HEB LO59.SFM 30/10/2003 L. L. M. LOZI MONGU ZAMBIA

MAHEBERU

LIÑOLO LA

MAHEBERU

 

Mulimu u bulezi ka Mwan'a hae

 

1

1 Ka linako za kale, Mulimu u bulezi hañata, ni ka mikwa ye miñata, ni bokukw'a luna, ka bapolofita. 2 Kono ka mazazi a, ili a mafelelezo, u bulezi ni luna ka Mwan'a hae. Ki ka yena kuli Mulimu u ezize lika kaufela, mi ki yena ya supilwe ki Mulimu ku ba muñ'a zona kamukana. 3 U bonisa kanya ya Mulimu ni seo Mulimu a li sona. U sweli lika kaufela ka linzwi la hae le li maata. A sin'o tapisa batu kwa libi za bona, a y'o ina mwa lihalimu ku la bulyo la Mulimu ya Maata Kaufela.

 

Mwana u fita Mangeloi

4 Mwana u ezizwe yo mutuna ku fita mangeloi sina libizo l'a filwe ki Mulimu ha li li le lituna hahulu ku fita mabizo a mangeloi. 5 Kaniti Mulimu h'a si ka bulelela nikamuta lingeloi, nihaili li li liñwi feela, kuli:

“U mwan'a ka.

Ni ku pepile kacenu.”

Mi h'a si ka bulela ni kamuta ka lingeloi, a li:

“Ni ka ba Ndat'ahe,

 mi yena a be mwan'a ka.”

6 Kono Mulimu ha s'a bata ku lumela Mweli wa hae mwa lifasi, u ize.

“Mangeloi kamukana a Mulimu a

swanezi ku mu sebeleza.”

7 S'a bulezi Mulimu ka mangeloi, ki se.

“Mulimu u eza mangeloi a hae

malimi a mulilo.”

8 Haili ka Mwana, Mulimu u ize.

“Lubona lwa hao, Mulimu,

ki lwa kuya kuile.

U busa ka ku luka.

9 U lata ze lukile, mi u toile ze maswe.

Kabakaleo Mulimu

wa hao, u ku ketile

ni ku ku tabisa ka ku ku fa situlo se

si fita s'a file litaka za hao.”

10 Mi hape u ize.

“Ki wena, Mulena

ya ezize lifasi kwa makalelo,

mi lihalimu ki musebezi

wa mazoho a hao.

11 Zeo kaufela li ta fela,

kono wena u ta siyala.

Li ta supala kamukana sina liapalo.

12 U ta li puta inge kubo,

mi li ta cincwa sina liapalo.

Kono wena, ha u fetuhi,

mi bupilo bwa haohabu feli.”

13 Mulimu h'a si ka bulelela ni kamuta le liñwi la mangeloi a hae kuli.

“Ina ku la bulyo la ka

ku fitela ni beya lila za hao

kwa ta s`a mahutu a hao.”

14 Mangeloi ki lika mañi? Kaufela ona ki mioya ye sebeleza Mulimu, mi ye lumiwa ki yena ku tusa ba ba lukela ku piliswa.

2

 

Ku piliswa ko kutuna

1 Kabakaleo, lu swanezi ku kumalela hahulu kwa niti ye lu utwile, kuli lu si ke lwa yaululwa. 2 Buniti bwa manzwi a' bulezwi ki mangeloi bu bonahalile, mi mutu kaufela ya si ka latelela manzwi ao kapa ku a lumela, u fumani mulatu o n'o mu swanela. 3 Cwale lu ta banduka cwañi, haiba lu keshebisa ku piliswa ko kutuna cwana? Ku piliswa ko, ku bulezwi pili ki yena Mulena kasibili, mi ba ba mu utwile, ba lu kolwisize kuli ki niti. 4 Zeo li nze li ezahala, Mulimu u tiisize bupaki bwa bona ka liponiso ze maata, ze komokisa, ni limakazo za mifuta futa. Mane u abile limpo za Moya o Kenile ka mw'a n'a latela yena.

 

Mueteleli wa batu kwa kupiliswa

5 Kakuli Mulimu h'a si ka fa mangeloi maata a ku busa lifasi le li sa taha le lu bulela ka lona. 6 Mane mwa Mañolo yo muñwi u paka kuli.

“Mutu ki sika mañi,

Mulimu, kuli u mu hupule?

Mwan'a mutu bo,

kuli u mu babalele?

7 U mu beyile nakonyana

kwatas'a mangeloi.

U mu file kanya ni likute

le li fiwa malena.

8 Mi u mu ezize mubusi

wa lika kamukana.”

 Ha kutwi Mulimu u ezize mutu “Mubusi wa lika kamukana” kikuli u beyile kwatas'a hae linto kaufela luli, mi ha ku na se si siyezi kwatuko, s'a sa zamaisi. Kono ka nako ye, ha lu boni mutu a busa lika kamukana. 9 Kono se lu bona ki se. Jesu u beyilwe nakonyana kwatas'a mangeloi, kuli ka sishemo sa Mulimu, a shwele batu kaufela. Mi lwa mu bona cwale h'a s'a filwe kanya ni likute kabakala lifu l'a fitile ku lona. 10 Kanti i ne li swanelo kuli Mulimu, ya eza ni ku babalela lika kaufela, a eze kuli Jesu a be ya petehile ka manyando ao a fitile ku ona, kuli a kone ku tisa bana ba bañata mwa kanya ya hae. Kakuli Jesu ki yena ya ba etelela ku ba isa kwa ku piliswa.

11 Jesu ya kenisa batu kwa libi za bona, ni bona ba ba keniswa, Ndat'a bona kaufela ki a li muñwi. Ki kabakaleo Jesu h'a si na maswabi a ku ba biza banyani ba hae. 12 A` li ku Mulimu.

“Oho Mulimu,

ni ta bulela libizo la hao

kwa banyani ba ka,

ni ta ku lumba mwahal'a nyangela.”

13 Hape a li:

“Ni ta beya sepo ya ka ku Mulimu.”

 

Mi hape a li:

“Ki na yo,

ni bana b'a ni file Mulimu.”

14 Cwalehe bana, sina mw'a ba bizeza, ha ba li batu ba nama ni mali, Jesu ni yena a swane ni bona ka ku ikabela butu ni bona. U ezize cwalo kuli ka lifu la hae a felise Satani ya sweli maata a lifu. 15 Mi hape kuli a lukulule cwalo ba ba ne ba swana sina batanga kaufela kabakala ku saba lifu. 16 Kwa utwahala kuli h'a si ka t'o tusa mangeloi, kono sina mo ku ñolezwi: “U til'o tusa lusika lwa Abrahama.” 17 Ki kabakaleo ha n'a swanezi ku ezwa ya swana ni banabahabo mwa mikwa kaufela, kuli a be Muprisita yo Muhulu wa bona ya sishemo, mi ya sepahala mwa sebelezo ya hae fapil'a Mulimu, kuli ka mukwa wo libi za batu li swalelwe. 18 Mi cwale, u kona ku tusa ba ba likwa, kakuli yena kasibili u likilwe ni ku nyanda.

3

 

Jesu ki yo mutuna ku Mushe

1 Kabakaleo, bakreste banabahesu, ba ba bizizwe ni mina ki Mulimu, mu talime ku Jesu ya lumilwe ki Mulimu kuli a be Muprisita yo Muhulu wa tumelo ye lu bulela. 2 U sepahalile ku Mulimu ya n'a mu ketezi ku eza musebezi wo, sina Mushe ni yena ha n'a sepahalile mwa ndu ya Mulimu kaufela.

3 Mutu ya yaha ndu u fumana hahulu likute ku fita ndu ili yona. Kamukwaocwalo, Jesu u swanelwa ki kanya ye fita ya Mushe kwa butuna. 4 Ndu kaufela i na ni ya i yahile, kwa utwahala, mi muyahi wa lika kaufela ki Mulimu. 5 Mushe yena, n'a sepahalile mwa ndu ya Mulimu kaufela. N'a li mutanga, ya n'a na ni ku talusa lika ze ne ta bulelwa ki Mulimu ka nako ye taha. 6 Kono Kreste u sepahalile, ili Mwana ya busa ndu ya Mulimu. Ndu ya hae ki luna, haiba lu tiiselize mwa tumelo ni mwa sepo ye lu itumba ka yona.

 

Pumulo ya batu ba Mulimu

7 Kabakaleo, sina m`o bulelela Moya o Kenile.

“Ha mu utwa linzwi la Mulimu kacenu,

8 mu si ke mwa tatafaza lipilu za mina

sina mo mu ne mu ezelize

ha ne mu fetuhezi Mulimu,

zazi lani ha mu mu lika

mwa lihalaupa.

9 Hona mo, bo kukw'a mina ba ni lika,

mi ba ni tukufaza,

ku bulela Mulimu,

niha ne ba boni misebezi

ye ne ni ezize ka lilimo ze mashumi a mane.

10 Kabakaleo, na halifela batu bao,

mi na li:

‘Mihupulo ya bona

kamita ya lyangana.

Ha ba si ka ziba mikwa ya ka,

ni kamuta.’

11 Na nyema ni ku ikonka, na li:

‘Ha ba sa tola ba t'o pumulela ku na!’ “

12 Banabahesu, mu tokomele kuli ku si ke kwa fumaneha mwahal'a mina mutu wa pilu ye maswe, ye sa lumeli, mane ye ka mu keluseza kwahule mi Mulimu ya pila. 13 Kufita kuli ku si ke kwa ba ni ya ka pumiwa ki sibi, mi a tatafale pilu, mu swanezi ku tusana ka zazi ni zazi, sina ha lu ka li “Kacenu” ili lizazi le li lu tama ni mwa Mañolo. 14 Kakuli kaufel'a luna lu swalisana ni Kreste, haiba lu tiiseza mwa tumelo ye ne lu na ni yona kwa makalelo. 15 Ku ñozwi cwana kuli.

“Ha mu utwa linzwi la Mulimu kacenu,

mu si ke mwa tatafaza lipilu za mina

sina bo kukw`a mina ha ne ba mu fetuhezi.”

16 Ki bo mañi ba ba ne ba utwile linzwi la Mulimu, mi ba mu fetuhela? Ki bona bao kaufela ba ba zwile mwa Egepita ba zamaiswa ki Mushe.

17 Mi Mulimu n'a nyemezi bo mañi lilimo ze mashumi a mane? N'a nyemezi bona ba ba ne ba ezize sibi, mi ba shwela mwa lihalaupa. 18 Mi ki bo mañi b'a n'a konkezi Mulimu kuli ha ba na ku y'o pumulela ku yena ni kamuta? N'a konkezi libangoki! 19 Mi ki niti lu bona kuli ha ba si ka kona ku kena mwa pumulo yeo, kabakala ku sa lumela kwa bona.

4

1 Mulimu u lu siyezi sepiso ya ku y'o pumulela ku yena. Cwale a lu sabeñi kuli ku si ke kwa fumanwa nihaili a li muñwi ku mina, ya ka palelwa ku y'o kena mwa pumulo yeo. 2 Kakuli lu utwile Litaba ze Nde za bupilo sina bona ba ba ne ba liteñi mwa lihalaupa. Ba utwile litaba zeo, kono ha li si ka ba tusa se siñwi, kakuli niha ba li utwile, ha ba si ka li amuhela ka tumelo. 3 Luna ba ba lumezi, lu ta kena mwa pumulo yeo, y'a n'a bulela Mulimu, h'a li:

“Na nyema, mi na ikonka, na li:

‘Ha ba na ku kena mwa pumulo

ya ka ni kamuta!’

 A bulela cwalo, mihaike musebezi wa hae wa ku eza lifasi n'o s'o felile. 4 Kakuli, ko kuñwi mwa Mañolo, ku ñozwi cwana bakeñisa lizazi la busupa: “Mulimu a pumula ka zazi la bu supa, kwa misebezi ya hae kaufela.”

6 Ba ba kalile ku utwa Litaba ze Nde za bupilo ha ba si ka kena mwa pumulo yeo kabakala ku sa lumela kwa bona. Kono ba teñi ba bañwi ba ba ka lumelelwa ku y'o kena ni ku y'o pumula ni Mulimu. 7 Kubonahala cwalo ka taba ya kuli Mulimu u tomile lizazi le liñwi le li bizwa “Kacenu”. U bulezi za lona mwamulaho a lilimo ze ñata, ka Davida, mi i sa li mwa litimana ze li se li bulezwi, ha kutwi:

“Ha mu utwa linzwi la Mulimu kacenu,

mu si ke mwa tatafaza lipilu za mina.”

8 Kucwalo kakuli kabe Joshuwa n'a file bana ba Isilaele pumulo, kabe Mulimu n'a si ke a bulela hape za lizazi li sili kasamulaho.

9 Hakulicwalo, li sa li teñi lizazi la batu ba Mulimu la ku pumula sina yena h'a n'a pumuzi ka la busupa. 10 Kakuli mutu kaufela ya kena ku y'o pumula ni Mulimu, u pumula kwa misebezi ya hae sina Mulimu ni yena h'a pumuzi ku ya hae.

11 A lu likeñi, ka mo lu konela kaufela, ku y'o kena mwa pumulo yeo. Ku si ke kwa ba ni ya ka palelwa sina ba ba ne ba li mwa lihalaupa, ha ba palelwa ku kena kabakala mañaña a bona.

12 Linzwi la Mulimu la pila, mi li maata. Li buhali ku fita sabule ye lozizwe kafa ni kafa. Li punya ku y'o fita fo ku kopanela moya ni pilu, ko ku swalani malukuluhelo ni mooko. Li atula litakazo ni minahano ye mwa pilu ya mutu. 13 Ha ku na s'a ka patelwa Mulimu. Lika kaufela li fa patalaza, li kwahuluzwi. Wa li bona, mi ki ku yena ko lu swanezi ku y'o ikalabela.

 

Jesu Muprisita yo Mutuna ku fita ba bañwi

14 Cwale a lu kumaleleñi mwa tumelo ye lu lumezi ku yona, kakuli lu na ni Muprisita yo Mutuna, yo muhulu, ya il'o fita kwa lihalimu ku Mulimu, yena Jesu Mwan'a Mulimu. 15 Muprisita yo Muhulu wa luna h'a palelwi ku lu shwela makeke mwa bufokoli bwa luna. Kwand`a cwalo ni luna, mi u likilwe mwa lika kaufela, kono h'a si ka eza sibi. 16 A lu suteleleñi, ka sepo ye tezi, kwa lubona lwa Mulimu ili lwa sishemo. Kwateñi lu utwelwe butuku, lu shemubiwe, mi lu tusiwe ha lu li mwa butata.

5

1 Muprisita yo muhulu kaufela u ketilwe mwahal'a batu, mi u beezwi ku sebeleza Mulimu mwa sibaka sa bona, ku fa limpo ni litabelo kabakala libi. 2 H'a li ya fokola ni yena ka mikwa ye miñata, u kona ku ba ni pilu telele ku ba ba sa zibi ni ku ba ba fosa. 3 Mi kakuli ni yena kasibili wa fokola, h'a swaneli ku fitisa litabelo za libi za batu feela, kono ni za hae cwalo.

4 Ha ku na ya kona ku iketela ili yena likute la ku ba muprisita yo muhulu. Ki ka pizo ya Mulimu feela kuli mutu u ezwa muprisita yo muhulu, sina mw'a n'a inezi Aruni.

5 Kucwalo ni ku Kreste. H'a si ka ipa likute la ku ba muprisita yo muhulu ili yena, kono u ketilwe ki Mulimu ya ize ku yena:

“Ki wena mwan'a ka.

Ni ku pepile kacenu.”

6 Mi hape, mokuñwi u ize.

“U ta ba muprisita kuya kuile,

ka mukwa wa Melekisedeke.”

7 Jesu h'a n'a sa pila fafasi, u ezize litapelo ni likupo, ka ku huwa hahulu ni ka ku itilelela ku Mulimu ya n'a kona ku mu pilisa kwa lifu. Mi Mulimu a mu utwa kakuli n'a ikokobelize, ni ku itoboha.

8 Niha n'a li Mwan'a Mulimu, u itutile ku utwa ni ku mamela ka manyando a hae. 9 H'a s'a ezizwe ya si na koli, a fetuha ya fumanisa ba ba mu utwa kaufela bupilo bo bu sa feli. 10 Mulimu a mu yolisa ku ba Muprisita yo Muhulu ka mukwa wa Melekisedeke.

 

Temuso bakeñisa kutuhela tumelo

11 Ki ze ñata ze ne lu ka bulela ka za taba ye, kono ku tata ku mi taluseza kakuli mu bunya kwa ku utwisisa. 12 Nako i ne li teñi ya kuli mu fetuhe baluti, kono nihakulicwalo mu sa tokwa ya ka t'o mi luta lituto za matatekelo a litaba za Mulimu. Bakeñisa kuca lico ze tiile, ku sa tokwahala kuli mu nwe mabisi pili. 13 Ya nwa mabisi kaufela i sa li mbututu, ya si ka ba ni zibo ya ze nde ni ze maswe.

14 Kono lico ze tiile zona ki za ba bahulu, ba ba se ba na ni zibo ya ku keta bunde kwa bumaswe, kakuli mwa ku keta ko, ku twaela ku ba talifisize.

6

1 A lu zweleñipili mwa lituto ze tiile. Lu siye litaba za makalelo a tuto ya sikreste. Ha lu na ku toma hape mutomo wa lituto zeo, i li ku siya misebezi ye sina tuso, ni ku lumela ku Mulimu, 2 tuto bakeñisa likolobezo za mifuta futa, ni bakeñisa peo ya mazoho, ni zuho ya bafu ni katulo ye sa feli. 3 Pili! lu talime ze tuna cwale. Mi se, lu ta si eza haiba Mulimu a lata cwalo.

4 Taba ki ye. Kicwañi kwa bakwenuhi ba ba kutela kwa bupilo bo bu maswe? Zazi le liñwi ba boni liseli la Mulimu. Ba utwile munati wa mpo ya lihalimu, mi ba abezwi kwa Moya o Kenile. 5 Ba zibile bunde bwa linzwi la Mulimu ni maata a bupilo bo bu sa taha. 6 Nihakulicwalo ba kutela kwa bupilo bo bu maswe! Ha ku konahali kuli ba bake lwa bubeli, kakuli ba kokotela hape Mwan'a Mulimu fa sifapahano ni ku mu swabisa kwa nyangela.

7 Mulimu u tohonolofaza mubu o' nelwa hañata ki pula, mubu o' meliseza ba ba itimezi ona kutulo ya butokwa. 8 Kono ha u melisa miutwa ni liseto, ha u sa na tuso. U ta kutiwa kapili ki Mulimu, mi mafelelezo a ona ki ku ciswa.

9 Kono niha lu bulela cwalo, balatiwa, ha lu na pilaelo kwa neku la mina. Lwa ziba kuli mu mwa nzila ye nde, ya bupilo. 10 Mulimu u lukile. H'a na ku libala misebezi ya mina ni lilato le mu bonisize kabakala hae, ka lituso ze mu tusize ni ze mu sa tusa ka zona banabahabo mina ba balumeli. 11 Kono lu lakaleza yo muñwi ni yo muñwi wa mina ku tukufalelwa, mane ku y'o fita kwa mafelelezo, kuli se mu sepile si ezahale ka kutala. 12 Ha lu lati kuli mu be ni buzwa, kono lu lata kuli mu swane ni ba ba lumela, ba ba tundamena, mi ba fumana s'a sepisize Mulimu.

 

Sepiso ye tiile ya Mulimu

13 Mulimu ha n'a sepisize Abrahama, n'a ikonkile kuli u ta eza mw'a sepiselize. Sina ha ne ku si na yo mutuna ku mu fita ya n'a ka konka ka yena, u ikonkile ili yena ka libizo la hae. 14 A li: “Ni ku sepisa kuli ni ta ku tohonolofaza, mi ni kufe baikulu ba bañata.”

15 Cwale Abrahama a libelela ka ku ishuwa, mi a fumana s'a n'a mu sepisize Mulimu. 16 Mutu h'a itama, kamita u ikonka ka libizo la yo mutuna ku yena, mi mukwa o cwalo u feza likañi mwahal'a batu. 17 Mulimu n'a bata kuli ba ba ne ba na ni ku fumana sepiso yeo, ba utwisise kuli n'a si ke a fetuha hape. Kih'a s'a ekeza ku konka ka sepiso ya hae. 18 Ku na ni lika ze ze peli cwale, ze si ke za fetuha, mi hape f'a si ke a puma Mulimu: ku sepisa, ni ku konka ka sepiso. Cwale, luna ba ba fumani makundamo ku yena, lu tiiswa pilu hahulu ku kumalela kwa sepo ye fapil'a luna. 19 Sepo yeo ye lu sweli i tiile sina manjanga a lipilu za luna. I tiile, i tata, mi i y'o fitelela lisila la Tempele ya kwa lihalimu ku y'o kena mwa sibaka se si kenile ka ku fitisisa.

20 Ki kw'a itangetile Jesu kabakala luna. U il'o ba Muprisita yo Muhulu kuya kuile ka mukwa wa Melekisedeke.

 

7

 

Mulena ni Muprisita Melekisedeke

1 Melekisedeke yo, i n'e li mulena wa Salema ni muprisita wa Muambakani Mulimu ya Pahami. Abrahama ha n'a zwa kwa ndwa kw'a n'a fenyize malena, Melekisdeke a y'o mu katanyeza, mi a mu tohonolofaza.

2 Abrahama kih'a s'a mu fa kalulo ya bulishumi ku z'a n'a luwile kaufela. Taluso ya pili ya libizo la Melekisedeke kikuli “Mulena ya Lukile.” Mi kakuli ne i li mulena wa Salema, libizo la hae hape li talusa kuli ki “Mulena wa Kozo”. 3 Ndat'ahe ni m'ahe ni ba lusika lwa habo cwalo ha ba zibiwi. Mi ha ku zibwi f'a pepezwi ni f'a shwezi. U swana ni Mwan'a Mulimu. Ki muprisita kiya kuile.

4 Mwa bona kuli i n'e li yo mutuna cwañi! Abrahama ha n'a li toho ye ñwi ya lusika lwa hae, u file Melekisedeke kalulo ya bulishumi ya z'a n'a hapile kaufela mwa ndwa. 5 Mi ba lusika lwa Livi, bao i li baprisita, ba laelwa ki Mulao kuli ba nge kalulo ya bulishumi kwa batu ba Isilaele, kikuli, ba nga kwa bana bahabobona, niha ba li ba ba simuluhile ku Abrahama cwalo.

6 Melekisedeke n'a sa simuluhi ku Livi, kono a fiwa ki Abrahama kalulo ya bulishumi ya z'a n'a luwile, mi a mu tohonolofaza, yena ya n'a amuhezi lisepiso za Mulimu. 7 Ha ku na ya ka pihisa kuli ya tohonolofaza ki yo mutuna ku fita ya tohonolofazwa. 8 Ka taba ya baprisita, kalulo ya bulishumi i ngiwa ki batu ba ba shwa, kono haili ka Melekisedeke, kalulo ya bulishumi i ngilwe ki ya pila, sina mo ku pakelwa mwa Mañolo. 9 Mi cwale lu kana lwali, ni yena Abrahama h'a zwisa kalulo ya bulishumi yeo, ni yena Livi n`a zwisa, nihaike ki ba lusika lwa hae ba ba amuhela kalulo ya bulishumi ka nako ye. 10 Kakuli, ka nako yeo, Livi n'a si ka pepwa kale, kono lu ka li n'a li teñi mwa mubili wa kukw'a hae Abraham h'a t'o katana ni Melekisedeke.

11 Ki fa buprisita bwa Livi fo n'o tomilwe Mulao o filwe batu ba Isilaele. Cwale kambe musebezi wa baprisita ba Livi n'o bile 'o kondile hande, kambe ne ku si ke kwa tokwahala kuli ku bonahale muprisita wa mushobo u sili, muprisita ka mukwa wa Melekisedeke, isiñi ka mukwa wa Aruni. 12 Kakuli buprisita ha bu fetuha, mulao ni ona u swanezi ku fetuha. 13 Mi Mulen'a luna, ya bulelwa ka za hae, n'a li wa mushobo u sili, mi ha ku na nihaili a li muñwi feela mwa lusika lwa habo ya kile a ba muprisita ya sebelelize Mulimu kwa katala. 14 Kwa zibahala hande kuli n'a pepilwe ili wa mushobo wa Sijuda, mi Mushe h'a si ka bulela se siñwi ka lusika lo, h'a bulela ka baprisita.

 

Muprisita yo muñwi ya swana ni Melekisedeke

15 Mi taba ki ye, ye tiisa zeo kaufela. Ku tile muprisita u sili ya swana ni Melekisedeke. 16 H'a si ka beyiwa muprisita ka milao kapa ka taelo ya batu. U bile muprisita ka maata a bupilo bo bu si na ku fela. 17 Kakuli Mañolo a li: “U ta ba muprisita kuya kuile, ka mukwa wa Melekisedeke.”

18 Milao ya kale cwale, i beilwe kwatuko kakuli n'e fokola, mi n'e si na tuso. 19 Mulao wa Mushe kaniti ha u si ka kondisa sika. Kono sepo ye nde ku fita ya pili i se i keni cwale, ye lu suteleza ku Mulimu.

20 Ku ekeza ku zeo, ku na ni buitamo bwa Mulimu. Ne ku sina buitamo bo bu cwalo, ha ne ku beyiwa baprisita ba bañwi. 21 Kono Jesu u bile muprisita ka buitamo, Mulimu h'a ize ku yena.

“Mulena u ezize buitamo,

mi h'a na ku fetula muhupulo wa hae.

U ta ba muprisita kuya kuile.”

22 Ka taba yeo, Jesu u fetuhile paki ya bulikani bo bu fita bwa pili. 23 Ku na ni fapahano ye ñwi hape. Baprisita ba bañwi bao, ne ba li ba bañata kakuli ne ba shwa, mi ne ba sa koni kuzwelapili mwa musebezi wa bona. 24 Haili Jesu yena, u pila kuya kuile, mi buprisita bwa hae ha bu na ku shimbulukela ku mutu u sili. 25 Cwale, ka nako ye ni ka linako kamukana, wa kona ku pilisa ba ba taha ku Mulimu ka yena kakuli u pila nako kaufela a nz'a ba lapelela ku Mulimu.

26 Jesu, ki yena Muprisita wa luna yo Muhulu ye ne lu tokwa. Ki ya kenile. Ha ku si ka fumanwa foso kapa sibi ku yena. U kauhanyizwe ni batu ba baezalibi, mi u filwe situlo se si pahami kwa lihalimu. 27 H'a swani ni baprisita ba bañwi ba bahulu, kakuli h'a tokwi ku eza litabelo za zazi ni zazi ili a swalelo ya libi za hae pili, mi ku tuha fo, za libi za batu. U ezize sitabelo si li siñwi, hañwi feela, mi hape i bile sa mafelelezo, h'a ikezize sitabelo ili yena.

28 Mulao wa Mushe u keta batu ba ba si ka luka ku ba baprisita ba bahulu. Kono linzwi la buitamo bwa Mulimu, le li tile mwamulaho a Mulao, li ketile Mwana ya petehile kuya kuile, kuli a be Muprisita yo Muhulu.

8

 

Jesu Muprisita wa luna yo Muhulu

1 Ye ki yona toho ya taba kaufela ye lu bulela. Lu na ni Muprisita yo Muhulu ya cwana, ya inzi kwa silyo sa lubona lwa bulena mwa lihalimu.

2 Ki Muprisita yo Muhulu mwa Sibaka se si Kenile ka ku fitisisa, ili mwa tende luli ye tomilwe ki Mulena, isiñi mutu.

3 Muprisita yo muhulu kaufela u ketezwi ku fitisa limpo ni litabelo za limunanu ku Mulimu. Ni yena Muprisita wa luna yo Muhulu cwalo u swanezi ku ba ni s'a ta fitisa. 4 Ha i ne i ka ba kuli u fafasi, n'a si ke a ba muprisita ni hanyinyani, kakuli ku na ni baprisita ba ba fitisa limpo ka Mulao wa sijuda. 5 Musebezi wa buprisita o ba eza, ki siswaniso kapa muluti feela wa ze kwa lihalimu. Kwa swana ni mo ne ku inezi ku Mushe. Ha n'a s'a bata ku toma tende, Mulimu a mu bulelela, a li: “U eze lika kaufela ka ku li likanyisa ni z'o bonisizwe fa lilundu.”

6 Kono cwale, Jesu u filwe musebezi wa buprisita o mutuna hahulu ku fita wa bona, sina bulikani bw'a lukisize mwahal'a Mulimu ni batu ha bu li bo bunde ku fita bwa pili, kakuli bu tomilwe fahalimw'a lisepiso ze fita za pili kwa bunde.

7 Haikabakuli ne ku si na se si fosahalile mwa bulikani bwa pili, ne ku si ke kwa tokwahala bulikani bwa bubeli. 8 Kono Mulimu u fumani lifoso kwa batu ba hae, sina mw'a bulela mwa litimana ze:

“Mazazi a taha, ku bulela Mulena,

ha ni ka eza bulikani bo bunca

ni batu ba Isilaele,

ni lusika lwa Juda.

9 Ha bu na ku swana ni bulikani

bo ne ni ezize ni bo kukw'a bona,

zazi le ni ba swala kwa lizoho

ku ba zwisa mwa naha ya Egepita.

Ha ba si ka sepahala mwa ku mamela

bulikani bo ne ni ezize ni bona.

Kabakaleo na ba tokolomoha,

ku bulela Mulena.

10 Cwale bulikani bo ni ta eza

ni batu ba Isilaele

mwamulaho a mazazi ao ki bo,

ku bulela Mulena.

Ni ta beya milao ya ka

mwa minahano ya bona,

mi ni ta i ñola mwa lipilu za bona.

Ni ta ba Mulimu wa bona,

mi ba ta ba sicaba sa ka.

11 Ha ku sa na mutu ya ka luta

wa silalanda sa habo,

kapa mutu ya ka bulelela

wa naha ya habo kuli ‘Ziba Mulena!’

Kakuli ba ta ni ziba kaufel'a bona,

ku kala ka yo munyinyani,

ku y'o feleleza ka yo muhulu.

12 Ni ka swalela bumaswe bwa bona,

mi ni ta libala libi za bona.”

13 H'a bulela ka bulikani bo bunca, kikuli bwa pili bu supezi. Mi se si supezi kaufela si se si honehile, mi si tuha si fela.

9

 

Bulapeli bwa lifasi ni bwa lihalimu

1 Bulikani bwa pili ne bu na ni milao, ye ne latelelwa ha ne ku ezwa sebelezo, mi ne bu na ni sibaka cwalo sa ku lapelela se ne si yahilwe ki batu. 2 Ne ku yahilwe tende ya kwa nde, ye ne bizwa Sibaka se si Kenile. Mwateñi, ne ku na ni lampi, ni tafule ye na ni mahobe a n'a filwe Mulimu.

3 Kwabuse bwa lisila la bubeli, ne ku na ni tende ya mwahali ye ne bizwa Sibaka se si Kenile Hahulu.

4 Mwateñi, ne ku na ni katala ka gauda fo ne ku cisezwanga insense, ni Likwati la Bulikani, le ne li kwahezwi ka gauda kaufel'a lona. Mwa Likwati ku ne ku na ni piza ya gauda ye na ni manna, ni tupa ya Aruni ye ne shoshela matali, ni matapa a macwe fo ne ku ñozwi manzwi a bulikani.

5 Fahalimw'a Likwati, ne ku na ni maswaniso a mangeloi a n'a bonisa kanya ya Mulimu, mi n'a pakuzi mafufa a ona mwa sibaka seo kaufela mo ne ku swalelwa libi. Kono ye ha si yona nako ya ku talusa zeo kaufela ka ku tala.

6 Linto kamukana ha li se li lukisizwe cwalo, baprisita ne ba kenanga ka zazi ni zazi mwa tendeya kwa nde ku y'o eza misebezi ya bona.

7 Kono ki muprisita yo muhulu feela ya n'a kena mwa tende ya mwahali, mi n'a kena mwa tende ya mwahali, mi n'a eza cwalo hañwi feela ka silimo. N'a nganga mali a limunanu mi n'a y'o a fitisanga ku Mulimu kabakala lifoso za hae ni lifoso za batu, ze ne ba ezize ba sa lemuhi kuli ne ba fosa ha ba li eza.

8 Ka litukiso zeo, Moya o Kenile n'o bonisa hande kuli nzila ye ya mwa Sibaka se si Kenile Hahulu ne i si ka kwalulwa kale, tende ya kwa nde ha i ne i sa inzi cwalo. 9 Se, ki siswaniso se si bonisa za nako ye, mo li inezi. Si talusa kuli limpo ni litabelo za limunanu ze fiwa Mulimu ha li koni ku kenisa pilu ya mulapeli. 10 Li amana feela ni lico, kapa ze nwiwa ni litapelo za ku ikenisa cwalo. Ki milao ye tomezwi ku kenisa mubili , mi ye ka sebeza feela ku fitela nako yeo Mulimu h'a ta lukisa sinca linto kamukana.

11 Kono cwale Kreste u tile, ili Muprisita yo Muhulu wa lika ze nde ze li se li li teñi. Tende y'a sebeza ku yona ki ye tuna hahulu, mi i kondike. Ha i si ka tomiwa ki batu, mi fo kikuli ha si kalulo ye ñwi ya ze bupilwe za lifasi. 12 Kreste h'a il'o kena ki ku inelela mwa Sibaka se si Kenile Hahulu, h'a si ka nga mali a lipuli kapa a manamani ku y'o eza sitabelo, kono u ngile mali a hae mi u lu fumanezi bupilo bo bu sa feli. 13 Batu ba ba silafezi ba hasakiwa ka mali a lipoho ni lipuli ni ka mulola wa mankomwana kuli ba keniswe mwa mibili ya bona.

14 Haiba mali ao a na ni tuso kwa ku kenisa, mali a Kreste bo! Ka Moya o Kenile wa kamita u ikezize sitabelo se si si na fo si nyazahala ku Mulimu. Mali a hae a ka lu lukulula kwa mizamao ya luna ye isa kwa lifu, a tapise maikuto a luna kuli lu kone ku sebeleza Mulimu ya pila.

15 Kabakaleo, Kreste ki yena ya lukisa bulikani bo bunca, kuli ba ba bizizwe ki Mulimu ba fumane matohonolo a sa feli a sepisizwe ki Mulimu. Ze li ta ezahala kakuli ku bile ni lifu le li lukuluzi batu kwa bumaswe bo ba ezize, ha ne ba sa li mwatas'a bulikani bwa pili.

16 Taezo ya ya shwile kamita i tiiswa ki lifu la hae. 17 Taezo ha i na se i talusa haiba ya i ezize u sa pila. I ta ba ni maata feela h'a s'a shwile. 18 Ki kabakaleo ni bona bulikani bwa pili bu bile ni tuso feela ha ku se ku suluzwi mali. 19 Mushe a kala ka ku zibisa pili sicaba bakeñisa litaelo kaufela mo li fumanelwa mwa Mulao. Kih'a nga mali a manamani a kopani ni mezi, mi a hasaka Buka ya Mulao ni batu kamukana ka tupa ya isopa ye tatilwe boya bo bu lombilwe bufubelu.

20 A li: “A, ki mali a tiisa bulikani bw'a mi laezi Mulimu ku bu kuteka.” 21 Kamukwaoswana Mushe a hasa hape mali fa tende ni lika kaufela ze sebeliswa ha ku lapelwa.

22 Ka ku ya ka Mulao, ki niti, i bata i ba lika kaufela li bata ku keniswa ka mali, mi libi li kona ku swalelwa feela ha ku sululwa mali.

 

Sitabelo sa Kreste si zwisa libi

23 Lika ze, ze likanyisa ze kwa lihalimu, ne li lukela ku keniswa ka mukwa wo. Kono za kwa lihalimu kasibili li swanelwa ki litabelo ze nde hahulu ku fita zeo. 24 Kreste h'a si ka kena mwa sibaka se si kenile se si ezizwe ki batu, ili siswaniso sa sibaka se si kenile sa niti. Kono u ile kwa lihalimu luli, kw'a itahaisa cwale ku Mulimu kabakala luna. 25 Muprisita yo muhulu wa Majuda n'a kena mwa Sibaka se si Kenile Hahulu ka silimo ni silimo ni mali a limunanu. Kono Kreste h'a si ka kena, ku ikeza sitabelo hañata. 26 Kabesicwalo, kabe u nyandile hañata, ku kalela kwa simuluho ya lifasi. Kono u bonahezi hañwi, ili cwale, mi ki lona lwa pili ni lwa mafelelezo, linako ha li se li ya li fela, ku t'o zwisa sibi ka ku ikeza sitabelo i li yena. 27 Mañi ni mañi u swanezi ku shwa hañwi feela, mi mwamulaho, kihona a ta atulwa ki Mulimu. 28 Kamukwaoswana, Kreste ni yena u ezizwe sitabelo hañwi, ku zwisa libi za ba bañata. U ta bonahala lwa bubeli, isiñi ku t'o zwisa sibi, kono ili ku t'o pilisa ba ba mu libelezi.

 

10

1 Mulao wa sijuda ha si siswaniso se sinde sa lika mo li inezi. Ki poniso feela, ye sa bonahali hande, ya ze nde ze sa taha. Ha u koni ku eza batu ba ba sutelela ku Mulimu kuli ba fetuhe ba ba lukile. N'o ka kona cwañi ku ba eza ba ba lukile ka litabelo zeo ze swana kamita, ze eziwa ka mwaha ni mwaha, ze sa feli. 2 Haiba batu ba ba lapela Mulimu ne ba ka be ba kenisizwe luli kwa libi za bona, ne ba si ke ba ikutwa kuli ba na ni libi ni hanyinyani, mi litabelo kaufela neli ta fela. 3 Ka mo ku inezi, tuso ya litabelo zeo ki ku hupulisa batu libi za bona ka silimo ni silimo. 4 Kakuli mali a lipoho ni a lipuli h'a koni ku zwisa libi ni kamuta.

5 Ka libaka le, Kreste ha n'a s'a li fakaufi ni ku taha mwa lifasi, a li ku Mulimu:

“Ha u lati litabelo

kapa limpo za limunanu,

kono u ni lukiselize mubili.

6 Ha u tabiswi ki limpo za limunanu

ze ciswa mutumbi fa katala.

kapa litabelo za ku zwisa libi.

7 Cwale na li:

‘Ki na yo, Mulimu.

Ni ya ku y'o eza s'o bata kuli ni si eze,

sina mo ku ñolezwi ka na,

mwa buka ya Mulao.’ “

8 Fa makalelo a li: “Ha u lati, mi ha u tabiswi ki litabelo ni limpo za limunanu, kapa limpo za limunanu ze ciswa mutumbi fa katala, ni litabelo za ku zwisa libi.” A bulela cwalo nihaike litabelo zeo kaufela li eziwa ka Mulao. 9 Cwale kih'a ekeza, a li: “Ki na yo Mulimu. Ni ta eza s'o bata kuli ni si eze.” Mi, Mulimu u feza litabelo za kale kamukana, mi u beya sitabelo sa Kreste mwa libaka za ona. 10 Jesu Kreste u ezize s'a n'a bata Mulimu kuli a si eze. Kabakaleo kaufel'a luna lu keniswa libi ka sitabelo sa mubili wa hae w'a fanile hona foo, hañwi ili lwa mafelelezo.

11 Muprisita kaufela wa yema ka zazi ni zazi ku peta musebezi wa hae, mi u eza hañata litabelo ze swana. Kono litabelo zeo ha li koni ku zwisa libi.

12 Haili Kreste yena, u ezize sitabelo si li siñwi sa libi, ili sitabelo se si na ni maata kuya kuile, mi a y'o ina ku la bulyo la Mulimu.

13 Cwale, u litezi hona ko, ku fitela Mulimu h'a ka beya lila za hae kwatasi inge sipula fo ku hatile mahutu a hae. 14 Kamukwaocwalo, ka sitabelo si li siñwi, u kondisize kuya kuile ba ba kenisizwe kwa libi.

15 Moya o Kenile ni ona u lu fa bupaki bwa hae. Kaniti s'o bulela pili ki se:

16 ”Ki bona bulikani bo ni ta iswala

ni bona mwa mulaho a mazazi ao,

ku bulela Mulena.

Ni ta beya milao ya ka

mwa lipilu za bona.

17 Mi hape a li.

“Ha ni sa na ku hupula libi

ni milatu ya bona.”

18 Cwale, libi ha li se li swalezwi cwana, sitabelo sa ku li zwisa ha si sa batahala.

 

A lu suteleleñi fakaufi ni Mulimu

19 Banabahesu, cwale lu na ni tukelo ye tezi ya ku kena mwa Sibaka se si Kenile Hahulu ka lifu la Jesu. 20 U lu kwalulezi nzila ye nca, ye punya lisila, nzila ye pila ili ona mubili wa hae. 21 Lu na ni Muprisita yo Muhulu ya zamaisa ndu ya Mulimu. 22 A lu suteleleñi fakaufi ni Mulimu, ka lipilu ze sepahala ni ka tumelo ya niti, ka lipilu ze fafalizwe ni ku keniswa kwa maikuto a maswe, ni mibili ye tapisizwe ka mali a mande.

23 Lu kumalele ka tata kwa sepo ye lu paka, kakuli lu kona ku sepa Mulimu kuli u ta buluka lisepiso za hae. 24 A lu babalelaneñi, lu nze lu tusana mwa ku bonisa lilato ni ku eza ze nde. 25 Lu si ke lwa tuhela ku yanga kwa liputeho za luna, ka ku eza si na mo ba ezeza ba bañwi. Bakeñisacwalo lu susuezane hahulu si na ha mu ziba kuli Lizazi la Mulena li se li sutelezi.

26 Haiba lu zwelapili lu nze lu fosa ka bomu ha lu se lu zibile niti, fohe, ha ku sa na sitabelo se si ka zwisa libi. 27 Lu siyalezwi feela ki ku saba se si ka lu tahela, ili katulo ni lyangalilo le li ta bulaya ba ba hanyeza Mulimu.

28 Mutu kaufela ya sa kuteki Mulao wa Mushe u bulayiwa, ku si na makeke h'a atulwa ka bupaki bwa ba babeli kapa ba balalu.

29 Ku ta ba cwañi, ku mutu ya nyaziseza Mwan'a Mulimu, ya keshebisa mali a bulikani bwa Mulimu a' mu kenisize, mi ya nyefula Moya wa sishemo? Mu hupule feela butuna bwa mulatu o' mu swanela!

30 Kakuli lwa mu ziba ya ize: “Ni ta likanyisa. Ni ta kutiseza”.Lwa miziba ya ize. “Mulena u ta atula batu ba hae.”

31 Kinto ye sabisa luli ku wela mwa mazoho a Mulimu ya pila!

32 Mu hupule mo ne mu inezi ka linako ze felile. Mwa mazazi ao, Mulimu h'a s'a mi moneyhezi ka liseli la hae, mu nyandisizwe ki ze ñata, kono ha mu si ka tulwa mwa ndwa yeo. 33 Fokuñwi ne mu shwaulwa patalaza, mwa katazwa, mi mane fokuñwi ne mu itukiseza ku yemela ba ba ne ba eziwa cwalo. 34 Mu ikabezi manyando ni mapantiti, mi ha mu amuhilwe za mina kaufela, mwa lumela ka tabo ku sinyehelwa, kakuli ne mu ziba kuli ne mu na ni bufumu bo bunde hahulu bo mu ka ba ni bona kuya kuile. 35 Mu si ke mwa felelwa ki sepo ya mina, kakuli sepo yeo i ka taha ni mupuzo o mutuna. 36 Mu lukela ku tundamena kuli mu kone ku eza tato ya Mulimu ni ku fumana s'a sepisize. 37 Kakuli, sina mo ku nolezwi.

“Ku sa siyezi nakonyana ye kuswani feela,

mi ya swanezi ku taha, u ka taha.

H'a na ku liyeha.

38 Nihakulicwalo, ya lukile fapil'a ka

u ta pila ka tumelo.

Kono haiba a kutela mwamulaho,

ha ni na ku mu tabela.”

39 Ha lu batu ba ba kutela mwamulaho ni ku lateha. Kono lu na ni tumelo, mi lu mwa nzila ya bupilo.

11

 

Tumelo

1 Ku ba ni tumelo ki ku sepa ka ku tiya ze lu libelezi ni ku kolwa ze sa bonwi. 2 Ki kabakala tumelo ya bona baikale ha ba lumelezwi ki Mulimu.

3 Ki ka tumelo ha lu utwisisa kuli ze bupilwe kaufela li ezizwe ka linzwi la Mulimu, i li kuli ze lu bona, li ezizwe ka ze lu sa koni ku bona.

4 I n'e li tumelo ye ezize kuli Abele a ise sitabelo se sinde ku fita sa Kaine. Ki ka tumelo ya hae Mulimu h'a mu talimile ili mutu ya lukile, kakuli Mulimu kasibili u lumezi limpo za hae. Kabakala tumelo ya hae, Abele u sa bulela nih'a shwile.

5 Ka tumelo Enoke h'a si ka shwa, kono a nanulelwa kwa lihalimu ku Mulimu, mi ha ku na mutu ya konile ku mu fumana, kakuli Mulimu n'a mu isize kwa lihalimu. Mañolo a bulela cwana kuli Enoke, h'a si ka ngiwa kale, n'a tabisize Mulimu.

6 Ha ku na mutu ya ka tabisa Mulimu a si na tumelo. Kakuli ya taha ku Mulimu, u swanezi ku lumela kuli Mulimu u teñi, ni kuli u fa mupuzo ku ba ba mu bata.

7 Ki ka tumelo Nuwe h'a utwile litemuso za Mulimu bakeñisa lika ze ne ka tuha li ezahala ni z'a n'a sa koni ku bona. A mamela litaelo za Mulimu, mi a yaha Aleka mw'a pilezi yena ni lubasi lwa hae kaufela. Ka mukwa wo, a atula lifasi mi, ka tumelo, a ba ya lukile fapil'a Mulimu.

8 I n'e li tumelo ye lumelisize Abrahama, h'a bizwa ki Mulimu, mi a ya kwa naha y'a bizwa ki Mulimu, mi a ya kwa naha y'a n'a mu sepisize Mulimu kuli u ta mu fa yona. A zwa mwa naha ya habo a sa zibi kw'a ya.

9 Ka tumelo a y'o pila mwa naha y'a n'a mu sepisize Mulimu, inge ki muzwahule. A pila mwa matende ni Isaka ni Jakobo ba ba ne ba filwe lisepiso ze swana ki Mulimu.

10 Kakuli Abrahama n'a litezi munzi o lalilwe ni ku tomwa ki Mulimu, ili munzi wa mutomo o tiile.

11 Ki tumelo ye konisize Abrahama ku ba mushemi, niha n'a s'a supezi hahulu, ni yena Sara niha n'a si na lupepo. A sepa kuli Mulimu u ta buluka sepiso ya hae.

12 Niha n'a s'a baliwa kuli u shwile, ku zwile ku munna a li muñwi yo lusika lo luñata inge linaleli za kwa halimu, ni mushabati o' sa baliwi, o' fa likamba la liwate.

13 Batu bao kaufela ba shwezi mwa tumelo. Ha ba si ka amuhela ze ne ba sepisizwe ki Mulimu, kono ba li bonezi kwahule ba nze ba tabile, mi ba bulela patalaza kuli ne ba li bazwahule ni bakozi mwa lifasi.

14 Ba ba bulela litaba ze cwalo, ba bonisa hande kuli ba sa bata naha ye li ya bona. 15 Mihupulo ya bona ha i si ka kutela mwa naha ye ne ba zwile ku yona. Kabesicwalo, kabe ba bile ni nako ya ku kuta. 16 Niti kikuli ne ba shukezi naha ye nde ku fita, ili naha ye kwa lihalimu. Kabakaleo, Mulimu h'a swabi ha ba mu biza Mulimu wa bona, kakuli u s'a ba lukiselize munzi.

17 I n'e li tumelo ye ezisize Abrahama sitabelo ka mwan'a hae Isaka, Mulimu h'a mu lika. Ki yena Abrahama kasibili ya n'a sepisizwe ki Mulimu, kono nihakulicwalo n'a itukiselize ku eza sitabelo ka mwan'a hae a li muñwi feela.

18 Mulimu n'a ize ku yena: “Ki ka Isaka kuli u ta fumana lusika.”

19 Abrahama a hupula kuli Mulimu n'a kona ku zusa mwan'a hae kwa bafu, mi Isaka a kutisezwa ku yena, ka mukwa o batil'o swana ni wa ku zuha kwa bafu.

20 Ki ka tumelo Isaka h'a sepisize Jakobo ni Isau matohonolo bakeñisa bupilo bwa bona bwa kwapili.

21 Ki ka tumelo Jakobo h'a tohonolofalize yo muñwi ni yo muñwi wa bana ba Josefa, a si ka shwa kale. A sikatela fa lutaa lwa hae, mi a lapela Mulimu.

22 Ki ka tumelo Josefa h'a bulela ka ku tuta kwa Maisilaele mwa Egepita, h'a s'a li fakaufi ni kushwa, mi a siya litaelo ka mo ku ta bulukelwa situpu sa hae.

23 Ki ka tumelo bashemi ba Mushe ha ba mu patile likweli ze talu a sa z'o pepwa. Ba bona kuli ne li mwana yo munde hahulu, mi ha ba si ka saba ku hanyeza taelo ya mulena.

24 Ki ka tumelo Mushe h'a hanile ku bizwa muikulu wa Faro h'a s'a hulile.

25 A iketela ku nyanda ni sicaba sa Mulimu bakeñisa ku ikola nakonyana minyaka ya sibi. 26 A nahana kuli ku shubaulwa kabakala Mesia ki ko kutuna hahulu ku fita bufumu bwa mwa Egepita, kakuli meeto a hae n'a talimezi mupuzo o n'o sa taha kwa pili.

27 Ki tumelo ye zwisize Mushe mwa Egepita a sa sabi ku nyema kwa mulena. H'a si ka kutela mwamulaho, inge n'a bona Mulimu ya s'a bonwi.

28 Ki tumelo ye mu ezisize Paseka, ni ku laela kuli mali a sasiwe fa minyako, lingeloi la lifu li si ke la kena ku t'o bulaya baeli ba Maisilaele.

29 Ki tumelo ye konisize Maisilaele ku sila Liwate le Lifubelu, inge fo ku omile. Kanti Maegepita, ha ba li ba ba likanyise, ba mina kaufel'a bona.

30 Ki tumelo ye wisize mamota a Jeriko, Maisilaele ha ba se ba u potolohile mazazi a supile.

31 Ki tumelo ye pilisize Rahaba wa lihule. H'a si ka shwa ni ba ba ne ba hanyeza Mulimu, kakuli n'a amuhezi hande litwela.

32 Kana ni ka zwelapili? Ha ni sa na nako ya ku bulela ka bo Gidoni, ni Baraki ni Samisoni, ni Jafita, ni Davida, ni Samuele, ni bapolofita.

33 Ka tumelo ba hapile manaha, ba ezize se si lukile, mi ba fumani s'a n'a sepisize Mulimu. Ba kwalile milomo ya litau.

34 Ba timile mililo ye sabisa, mi ba bandukile kwa ku bulayiwa ka malumo. Ba ne ba si na maata, kono ba tiya. Ba ba lindume mwa lindwa, mi ba tula makolo a bazwahule.

35 Ka tumelo basali ba zusezwa bafu ba bona.

 Ba bañwi ba bulaiwa ka ku nyandiswa. Ba hana ku fumana tukuluho, i li kuli ba zuhele bupilo bo bunde ku fita. 36 Ba bañwi hape ba sheununwa ni ku natiwa, mi ba bañwi ba tamiwa ni ku kenywa mwa litolongo.

37 Ba pobaulwa ka macwe, ba sahiwa libindi zepeli, mi ba bulayiwa ka sabule. Ba zamaya ba tinile matalo a lingu ni a lipuli, ili babotana ba ba zumiwa, ba ba nyandiswa.

38 Lifasi ne li sa ba swaneli batu bao! Ne ba yambaela mwa naheñi ni mwa mahaha ni misima.

39 Batu bao kaufela ba pakilwe hande ka tumelo ya bona. Kono nihakulicwalo ha ba si ka fumana s'a n'a sepisize Mulimu. 40 Niti kikuli Mulimu, ka ku hupula luna, n'a na ni mulelo o munde ku fita, i li kuli ba si ke ba fumana mbuyoti ya bupilo sakata, luna lu siyo kwateñi.

12

 

Mulimu Ndat'a luna

1 Haili luna, lu potolohilwe ki lipaki zeo ze ñata ñata. Hakulicwalo, lu zwise ze lu imela mwa nzila, ni sibi se si lu kumalezi ka tata, mi lu mate ka ku tiya mwa siyano ye lu li ku yona. 2 Lu lubukele feela Jesu, kakuli ki ku yena fo lu tomile tumelo ya luna ku zwa kwa makalelo ku y'o fita kwa mafelelezo. H'a si ka zwafa kabakala sifapahano, kakuli n'a libelezi tabo ye ka mu tahela, h'a si ka isa pilu kwa maswabi a ku shwela fa sifapahano. Mi cwale, u inzi ku la bulyo la lubona lwa Mulimu.

3 Mu mu hupule! Mu hupule ni mw'a itiiselize h'a n'a lwaniswa ki baezalibi. Mi ni mina cwalo mu si ke mwa katala kapa kuzwafa. 4 Kakuli mwa ndwa ya mina ni sibi, ha mu si ka fita kale fa nako ya ku lwanela ku bulayiwa. 5 Kana mu se mu libezi manzwi a tiisa pilu ao Mulimu a bulela ku mina inge kwa bana ba hae? U ize:

“Mwan'a ka, mamela

Mulena h'a kushapa,

mi u si ke wa zwafa h'a ku kalimela.

6 Kakuli Mulena u kalimela y'a lata kaufela,

mi u shapa y'a talima

ili mwan'a hae kamukana.”

7 Mu itiise mwa butata. Mu bu talime i li kalimelo ya mushemi, kakuli manyando a mina a bonisa kuli Mulimu u mi sweli sina bana ba hae. Kana u kile a ba teñi mwana ya si ka kalimelwa ki ndat'ahe? Batili! 8 Haiba mu sa kalimelwi sina mo ba kalimelwa bana ba hae kaufela, libaka kikuli mu bana ba muendakumongo, isiñi bana ba hae luli. 9 Bo ndat'a luna ba ba lu pepile ne ba lu kalimela, mi ne lu ba kuteka. Hakulicwalo lu swanezi ku ipeya hahulu ni ku fita kwatas'a Ndat'a luna ya kwa lihalimu kuli lu pile! 10 Bo ndat'a luna ne ba lu kalimela nakonyana feela sina mo ne ba bonela kuli ne ku lu lukela. Kono Mulimu u eza cwalo ku lu tusa kuli lu be ni kabelo kwa ku kena kwa hae. 11 Nako ye lu kalimelwa ka yona, lu fumana kuli kalimelo ki nto ye swabisa, ye sa tabisi. Kono kwapili, bona bao ba ba kalimezwi ba kutula mupuzo o' tahiswa ki kalimelo, ili kozo ni bupilo bo bu lukile.

 

Litaelo ni likelezo

12 Cwale mu nanule mazoho a mina a lepelela, mi mu tiise mañwele a mina a sina maata!

13 Mu zwelepili mu nze mu zamaya mwa linzila ze otolohile, kuli lihutu la sihole li si ke la palelwa kono li foliswe.

14 Mu like ku pila ka kozo ni batu kaufela, mi mu like ku pila bupilo bo bu kenile, kakuli ya si na bona h'a na ku bona Mulena. 15 Mu tokomele kuli mwahal'a mina ku si ke kwa ba ni ya ka fetuhela sishemo sa Mulimu. Mu tokomele kuli ku si ke kwa ba ni ya swana sina simela se si baba, se si mela ni ku tahisa kozi kwa batu ba bañata ka sifanu sa sona.

16 Mu tokomele kuli ku si ke kwa ba ni ya pila ka buhule, kamba ya si na taba ni za Mulimu sina Isau, ya n'a lekisize litukelo za buhulu bwa hae ka mulalelo u li muñwi.

17 Mwa ziba kuli mwamulaho, a bata ku fumana mbuyoti ku ndat'ahe. Kono a lelekwa, kakuli n'a ezize, nih'a n'a si bata ka meeto a mafubelu.

18 Ha mu si ka sutelela fakaufi ni linto ze swana sina lilundu le li ca mulilo, kapa ku sabiswa ki lififi le linsu suu , kapa ñuli, sina ba sicaba sa Isilaele kwa lilundu la Sinai.

19 Ba utwa ni lilata la tolombita ni mulumo wa linzwi. Ha ba utwa linzwi leo ba kupa kuli ba si ke ba li utwiswa hape. 20 Ne ba kaleliswa ki taelo yeo, ye li: “Sibupiwa sifi kapa sifi se si ka ngunyuta lilundu, niha i ka ba folofolo, si swanezi ku pobaulwa ka macwe, si bulayiwe.”

21 I n'e li pono ye ne sabisa hahulu hulu, mane Mushe a li: “Mawee, na saba, mane na ngangama!”

22 Nihakulicwalo mu tile kwa lilundu la Sione, kwa munzi wa Mulimu ya pila, kwa Jerusalema wa kwa lihalimu, ni likiti-kiti za mangeloi a ona. 23 Mu tile kwa mukopano wa tabo wa baeli ba Mulimu, bao mabizo a bona a ñozwi kwa lihalimu. Mu tile ku Mulimu, yena muatuli wa batu kaufela, ni kwa mioya ya batu ba ba lukile, ba ba se ba petehile. 24 Mu tile ku Jesu ya lukisize bulikani bo bunca, ni kwa mali a hasizwe, a' bulela ze nde hahulu ku fita za mali a Abele.

25 Mu tokomele, mi mu si ke mwa hana ku teeleza ya bulela! Ba ba hanile ku teeleza ya n'a ba fa litemuso ka libizo la Mulimu, mwa lifasi, ha ba si ka banduka. Luna lu ta banduka cwañi, haiba lu fulalela ya bulela ni luna a li kwa lihalimu!

26 Muta wani, linzwi la hae ne li sa koni ku nyanganyiswa, kono cwale u sepisize, a li: “Ni ta nyanganyisa hape i si lifasi feela, kono ni lihalimu cwalo.”

27 Ha kutwi “Hape” ku lu bonisa hande fo ku sweu kuli ze bupilwe kaufela li ta nyanganyiswa ni ku zwiswa, i li kuli ze sa nyanganyiswi li siyale cwalo.

28 A lu itumeleñi, kakuli lu se lu fumani mubuso o si ke wa nyanganyiswa. Lu bonise buitumelo bwa luna mi lu sebeleze Mulimu ka mukwa o' ka mu tabisa, ka likute ni sabo. 29 Kakuli kaniti Mulimu wa luna ki lubya lo lu ciseleza.

 

13

 

Mw'a tabisezwa Mulimu

1 Mu latane sina bana ba mba i liñwi. 2 Mu hupule ku amuhela baenyi mwa mandu a mina. Ku na ni ba ba ezize cwalo, mi ba amuhezi mangeloi ba sa zibi.

3 Mu hupule ba ba li mwa tolongo, inge ni mina mu mwa tolongo ni bona. Mu hupule ba ba mwa manyando, inge ni mina mu mwa manyando ni bona.

4 Linyalo li kutekiwe ki batu kaufela, mi banna ni basali ba sepahale yo muñwi ku yo muñwi, kakuli Mulimu u ta atula mahule ni babuki.

5 Mu ipuluke kwa ku lata hahulu mali, mi mu itumele ka se mu na ni sona, kakuli Mulimu u ize: “Ha ni na ku ku siya ni kamuta. Ha ni na ku ku tuhela.”

6 Hakulicwalo, lu kona ku bulela ka sepo.

“Mulena ki mutusi wa ka.

Ha ni na kusaba!

S'a ta ni eza mutu ki sika mañi?”

7 Mu hupule bazamaisi ba mina ba pili, ba ba mi bulelezi litaba za Mulimu. Mu hupule mo ne ba pilela ni mo ba shwezi, mi mu likanyise tumelo ya bona. 8 Sina mw'a n'a inezi maabani, Jesu Kreste u sa li cwalo ni kacenu, mi u ta ba cwalo kuya kuile. 9 Lituto li sili, za mifuta futa, li si ke za mi kelusa mwa nzila ya niti. Ki ko kunde kuli pilu ya luna i matafazwe ki sishemo sa Mulimu, isiñi ku matafazwa ki milao ye amana ni lico. Ba ba zamaile ka milao ye cwalo ha i na se i ba tusize.

10 Baprisita ba ba sebeza mwa tende ya sijuda ha ba na tukelo ya kuca litabelo za fa aletare ya luna. 11 Muprisita yo muhulu wa Majuda u tisa mali a limunanu mwa Sibaka se si Kenile Hahulu inge litabelo za ku swalela libi. Kono mibili ya zona i cisezwa kwa mandamino a mafulo.

12 Ka lona libaka leo, Jesu ni yena u shwezi kwa mandamino a munzi, i li kuli a tapise libi za batu ka mali a hae. 13 A lu yeñi ku yena, kwa mandamino a mafulo, lu y'o ikabela maswabi a hae. 14 Kakuli ha lu na munzi o tiile mwa lifasi mo. Lu sa talimezi munzi o' sa taha. 15 Ka nako ni nako lu lumbe Mulimu, Litumbo za luna li be inge sitabelo sa luna, ka Jesu, kikuli lu lumbeke nako kaufela libizo la hae ka milomo ya luna. 16 Mu si ke mwa libala ku eza ze nde, ni ku tusana mwahal'a mina, kakuli ao ki ona matabelo a tabisa Mulimu.

17 Mu kuteke bazamaisi ba mina, mi mu latelele litaelo za bona. Ba libelezi mioya ya mina ba sa pumuli, kakuli ba swanezi ku fa Mulimu bupaki bwa musebezi wa bona. Haiba mu latelela litaelo za bona, ba ta eza musebezi wa bona ka tabo. Hakusicwalo, ba ta u eza ba nze ba swabile, mi ne ku si ke kwa mi tusa se siñwi.

18 Mu n'o lu lapelelanga. Kaniti lu ziba kuli lizwalo la luna ki le linde, kakuli lu bata ku eza ze lukile ka nako kaufela. 19 Mi se ni kupa hahulu hulu ku mina kikuli mu ni lapelele ku Mulimu kuli a ni kutiseze kapili ku mina.

 

Tapelo

20 Mulimu u zusize kwa bafu Mulen'a luna Jesu, ya li Mulisana yo Mutuna wa lingu kabakala lifu la hae leo ka lona u tiisize bulikani bo bu sa feli. 21 Cwale yena Mulimu wa kozo, a mi fe ze nde ze mu tokwa kaufela kuli mu kone ku eza se si latwa ki yena. Ka Jesu Kreste a ikezeze ku luna ze mu tabisa. Kanya i iswe ku Kreste kuya kuile! Amen.

 

Manzwi a mafelelezo

22 Banabahesu, ni kupa kuli mu teeleze ka tokomelo manzwi a, a' mi kutaza, kakuli ze ni mi ñolezi mwa liñolo le, ha si ze telele hahulu. 23 Ni mi zibisa kuli mwanahabo luna, yena Timotea, u zwile mwa tolongo. Haiba a ka fita kapili ni ka taha ni yena ha ni t'o mi bona.

24 Mu fitise litumeliso za ka kwa bazamaisi ba mina ni kwa batu ba Mulimu kaufela. Banabahabo luna ba mwa Italia ba mi lumelisa.

25 Sishemo sa Mulimu si be ni mina kaufela.