kupa kuli mu utwisise ni kuli maata a hae ki a matuna cwañi a' sebeza ku luna ba ba lumela. Ona Maata ao kasibili a sebeza ku luna ki a komokisa luli. 20 A bonisizwe ki Mulimu, muta a zusa Kreste kwa bafu, mi a mu inisa ku la bulyo la hae mwa mabala a kwa lihalimu.

21 Ko, Kreste u busa fahalimw'a babusi, milonga, maata, malena ni mabizo kamukana a ka bizwa ka ona, isi mwa lifasi le feela, kono ni ku le li sa taha. 22 Mulimu u beyile linto kaufela kwatas'a mahutu a Kreste, mi hape u mu file kuli fahalimw'a linto kamukana i be yena toho ya Keleke,

 23 Keleke ki mubili wa Kreste, ku talelela kwa hae, yena ya tezi mwa linto kaufela kai ni kai.

2

 

Mutu u piliswa ka Sishemo

1 Pili ne mu shwile kwa neku la moya kabakala milatu ni libi za mina.

2 Ka yona nako yani, ne mu latelela mikwa ye maswe ya lifasi. Ne mu lumelelana ni mubusi wa mioya ye maata ye mwa mbyumbyulu, ili ona moya o' zamaisa ka nako ye batu ba ba hanyeza Mulimu. 3 Hande nde, kaufel'a luna ne lu swana sina bona, mi ne lu zamaiswa ki litakazo za luna, lu nze lu eza ze ne lakazwa ki mibili ni minahano ya luna. Sina mañi ni mañi, ni luna ne lu lukela ku halifelwa ki Mulimu.

4 Kono kabakala butuna bwa sishemo ni lilato la hae ku luna, 5 U lu pulusize ka Kreste niha ne lu shwile ka ku sa utwa kwa luna. Ki ka sishemo sa Mulimu ha mu pulusizwe 6 Mwa kopano ye lu na ni yona ni Jesu Kreste, Mulimu u lu zusize ni yena kuli lu buse hamoho mwa libaka ze kwahalimu. 7 U ezize cwalo ku bonisa kamita, mwa linako ze taha, butuna bwa sishemo sa hae, sishemo se si bonahala mwa lilato l'a lu latile ka lona ka Jesu Kreste. 8 Kakuli ki ka sishemo sa Mulimu, ha mu pilisizwe ka tumelo. Ku piliswa ko, ha ku zwi ku mina. Ki mpo ya Mulimu. 9 Ha siyo se mu ka ikuhumusa ka sona, kakuli ha ku zwi fa ku ikataza kwa mina. 10 Mulimu ki yena ya lu bupile. Mwa kopano ye lu na ni yona ni Jesu Kreste, u lu bupezi bupilo bo bu tezi misebezi ye minde, ili misebezi y'a lu lukiselize yona kale kuli lu i eze.

 

Buñwi ka Jesu Kreste

11 Mina Balicaba, ki niti mu bizwa “ba ba si ka ya kwa mupato” ki Majuda, kanti bona Majuda ba ipiza “ba mupato” ka ku ya ka sisupo se ba ikeza fa mibili ya bona. Mu n'o hupula mo ne mu inezi pili, mina balicaba ka sipepo. 12 Ka nako yani ne mu li kwahule ni Kreste. Ne mu li bazwahule, mi ne mu siyo mwa mutapi wa batu ba ba ketilwe ki Mulimu. Ne mu si na kabelo mwa bulikani bo bu simuluhile fa lisepiso za Mulimu kwa batu ba hae. Ne mu pila mwa lifasi mo, mu si na sepo, mane mu si na Mulimu. 13 Kono cwale, ka kopano ye mu na ni yona ni Jesu Kreste, mina ba ba ne ba li kwahule, mu sutelelizwe fakaufi ka lifu la Kreste. 14 Kakuli ki yena Kreste kasibili ya lu tiselize kozo, ka ku kopanya Majuda ni Balicaba ku ba eza sicaba si li siñwi. Ka ku fa mubili wa hae, u tubile limota le li ne li ba kauhanya ni ku ba toyanisa. 15 U felisa Mulao wa sijuda hamoho ni litaelo ni likapelezo za ona, i li ku ikezeza fa mishobo yeo ye mibeli, sicaba si li siñwi, se sinca, a nz'a bupa kozo.

16 Ka lifu la hae, fa sifapahano, Kreste u felisize sitoyo. Ka sifapahano, u kopanyize mishobo ye mibeli ku i eza mushobo u li muñwi feela, mi u i kutiselize ku Mulimu.

17 Cwalo, Kreste u ti l'o luta Litaba ze Nde za kozo kwa batu kaufela, ku mina Balicaba ba ba ne ba li kwahule ni Mulimu, ni kwa Majuda cwalo ba ba ne ba li fakaufi ni yena.

18 Ki ka yena Kreste kuli kaufel'a luna, Majuda ni Balicaba, lu kona ku sutelela ku Mulimu ka Moya u li muñwi.

19 Hakulicwalo, mina Balicaba ha mu sa li bazwahule, ba ba zwa ku sili. Mu ba munzi u li muñwi ni batu ba Mulimu. Mu ba lusika lwa Mulimu. 20 Ni mina cwalo mu yahilwe fa mutomo o tomilwe ki baapositola ni bapolofita, mi licwe la mwa lilulu ki yena Jesu Kreste kasibili. 21 Ki yena ya sweli muyaho kaufela, mi ya u fa maata a ku hula, kuli u be Tempele ye kenile ya Mulena. 22 Ka ku kopana ni yena, ni mina cwalo mu yahelelwa hamoho ni ba bañwi ku eza ndu mw'a ka pila Mulimu ka Moya wa hae.

3

 

Musebezi wa Paulusi wa ku tusa Balicaba

1 Ka lona libaka le, na Paulusi, ya tamilwe kabakala Jesu Kreste ku tusa mina Balicaba, ni lapela Mulimu. 2 Kaniti mu se mu utwile kuli, ka sishemo sa hae, Mulimu u ni file musebezi o ni swanezi ku mi tusa ka ona. 3 Mulimu u ni sinulezi kunutu ya mulelo wa hae. Ni se ni ñozi hanyinyani ka yona taba ye. 4 Haiba mu ka bala se ni ñozi, mu ka utwisisa zibo ye ni na ni yona bakeñisa kunutu ya Kreste.

5 Ka linako ze felile, batu ne ba si ka zibiswa kunutu yeo, kono Mulimu u i bonahalize cwale, ka Moya wa hae, kwa baapositola ni bapolofita ba hae ba ba kenile. 6 Kunutu yeo ki ye. Ka tuso ya. Litaba ze Nde, Balicaba ba kopana ni Majuda mwa ku tohonolofazwa ki Mulimu. Ki lilama za mubili u li muñwi, mi ba ikabela sepiso ye ezizwe ki Mulimu ka Jesu Kreste.

7 Ni ezizwe sikombwa sa Evangeli ka mpo ya sishemo sa Mulimu, ili mpo y'a ni file ka maata a hae. 8 Ni yo munyinyani kwa batu ba Mulimu kaufela. Kono nihakulicwalo, Mulimu u ni file litohonolo la ku iseza Balicaba Litaba ze Nde za Kreste, ili bufumu bo bu sa konwi ku taluswa. 9 Hape u ni file ku bonisa batu kaufela mo kunutu yeo ya Mulimu i ta ezahalela. Mulimu, ya li mubupi wa linto kamukana, u patile kunutu yeo ka linako ze felile kaufela. 10 U ezize cwalo kuli ka yona nako ye, ka Keleke, babusi ni mibuso ye kwa lihalimu ba kone ku ziba butali bwa Mulimu ka mikwa kamukana ye bu bonahala ka yona. 11 Mulimu u ezize cwalo kabakala mulelo wa hae wa kamita, o lu boni niti ya ona ka Jesu Kreste Mulen'a luna. 12 Ka kopano ye lu na ni yona ni yena, ni ka ku lumela ku yena, lu lumelelwa ku itahisa fapil'a Mulimu ka sepo ye tezi. 13 Hakulicwalo, ni mi kupa kuli mu si ke mwa zwafa kakuli ni nyandela mina. Manyando a ka a mi tahiseza bunde.

 

Lilato la Kreste

14 Ka lona libaka le, ni kubama fapil'a Ndate. 15 Masika kaufela a kwa lihalimu ni fafasi a fumana ku yena libizo la niti. 16 Ni kupa kuli Mulimu, ka Moya wa hae, a mi fe maata a' zwa kwa bufumu bwa kanya ya hae, kuli mu tiye mwa lipilu za mina. 17 Ni kupa kuli Kreste a ine ku mina ka tumelo, ni kuli mu hule, ni ku tiye, mwa lilato. 18 Ni kupa kuli mina, hamohocwalo, ni balumeli kaufela, mu kone ku utwisisa bupala ni butuna, butelele ni butungi bwa lilato la Kreste. 19 Ee, mu zibe lilato la hae, nihaike ha li konwi ku zibelelwa, kuli mu kone ku tala, i li ku talelela ko ku kondile ka za Mulimu.

20 Ka maata a hae a' sebeza ku luna, wa kona ku eza ze ñata, ze tuna, ze lu si ka kupa, nihaili ku li hupula. 21 Balumeli ba ise kanya ku Mulimu ka ku kopana hamoho ni Jesu Kreste ka linako kamukana, kuya kuile! Amen.

4

 

Buñwi bwa mubili

1 Na mi kupa cwale na ya li mwa tolongo kabakala ku sebeleza Mulena. Mu pile bupilo bo bu swanela seo Mulimu n'a si bata ku mina, muta a mi biza. 2 Mu ishuwe, mi mu be ni musa ni pilu telele kamita. Mu swalelane ka lilato.

3 Mu eze mo mu konela kaufela ku buluka buñwi bo bu fiwa ki Moya, ka kozo ye mi kopanyize hamoho. 4 Ku na ni mubili u li muñwi, ni Moya u li muñwi feela, sina ha ku na ni sepo i liñwi feela ye mu bizelizwe ki Mulimu. 5 Ku na ni Mulena a li muñwi, ni tumelo i liñwi ni kolobezo i liñwi feela. 6 Ku na ni Mulimu a li muñwi feela, ili Ndat'a batu kaufela, ya ba busa kamukana, ya sebeza ku bona kaufela, mi ya ina ku bona kamukana.

7 Yo muñwi ni yo muñwi wa luna u filwe mpo ka ku likanya ni s'a mu file Kreste. 8 Sina mo ku ñolezwi, kuli:

“H'a ile kwahalimu,

u ile ni ba ba ñata ba ba ne ba hapilwe,

mi u file batu limpo.”

9 Cwale, taluso ya kuli “u ile kwa lihalimu” ki ifi? Kikuli pili u shetumukezi mwa lifasi. 10 Ya shetumukile, yo, i sa li yena ya ile kwa lihalumu, kuli a be teñi kai ni kai mwa libaka kamukana. 11 Ki yena ya “file batu limpo”. A keta ba bañwi ku ba baapositola, ba bañwi ku ba bapolofita, ba bañwi ku ba babuleli, ba bañwi ku ba baluti ba linzwi ni bakutazi cwalo. 12 Musebezi wa bona i ne li ku luta batu ba Mulimu kaufela musebezi wa bulumeli, wa ku yaha mubili wa Kreste. 13 Kamukwaocwalo, luna kaufela kwa mafelelezo, lu ta ba nto i liñwi ka tumelo ya luna ni ka ku ziba Mwan'a Mulimu. Lu ta ba batu ba ba lukile kwa maneku kaufela, ba ba likana ni Kreste. 14 Ha lu sa na ku ba banana ba ba ngiwa ki mandinda, mi ba ba fefulwa ki moya o fulana wa lituto za bapumi, ba ba kenya ba bañwi mwa lifoso ka makilikicani a ba eza. 15 Batili! Mane, ka ku latelela niti feela, lu nze lu zamaiswa ki moya wa lilato, lu swanezi ku hula mwa linto kamukana, ni ku fetuha nto i liñwi ni Kreste, yena toho. 16 Ka yena, lilama za mubili ze fapahani za kopana hamoho, mi mubili kaufela u ngungahanywa ki malukululelo a lilama. Cwale, silami ni silama ha si sebeza ka swanelo ni mubili u icaha ili ona, mi wa hula ka lilato.

 

Bupilo bo Bunca ku Kreste

17 Cwale, se ni bulela ni ku si tiisa ka libizo la Mulena ki se. Mu si ke mwa pila hape sina bahedeni ba ba latelela mihupulo ya bona ye si na tuso. 18 Bao, minahano ya bona i li mwa lififi. Ha ba na kabelo mwa bupilo bw'a fana Mulimu, kakuli ha ku na ze ba ziba. Ki mangulunde feela. 19 Ha ba sa na maswabi. Ba ikenyize mwa buhule, mi ba eza likezo ze maswe za mifuta futa ba sa zibi ku iswala.

20 Seo, ha si sona se mu itutile bakeñisa Kreste! 21 Mu utwile za hae, kwa utwahala, mi ha mu li balateleli ba hae, mu lutilwe niti ye li ku Jesu. 22 Cwalehe, mu swanezi ku tuhela mikwa ya mina ya kale, ye ne mu pila ka yona, mikwa ye shandauzi butu ka litakazo za bupumi.

23 Lipilu za mina ni minahano ya mina li swanezi ku bupiwa sinca. 24 Mu apale butu bo bunca, bo bu bupiwa ka ku swana ni Mulimu, bo bu iponahaza ka bupilo bo bu lukile, bo bu kenile, bo bu tomilwe fa niti.

 

25 Cwale buhata bu fele! Yo muñwi ni yo muñwi a bulelele wa habo niti, kakuli kaufel'a luna lu lilama za mubili u li muñwi.

26 Haiba mwa halifa, mu tokomele kuli ku halifa kwa mina ku si ke kwa mi isa mwa sibi. Mu si ke mwa tanda lizazi kaufela mu nze mu halifile.

27 Mu si ke mwa fa Satani sibaka. 28 Ya n'a uzwa, a tuhele ku uzwa. A kale ku sebeza, mi a ipumanele ka mukwa o munde se si ka mu pilisa, mane a kone ni ku tusa babotana. 29 Mu si ke mwa itusisa manzwi a maswe ha mu bulela. Mu sebelise feela manzwi a' na ni tuso, a' ka kona ku tusa ba bañwi ku zwelapili mwa tumelo, ili manzwi a' tiisa ze bulelwa ni a' zusa maikuto a mande ku bona ba ba mi teeleza. 30 Mu si ke mwa swabisa Moya o Kenile wa Mulimu, kakuli Moya ki sisupo sa Mulimu se si bonisa kuli mu ba hae, sisupo se si tiisa kuli lizazi la ta, leo Mulimu u ta mi lukulula ka lona. 31 Mu tuhele ze baba kaufela, bunyemi ni ku halifa. Mu ambuke likomano, matapa ni lutimbo lwa mufuta ufi kamba ufi. 32 Mu be ni musa, mu utwelane butuku, mi mu swalelane sina Mulimu ni yena h'a mi swalezi ka Kreste.

 

5

 

Kupila mwa Liseli

1 Cwale, ha mu li bana ba ba latiwa ki Mulimu, mu like ku mu likanyisa. 2 Mu pile mu nze mu zamaiswa ki lilato, sina Kreste ya lu latile, mane a fana bupilo bwa hae kabakala luna, i be mpo ni sitabelo sa muunko o munati se si tabisa Mulimu.

3 Ha mu li balumeli, ha si swanelo mane kuli litaba ze amana ni za buhule, kapa mikwa ye maswe ni litakazo za bufumu, li bulelwe ku mina. 4 Hape, ha ku lukeli kuli mu bulele matapa, lipulelo za bukuba kamba manzwi a' sehisa maswe. Se si lukela ki ku isa litapelo za buitumelo ku Mulimu. 5 Mu zibe hande kuli ha ku na mutu ya lapela Mulimu, i li lihule, wa mikwa ye maswe, kamba ya na ni mango, ya ka fiwa kalulo mwa Mubuso wa Kreste ni wa Mulimu.

6 Mu si ke mwa lumelela mutu ku mi puma ka manzwi a bukuba. Ki kabakala milatu ye cwalo kuli buhali bwa Mulimu bu tuha bu wela ba ba sa mu utwi. 7 Cwale, mu ambuke batu ba ba cwalo. 8 Sapili ne mu li mwa lififi. Kono cwale, kabakala kopano ye mu na ni yona ni Mulimu, mu mwa liseli. Hakulicwalo, mu pile sina batu ba ba mwa liseli. 9 Liseli li tahisa bunde, ni ku luka, ni niti kaufela. 10 Mu like ku batisisa se si tabisa Mulimu. 11 Mu ambuke lika ze si na tuso ze ba eza mwa lififi, kapa mane mu litise mwa liseli. 12 Nihaili ku bulela feela ka lika ze ezwa kwa mukunda kwa swabisa luli. 13 Zeo kaufela, ha li tiswa mwa liseli, li bonahala hande mo li inezi. 14 Lika kaufela ze bonahazwa hande mwa liseli, li fetuha liseli. Ki kabakaleo ha ku izwe:

“Zuha, wena mulobali.

U zuhe kwa bafu,

mi Kreste u ta ku monyehela.”

15 Cwalehe, mu tokomele mo mu pilela. Mu si ke mwa pila sina ba ba sa zibi, kono mu pile sina ba ba butali. 16 Nako ifi ni ifi kaufela mu i sebelise hande, kakuli mazazi a lu pila ku ona a maswe.

17 Fo he, mu si ke mwa swana ni litoto, kono mu like ku fumana s'a bata Mulena kuli mu si eze.

18 Mu si ke mwa kolwa ki bucwala. Bu ta mi sinya. Hakulicwalo mu tale Moya. 19 Mu ambolisane za manzwi a lipina ze mu opelela Mulena mu nze mu mu lumba mwa lipilu za mina.

20 Ka nako kaufela, ni mwa lika kamukana mu itumele ku Mulimu Ndate, ka libizo la Mulen'a luna Jesu Kreste.

 

Liswanelo za basali ni banna

21 Yo muñwi a ipeye kwatas'a yo muñwi, kabakala likute le mu kuteka Kreste ka lona.

22 Basali, mu ipeye kwatas'a banna ba mina, sina mo mu ezeza ku Mulimu.

23 Kakuli munna u na ni maata fahalimw'a musal'a hae, sina Kreste h'a na ni maata fahalimw'a Keleke. Kreste kasibili, ki yena Mupulusi wa Keleke, ili ona mubili wa hae. 24 Cwalehe, basali ba swanezi ku ipeya kwatas'a banna ba bona mwa linto kaufela, sina Keleke ha i ipeya kwatas'a Kreste.

25 Banna, mu late basali ba mina sina Kreste h'a latile Keleke, mane a fana bupilo bwa hae kabakala yona.

26 U ezize cwalo i li ku kenisa Keleke fapil'a Mulimu, h'a s'a i tapisize ka mezi ni ka linzwi la hae. 27 Kakuli n'a bata ku tahisa Keleke fapil'a hae ka bunde bwa yona kaufela, i nze i lukile, i si na mulatu, i si na litiba kapa mañonde, kapa sifi ni sifi se si si ka konda. 28 Kamukwaocwalo, banna ba lukela ku lata basali ba bona, sina mo ba latela mibili ya bona. Munna ya lata musal'a hae, wa itata ili yena. 29 H'a yo ya toile mubili wa hae. Mane bakeñisa ku u toya, wa u uta mi wa u babalela, sina mw'a ezeza Kreste kwa Keleke. 30 Amu hupule hande kuli lu lilama za mubili wa hae. 31 Sina mo ku ñolezwi, kuli: “Kabakaleo, munna u ta siya ndat'ahe ni m'ahe, a pile ni musal'a hae, mi bao ba babeli ba ta ba mubili u li muñwi feela.”

32 Ki kunutu ye tuna ye bonahazwa mwa timana yeo, mi sina na, ni fumana kuli i supa Kreste ni Keleke. 33 Ni mina cwalo ya mi ama! I'a hae sina mw'a itatela, mi musali kaufela u swanezi ku kuteka munn'a hae.

6

 

Liswanelo za bana ni bashemi

1 Bana, ki swanelo ya mina fapil'a Mulena, kuli mu utwe bashemi ba mina, kakuli ki nto ye lukile ku eza cwalo.

2 ”Kuteka ndat'aho ni m'aho’. Wo ki mulao wa pili o' na ni sepiso ye ekelizwe kwateñi. Sepiso yeo i li:

3 ”Kuli u kondelwe ki lika kaufela, mi u pile nako ye telele mwa lifasi.”

4 Ni mina bashemi, mu si ke mwa nyemisa bana ba mina. Kono mu ba hulise ka litaelo ni likelezo za sikreste.

 

Liswanelo za Batanga ni Malena

5 Batanga, mu utwe malen'a mina ka sabo ni ka ku ngangama. Mi mu eze cwalo ka pilu ya mina kaufela, inge mu sebeleza Kreste.

6 Mu si ke mwa eza cwalo feela ku ba tabisa ha ba mi bona, kono mu eze se si latwa ki Mulimu ka lipilu za mina kaufela, sina batanga ba Kreste. 7 Mu ba sebeleze ka tabo, inge mu sebeleza Mulena, isiñi batu feela. 8 Mu hupule kuli Mulena u ta holisa mutu ni mutu ka musebezi o munde w'a ezize, i be mutanga kapa mulukuluhi.

9 Ni mina, malena, mu eze batanga ba mina kamukwaoswana. Mu tuhele ku ba fumbela. Mu hupule kuli mina, ni batanga ba mina cwalo, mu mwatas'a Mulena a li muñwi ya kwa lihalimu, i li ya si na ketululo.

 

Lilwaniso za Mukreste

10 Ka ku feleleza, mu tiyele ku Mulena, ya kona ku mi matafaza ka maata a hae a matuna. 11 Mu swale lilwaniso kaufela z'a mi fa Mulimu, kuli mu kone ku tiya ha mu talimana ni makilikicani a maswe a Satani. 12 Kakuli ndwa ye lu lwana, ha lu i lwani ni batu, kono lu i lwana ni mioya ye maswe ye maata ye mwa mbyumbyulu, ni malena ni mibuso ya sibaka seo sa lifu. 13 Kabakaleo, mu nge lilwaniso kaufela za Mulimu kuli, nako ye maswe ha i ka taha, mu kone ku itwanela ni ku tiya, mane ndwa i be i fele mu si ka shenya.

14 Cwalehe, mu yeme, mu itukise. Niti i be lukanda lo mu itamile ka lona mwa teka. Ku luka i be sona sisilelezo sa fa sifuba.

15 Ciseho mwa ku bulela Litaba ze Nde za kozo i mi tuse sina makatulo kwa mahutu a mina.

16 Ka nako kaufela mu lwale tebe ya mina ili yona tumelo. Ka yona mu ta kona ku taka masho kaufela a' tuka, a' zwa ku ya maswe. 17 Ku piliswa ku be kuwani ya mina, mi linzwi la Mulimu i be yona sabule ye mu ta fiwa ki Moya.

18 Zeo kaufela mu li eze ka tapelo, mu nze mu kupa tuso ku Mulimu. Mu lapele ka linako kaufela, mu nze mu susuezwa ki Moya. Kabakaleo, mu tokomele, mu si ke mwa zwafa. Mu lapelele balumeli kaufela. 19 Ni na cwalo, mu ni lapelele kuli Mulimu a ni fe se ni ka bulela ha ni itukiselize ku eza cwalo, ni kone ku luta kunutu ya Litaba ze Nde ni sa sabi. 20 Kabakala Litaba ze Nde zeo, na, ni ndumeleti, nihaike nako ye ni mwa tolongo. Mu ni lapelele kuli ha ni bulela, ni bulele ka bundume, kakuli ki swanelo ya ka ku eza cwalo.

 

Litumeliso za mafelelezo

21 Tikike, mwanahaboluna ya latwa ni mutanga ya sepahala mwa musebezi wa Mulimu, u ta mi kandekela litaba za ka kaufela, kuli mu zibe mo ni zuhela.

 

22 Ki kabakaleo ha ni mu lumezi ko ku mina, ku t'o mi lekulisa mo lu zuhela kaufel'a luna kwanu, ni ku mi wisa lipilu.

23 Banabahaboluna kamukana ba fiwe kozo, lilato ni tumelo ki Mulimu Ndate ni Mulena Jesu Kreste. 24 Sishemo sa Mulimu si be ni bona kaufela ba ba lata Mulen'a luna Jesu Kreste ka lilato le li si na ku fela.