COL LO52.SFM 29/10/2003 L. L. M. LOZI ST1 MONGU ZAMBIA

BAKOLOSE

LIÑOLO LA PAULUSI KWA

BAKOLOSE

 

Litumeliso

1

1 Liñolo le, li zwa ku Paulusi muapositola wa Jesu Kreste ka tato ya Mulimu, ni ku mwanahabo luna Timotea. 2 Li ñolelwa balumeli ba ba mwa Kolose, ili banabahaboluna ba ba sepahala ku Kreste. Mulimu Ndat'a luna a mi fe sishemo ni kozo. Tapelo ya buitumelo 3 Lu itumela kamita ku Mulimu, Ndat'a Mulen'a luna Jesu Kreste, ha lu mi lapelela. 4 Lu utwile tumelo ya mina ku Jesu Kreste, ni lilato le mu na ni lona kwa batu ba Mulimu kaufela.

5 Litaba ze Nde za niti ha li til'o fita ku mina, lwa pili, mu bulelezwi sepo ye fumanwa ka zona. Kabakaleo, tumelo ni lilato la mina li tomilwe fa linto ze mu sepile, ze mu bulukezwi mwa lihalimu. 6 Litaba ze Nde za hana, mi li tisa limbuyoti za zona mwa lifasi kaufela, sina mo li ezelizwe ku mina, haisali mu kala ku utwa za sishemo sa Mulimu, mi mu ziba luli mo si inezi. 7 Zeo, mu itutile zona ku Epafrasi, mulatiwa wa luna ye lu sebeza ni yena, ya sebeleza Kreste ka busepahali mwa sibaka sa luna.

8 U lu bulelezi za lilato le mu filwe ki Moya.

9 Kabakaleo, ha lu liseli ku mi lapelela, isamba lut utwa za mina. Lu kupa Mulimu kuli a mi fe ka ku tala zibo ya tato ya hae, ka ku mi abela butali kaufela ni kutwisiso ye fiwa ki Moya wa hae. 10 Kihona mu ta kona ku pila mw'a latela Mulena, ni ku eza kamita ze mu tabisa. Mu ta eza misebezi ye minde ya mifuta futa, mi mu ta hula mwa zibo ya Mulimu. 11 Lu kupa kuli, ka maata a hae a' komokisa, Mulimu a mi tiise kwa maneku kaufela, mu kone ku ba ni pilutelele ni buiswalo mwa lika kamukana. 12 Mu itumele ka tabo ku ndate ya mi konisize ku ba ni kabelo ku zeo Mulimu a li bulukela bao i li ba hae, mwa mubuso wa liseli. 13 U lu lamulezi kwa maata a lififi, mi u lu tutiselize hande mwa mubuso wa Mwan'a hae ya latiwa. 14 Ki ka yena ha lu lukuluhile ni ku swalelwa libi.

 

Seo Kreste a li sona ni s'a ezize

15 Kreste ki siswaniso se si bonwa sa Mulimu ya sa bonwi. Mweli, fa halimw`a ze bupilwe kaufela. 16 Ka yena lika kamukana li e zizwe, ze kwa lihalimu ni ze mwa lifasi, lika kamukana ze bonwa ni ze sa bonwi, mioya ye maata, ni mibuso, babusi ni babusisi ba yona. Ka yena Kreste, Mulimu u ezize lika kamukana, mi u li ezelize yena. 17 N'a li teñi linto kaufela li si ka eziwa kale, mi ki ka yena ze li teñi ha li li teñi. 18 Yena ki toho ya keleke, ona mubili wa hae. Yo i li wa pili, i li mweli wa ba ba zusizwe kwa bafu, kuli yena a nosi a be wa pili kwa lika kamukana.

19 I ne li mulelo wa Mulimu wa ku ina ku yena ka ku tala. 20 Ka nzila ye cwalo, a lela ku kutiseza lika kaufela, ze mwa ni ze kwa lihalimu, ku yena ka Mwan`a hae,ka ku eza kozo ka mali a hae a n`a sululezwi fa sifapahano.

21 Sapili, ni mina ne mu li kwahule ni Mulimu. Ne mu li lila za hae kabakala ze maswe kaufela ze ne mu hupula ni ze ne mu eza. 22 Kono cwale, ka lifu l'a shwile Mwan'a hae ka lona, Mulimu u mi kutiselize ku yena kuli mu tahe fapil'a hae mu li ba ba kenile, ba ba si na kabali ni ba ba sa nyazahali. 23 Nihakulicwalo, mu swanezi ku zwelapili mwa tumelo ya mina, mu nze mu tiile fa mutomo o maata, mu sa lumeli ku sutiswa fa sepo ye mu fumani ha mu se mu utwile Litaba ze Nde. Litaba ze Nde zeo, ki zona ze bulelezwi batu kaufela mwa lifasi, mi na, Paulusi, ni ezizwe sikombwa sa zona.

 

Musebezi wa Paulusi kwa Keleke

24 Mi cwale, na ni tabile ka manyando a' ni tahezi kabakala mina. Kakuli ka manyando a mubili wa ka, ni taleleza se ne si siyezi fa manyando a n'a nyandela keleke ili mubili wa hae. 25 Mulimu u ni ezize sikombwa sa Keleke. U ni file musebezi wo kabakala mina. Ki musebezi wa ku bulela patalaza linzwi la hae. 26 Manzwi a hae ki kunutu y'a patezi batu kaufela, ku zwa kwa makalelo, kono y'a patululezi batu ba hae cwale. 27 Mulimu u itatezi ku ba sinulela kunutu yeo ye tuna, ye komokisa, y'o beyezwi Balicaba kamukana. Mi kunutu yeo ki ye. Kreste u ku mina, mi taba yeo i talusa kuli mu ta abelwa kwa kanya ya Mulimu. 28 Cwale lu luta Kreste kwa batu kamukana. Lwa kalimela ni ku luta ufi ni ufi ka butali kaufela, kuli lu tise yo muñwi ni yo muñwi fapil'a Mulimu a kondile ka Kreste. 29 Kuli zeo li ezahale, ni sebeza ka tata ni nze ni lwana ka ona maata a matuna a' sebeza ku na, ili maata a zwa ku Kreste.

2

 

Bufumu bu fumanwa ku Kreste

1 Ni lata kuli mu zibe butata bwa ndwa ye ni lwanela mina, ni be Laodisea, ni ba ba sa ni zibi kaufela ka sifateho. 2 Ni ikataza cwalo kuli ba tiye lipilu, ba kopane hamoho ka lilato, mi ba fumane bufumu bwa sepo ye tiswa ki kutwisiso ya niti. Kihona ba ka ziba kunutu ya Mulimu, ili Kreste kasibili. 3 Ki ku yena mo ku patilwe bufumu kaufela bwa zibo ni butali bo bu zwa ku Mulimu.

4 Ni mi bulelela cwalo, kuli mu si ke mwa putelelwa ki mutu ufi kamba ufi ka likañi za buhata, niha li ka bonahala bunde cwañi ni cwañi. 5 Niha ni li siyo ka mubili, ni inzi ni mina ka moya, mi kwa ni tabisa ha ni bona mo mu tiyela hamoho mwa tumelo ku Kreste.

 

Lu na ni bupilo bo bu tezi ku Kreste

6 Cwale, sina ha mu lumezi kuli Jesu Kreste a be Mulen'a mina, mu pile ka ku kopana ni yena. 7 Mu tome mibisi ku yena. Mu yahe bupilo bwa mina kaufela fahalimw'a hae, mi mu tiyelele luli mwa tumelo ya mina si na mo mu lutezwi. Hape, mu be ni buitumelo.

8 Mu tokomele kuli mu si ke mwa swaswa ki mutu ka butali bwa buhata bo bu sina tuso, bo bu simuluhile kwa lituto ze ba shimbululelana batu, ni kwa zibo ye fosahalile bakeñisa ze busa lifasi, kono ili bo bu sa simuluhi ku Kreste. 9 Kakuli seo Mulimu a li sona ka kakalezo si fumanwa ku Jesu, mi cwalo luli Mulimu u inzi ku Jesu. 10 Mi, ka ku kopana ni yena, mu filwe bupilo bo bu tezi. Ki yena ya fahalimw`a bulena ni mibuso kaufela.

11 Ka ku kopana ni yena mu keni mwa mupato, isiñi mupato wa batu, kono mupato luli wa Kreste, ili mupato o ka ona mutu u lukululwa mwa maata a mubili o' tezi sibi. 12 Kakuli ha mu kolobelizwe, mu pumbekilwe ni Kreste, mi ka kolobezo ya mina hape mu zusizwe ni yena kakuli mu lumezi mwa maata a Mulimu ya mu zusize kwa bafu.

13 Sapili ne mu swana sina ba ba shwezwi ki moya, kabakala libi za mina, mi hape ne mu li balicaba ba ba kwand'a Mulao. Kono cwale Mulimu u mi kutiselize mwa bupilo ka Kreste. Mulimu u lu swalezi libi za luna kaufela.

14 U takuzi liñolo la milatu ya luna le ne li lu tama kabakala ku palelwa ku buluka milao, mi u felisize maata a lona ka ku li kokotela fa sifapahano.

15 Mi fa sifapahano foo, Kreste u itukuluzi mwa maata a malena ni mibuso ya lifasi; u ba swabisize patalaza, ka ku be etelela sina mo ba ezeza ba ba tuzi ha ba tundaela fapil'a ba ba tuzwi. 16 Cwale, ku si ke kwa ba ni ya ka mi tomela milao ka se mu ca ni kunwa, kamba ka mazazi a pumulo, kamba ka moonda, kamba ka la sabata.

17 Zeo kaufela ki muluti feela wa ze sa taha. Seo i li sona luli, ki Kreste. 18 Mu si ke mwa lumela ku atulwa ki mutu ufi kamba ufi ya tabela ku bonwa ike wa ikokobeza ni ku lapela mangeloi, mi ya nga ka butuna lipono z'a boni. Mutu ya cwalo u tundulukiswa ki minahano ya hae ku si na libaka. 19 U tuhezi ku swalelela ku Kreste, ya li toho. Mwa pabalelo ya Kreste, mubili kaufela wa uteha, mi u ngungahanyiwa hamoho ki malukululelo ni misifa, mi u hula ka mw'a latela Mulimu kuli u hule.

 

Kushwa ni ku pila ni Kreste

20 Mu shwile ni Kreste, mi mu lukuluzwi kwa ku latelela maata a mioya ye maswe ye lumilwe ku t'o busa lifasi. Kikabakalañi ha mu pila inge mu sa li ba lifasi le? Ki kabakalañi ha mu sa buluka milao ye cwaleka. 21 ”U si ke wa nga se”, “U si ke wa utwa sika ka ku lazwa”, “U si ke wa swala swala sani”? 22 Ki milao ye tomezwi lika ze lukela ku fela kapili ha li se li sebelisizwe. Ki litaelo ni lituto za batu. 23 Kwa utwahala, milao yeo i bonahala ku ba ni ngananyana ha i hapeleza ku lapela, ku ba ni buikokobezo, mi ha i bata ku nyandisa mubili. Kono ha i na tuso luli kwa ku hanisa litakazo za mubili.

 

3

 

Mulumeli a bate ze kwa lihalimu

1 Mu zuhile kwa bafu ni Kreste. Cwalehe, mu bate ze kwa lihalimu, kw'a inzi Kreste ku la bulyo la Mulimu.

2 Mu ise lipilu za mina ku ze kwahalimu, isiñi ku ze mwa fafasi. 3 Kakuli mu shwile, mi bupilo bwa mina bu patilwe ni Kreste ku Mulimu. 4 Bupilo bwa mina luli ki Kreste, mi h'a ta bonahala, ni mina cwalo mu ta bonahala ni yena mu li mwa kanya ya hae!

Bupilo bwa kale ni bo bunca

5 Ki fo, mu bulaye litakazo za lifasi ze sebeza ku mina ze cwaleka buhule, ze masila, maikuto ni minahano ye maswe, ni takazo ya bufumu, ku lakaza bufumu ku swana ni ku lapela milimu. 6 Kikabakala ze cwalo, buhali bwa Mulimu ha bu ka taha fahalimw'a ba ba hana ku mu utwa. 7 Mina kasibili ne mu pila mwahal'a batu ba ba cwalo sapili, bupilo bwa mina ha ne bu sa buswa ki litakazo zeo.

8 Kono cwale, sina ha mu li bakreste, mu li tuhele zeo kaufela, ili buhali, ku nyema ni lutimbo. Matapa ni linyefulo li si ke za zwa mwa milomo ya mina. 9 Mu si ke mwa bulelela yo muñwi buhata, kakuli mu se mu tubuzi mutu wa kale ni mikwa ya hae.

10 Mi mu se mu apezi yo munca, ili ya shemunwa nako kaufela, kuli mu kone ku ziba hande yena Mulimu ya mi bupile ka siswaniso sa hae.

11 Kabakaleo ha ku sa na Balicaba kamba Majuda, ba ba ile kwa mupato kamba ba ba si ka ya kwa mupato, mañete, ba ba kwatasi, batanga kamba balukuluhi, kono Kreste wa ba likana kaufela kakuli u pila ku bona kamukana! 12 Mu batu ba Mulimu. U mi latile, mi u iketezi mina kuli mu be ba hae. Kabakaleo, mu apale makeke, sishemo, buikokobezo, musa ni pilu telele.

13 Mu like ku swalisana niha mu sa latani, mi mu swalelane yo muñwi ni yo muñwi. Mu swalelane sina Mulena h'a mi swalezi ni mina.

14 Fahalimw'a zeo kaufela, mu apale lilato kakuli ki lilato le li tama hamoho lika kaufela ku li eza nto i liñwi ye kondile. 15 Kozo y'a mi file Kreste, i buse lipilu za mina, kakuli ki kozo yeo Mulimu a mi bizelize yona hamoho, mina mu li lilama za mubili u li muñwi. Mu be ni buitumelo. 16 Manzwi a Kreste, a kona ku mi fumisa lika kamukana, a ine mwa lipilu za mina. Mu lutane mi mu elezane ka butali. Mu opelele Mulimu, ka pilu ya mina kaufela ni ka buitumelo, lipina za litumbo ni lisamu.

17 Ze mu bulela kamba ku eza kaufela mu li eze ka libizo la Mulena Jesu, mu nze mu itumela ka yena ku Mulimu Ndate.

Kutwano ya batu mwa bupilo bo bunca

18 Basali, mu kuteke banna ba mina, kakuli ki sona se mu swanezi ku eza sina ha mu li balumeli.

19 Banna, mu late basali ba mina. Mu si ke mwa ba ni buhali ku bona.

20 Banana, mwa linto kaufela mu mamele se si bulelwa ki bashemi ba mina, kakuli ki sona se si tabisa Mulimu.

21 Bashemi, mu si ke mwa filikanya bana ba mina, kakuli ba ka swana ba zwafa.

22 Batanga, mu kuteke malen'a mina ba lifasi mwa lika kamukana. Mu si ke mwa eza cwalo ku ba tabisa ha ba mi talimezi feela, kono ka ku sepahala, mu mamele se ba laela, mu nze mu saba Mulena.

23 Musebezi wa mina, niha u ka ba ufi kamba ufi, mu u eze ka pilu ya mina kaufela, inge mu sebeleza Mulena, isiñi batu. 24 Mu hupule kuli Mulimu u ta mi fa mupuzo. Mu ta amuhela s'a si bulukezi batu ba hae. Kakuli Kreste ki yena Mulena luli ye mu sebeleza. 25 Kono ya eza maswe, u ta amuhela se si mu lukela, ka ku ya ka ze maswe z'a ezize, kakuli Mulimu u ezeza batu ka ku swana.

 

4

1 Malena, mu eze batanga ba mina hande ka ku luka. Mu hupule kuli, ni mina, mu na ni Mulena mwa lihalimu.

 

Likelezo

2 Mu lapele ka mutundamenyi, mi mu be ni maseme ha mu lapela, mu nze mu itumela ku Mulimu. 3 Mu lu lapelele ni luna, kuli Mulimu a te a lu fe nako ye nde ya ku luta linzwi la hae, ni ku bulela kunutu ya Kreste. Kakuli kikabakala kunutu yeo ha ni li mwa tolongo ka nako ye. 4 Mu lapele, kuli ha ni bulela ka za kunutu yeo, i be ka mukwa o' utwahala hande, sina mo ku ni lukela. 5 Mu be ni butali mwahal'a ba ba sa lumeli, mu nze mu itusisa hande ka linako kamukana ze mu ka ba ni zona, ku paka linzwi.

6 Pulelo ya mina i be ye tabisa, ye zusa maikuto a batu, mi mu zibe ku alaba hande mutu ni mutu.

 

Litumeliso za mafelelezo

7 Mwanahabo luna Tikike, mutusi ya sepahala ye lu swalisana ni yena mwa musebezi wa Mulena, u ta mi kandekela za ka kaufela.

 

8 Ki lona libaka ha ni mi lumela yena, a t'o mi wisa pilu ka ku mi bulelela mo lu zuhela kwano kaufel'a luna. 9 U taha ni Onesimo, mwanahabo luna ya latwa mi ya sepahala, yo ili wa ku mina. Ba ta mi zibisa za kwanu kaufela.

10 Arisitarko, ya inzi mwa tolongo ni na, wa mi lumelisa, ni Mareka cwalo, mwan'a kaizel'a Barnabasi. Mu se mu amuhezi likelezo ka yena mutu yo. Mu mu amuhele hande haiba a ka fita ku mina.

11 Jesu, ya bizwa Justusi, ni yena wa lumelisa. Bao ba balalu, ki bona feela Majuda ba ba lumezi, ba ba sebeleza Mubuso wa Mulimu ni na, mi ba ni tusize hahulu.

12 Litumeliso ze ñwi li zwa ku Epafrasi, yo muñwi wa ku mina, ili mutang'a Jesu Kreste. U pihelezi ku mi lapelela, a nz'a kupa Mulimu kuli mu tiye, sina ha mu li bakreste ba ba hulile, ba ba mamela se si latwa ki Mulimu kaufela.

13 Kwa neku la hae, se ni kona ku paka kikuli u tukufalezwi hahulu ku mi tusa, hamohocwalo ni batu ba mwa Laodisea ni Yerapolisi. 14 Luka, ñaka wa luna ya latiwa, ni Demasi ba mi lumelisa.

15 Mu fitise litumeliso za luna kwa banabahabo luna ba kwa Laodisea, ni ku Nimfasi hamoho ni keleke ye kopanela mwa ndu ya hae. 16 Ha mu se mu balile liñolo le, mu bone kuli li y'o balwa ni mwa keleke ya Laodisea. Ni mina cwalo, mu bale liñolo le li Zwa kwa Laodisea, le ba ta mi lumelela. 17 Hape, mu bulelela Arkipo, mu li: “U tokomele ku eza hande musebezi o' filwe, u li mutanga wa Mulena.”

18 Ni ñola manzwi a, ka lizoho la ka. Na mi lumelisa, na Paulusi.

 Mu si ke mwa libala mawenge a ka!

 Sishemo sa Mulimu si be ni mina.