MRK LO42.SFM 27/10/2003 L.L.M. LOZI ST1 MONGU ZAMBIA

MAREKA

EVANGELI YA

MAREKA

 

Ze lutilwe ki Joani Mukolobezi

(Mat. 3.1-12; Luk. 3.1-18; Joa. 1.19-28)

 

1

1 Ki ze Litaba ze Nde ze talusa za Jesu Kreste, Mwan'a Mulimu. 2 Li kalilwe sina mo ku ñolezwi ki mupolofita Isaya mwa buka ya hae, h'a li:

“ ‘Bona, ni luma numwana wa ka

fapil'a hao, ku ku lukiseza nzila,’

ku bulela Muñ'a Bupilo.

3 Ki linzwi la mutu ya huweleza mwa naheñi:

‘Mu bakanye mukwakwa wa Mulena.

Mu otolole linzila za hae!’ “

4 Cwale Joani a bonahala mwa naheñi, a kolobeza ni ku kutaza batu a nz'a li: “A mu bake, mu kolobezwe, mi Muñ'a Bupilo u ta swalela libi za mina.” 5 Mi batu kamukana ba naha ya Judea ni ba munzi wa Jerusalema ne ba taha ku yena. Ba ipulela libi za bona fapil'a nyangela, mi Joani n'a ba kolobeza mwa Nuka ya Jordani.

6 Joani n'a apalanga siapalo sa boya bwa kamele ni lukanda lwa litalo mwa teka. N'a pila nzie ni linosi la mwa naheñi.

7 Mi n'a kutaza batu, a li: “Wa taha mwamulaho wa ka ya ni fita kwa maata, ye ni sa lukeli nihaiba ku sutelela ni ku tamulula makatulo a hae. 8 Na, ni mi kolobeza ka mezi feela, kono yena u ta mi kolobeza ka Moya o Kenile.”

 

Jesu wa kolobezwa ni ku likwa

(Mat. 3.13-17; 4.1-11; Luk. 3.21-23; 4.1-13)

9 Ka yona nako yeo, Jesu a zwa mwa Nazareta, munzi wa mwa naha ya Galilea. A t'o kolobezwa ki Joani mwa Jordani. 10 Jesu a sa omboka feela, a bona lihalimu li kwaluluha mi Moya wa shulumukela ku yena inge liiba. 11 Kwa utwahala linzwi le li zwa kwalihalimu, le li li: “Ki wena Mwan'a ka ye ni lata, ye ni katelwa.”

12 Kapili-pili, Moya wa Mulimu wa mu isa mwa naheñi. 13 A ina mazazi a mashumi a mane mwateñi, mi a likwa ki Satani. N'a pila mwahal'a lifolofolo za mwa naheñi, mi mangeloi n'a mu sebeleza.

 

Jesu u biza mandui ba bane

(Mar. 4.12-22; Luk. 4.14-15; 5.1-11)

14 Joani ha s'a kenyizwe mwa tolongo, Jesu a ya mwa Galilea, mi a bulela patalaza Litaba ze Nde za Muñ'a Bupilo. 15 N'a li: “Nako ye ne tomilwe i fitile, mi Mubuso wa Mulimu u s'o li fakaufi! A mu bakele libi za mina, mi mu lumele Litaba ze Nde za Mulimu!”

16 Jesu ha n`a nz'a kulisa Lisa la Galilea, a bona mandui ba babeli, bo Simoni ni Andreasi munyan'a hae, ba yamba ka tunyandi mwa lisa. 17 Jesu a li ku bona: “Mu ni latelele, mi ni ta mi luta mo ku yambelwa batu.” 18 Kapili-pili, ba siya tunyandi twa bona, mi ba mu latelela.

19 Kwapilinyana, a bona Jakobo ni munyan'a hae Joani, bana ba Zebedea, ba ne ba li mwa mukolo, ba nze ba onga tunyandi twa bona. 20 A sa ba bona feela, Jesu a ba biza, mi kapili ba siya ndat'a bona, Zebedea, mwa mukolo ni babeleki, ba mu latelela.

 

Ya kenwi ki moya o maswe wa foliswa

(Luk. 4.31-37)

21 Ba ya mwa munzi o bizwa Kapernauma. Ka Lizazi la Pumulo, Jesu a kena mwa sinagoge, mi a kala ku luta. 22 Ba ba ne ba mu teeleza ne ba komokiswa ki mukwa w`a n'a luta ka ona, kakuli n'a ba luta ka maata, isiñi ka mukwa wa baluti ba Mulao.

23 Ka yona nako yeo, mutu ya n'a kenwi ki moya o maswe a kena mwa sinagoge. A huwa, a li: 24 ”U na ni taba mañi ni luna, Jesu wa Nazareta? Kana u til'o lu timeza! Na ku ziba. Ki wena Ya Kenile ya lumilwe ki Mulimu!” 25 Jesu a kalimela moya o maswe, a li: “Kuza! U zwe ku yena!” 26 Moya o maswe kiha u mu wiseza fafasi ka tata, mi wa zwa ku yena inz'a huwa hahulu. 27 Batu kaufela ba ba ne ba li teñi, ba komoka hahulu-hulu, ba buzana, ba li: “Se si ezahala kiñi? Ki tuto ye nca, ye na ni maata! Mutu yo u laela ni mioya ye maswe, mi ya mu utwa!” 28 Mi kapili libubo la Jesu la hasanela kai ni kai mwa naha ya Galilea.

 

Jesu u folisa bakuli ba bañata

(Mat. 8.14-17; Luk. 4.38-41)

29 Ba zwa mwa sinagoge, mi ba akufela kwa ndu ya Simoni ni Andreasi, hamoho ni Jakobo ni Joani.

30 Mukwenyan'a Simoni n'a lobezi, a kula fibele, mi Jesu a sa fita feela ba mu taluseza za butuku bo. 31 A sutelela ku yena, a mu swala fa lizoho, mi a mu yemisa. Fibele ya mu tuhela, mi a kala ku ba lukiseza lico.

32 Ka swalala, batu ba tisa bakuli ba bona ku Jesu mane ni ba ba ne ba kenwi ki mioya ye maswe. 33 Batu kamukana ba t'o kubukana fapil'a munyako. 34 Jesu a folisa ba bañata ba ba ne ba kula matuku a mifuta-futa. A lelekisa ni mioya ye maswe ka buñata. N'a hanisa mioya yeo ku bulela se siñwi kakuli ne i mu ziba kuli ki yena mañi.

 

Jesu u zamaya mwa Galilea

(Luk. 4.42-44)

35 Habusa i sa li malungasiku, Jesu a zuha mi a zwa mwa ndu. A ya mwa naheñi ku y'o lapela. 36 Simoni ni mizwale ya hae ba y'o mu bata. 37 Ha ba se ba mu fumani, ba mu bulelela, ba li: “Batu kaufela ba ku bata.” 38 Kono Jesu a li ku bona: “Kambe lu ya kusili, mwa minzi ye fakaufi. Ni swanezi ku y'o luta ku yona, kakuli ki sona se ni tezi.” 39 Mi a zamaya mwa naha ya Galilea kaufela, a luta mwa masinagoge, ni ku leleka mioya ye maswe.

 

Jesu u folisa wa mbingwa

(Mat. 8.1-4; Luk. 5.12-16)

40 Mutu ya n'a kula mbingwa a taha ku Jesu, a t'o kubama fapil'a hae, a mu lapela, a li: “Ha u lata, wa kona ku ni kenisa.” 41 Jesu a mu shwela makeke. A otolola lizoho, a mu swala, mi a li ku yena: “Na lata! U kene!” 42 Honafo, mbingwa ya mutu yo ya fela, mi a keniswa. 43 Cwalehe, Jesu a mu kutiseza kw'a n'a zwa, kono pili a mu laela ka maata, a li: 44 ”Utwa! U si ke wa bulelela mutu se siñwi ka nto ye, kono u y'o iponisa ku muprisita kuli a ku tatube, mi u zwise mpo ye laezwi ki Mushe ku kolwisa batu kaufela kuli u kenile.”

  45 Kono, mutu yo a zamaya a hasanya litaba zeo kai ni kai. Kabakaleo, Jesu n'a palelwa ku kena mwa minzi patalaza. N'a inanga kwa mukunda, kono batu kamukana ne ba tahanga ku yena, ba zwa kwa maneku kaufela.

2

 

Jesu u folisa ya omelezi luñañali

(Mat. 9.1-8; Luk. 5.17-26)

1 Mwamulaho a mazazinyana, Jesu a kutela kwa Kapernauma, mi taba ya hasana kuli s'a li kwa hae. 2 Ba kubukanela kwateñi ka buñata, mane kwa pitihana mwa ndu ni fapil'a munyako. Jesu n'a nz'a ba bulelela za Muñ'a Bupilo. 3 Kiha ku se ku taha batu ba ba mu tiseza mutu ya omelezi luñañali, a lwezwi ki banna ba bane. 4 Kabakala buñata, ba palelwa ku mu fitisa ku Jesu. Cwale kiha ba pahama fa situwa, mi ba punya lisuba ku libana ni f'a n'a inzi Jesu. Ha ba se ba punyize, ba shetumuna mukuli a nz'a lobezi fa bulobalo bwa hae. 5 Jesu h'a bona butuna bwa tumelo ya batu bao, a bulelela mukuli, a li: “Mwan'a ka, libi za hao li swalezwi!” 6 Baluti ba bañwi ba Mulao, ba ba ne ba inzi mo, ba hupula mwa lipilu, ba li: 7 ”Yo, kiñi h'a bulela cwalo? Wa nyefula! Ya kona ku swalela libi ki mañi, konji Mulimu feela a nosi?” 8 Kapili Jesu a lemuha minahano ya bona. Kih'a li ku bona: “Kiñi ha mu nahana ze cwalo mwa lipilu za mina? 9 Kana se si bunolo ki sifi: Ku bulelela ya omelezi luñañali kuli: ‘Libi za hao li swalezwi’ kapa ku mu bulelela kuli: ‘Yema, u nge bulobalo bwa hao, mi u zamaye’? 10 Ni ta mi bonisa kuli na, Mwan'a Mutu, ni na ni maata a ku swalela libi mwa lifasi! Cwale ni bulelela mukuli yo: 11 ”kuli:’ Yema! U nge bulobalo bwa hao, mi u ye kwa hae! 12 Honafo, batu kaufela ba sa mu talimezi, mutu yo a yema, a nga bulobalo bwa hae, mi a zamaya. Kaufel'a bona ne ba komokile maswe mi ba lumba Mulimu, ba li: “Lwa li ku ba lu sa boni taba ye cwana!”

 

Jesu u biza Livi

(Mat. 9.9-13; Luk. 5.27-32)

13 Jesu a kutela hape kwa munanga wa Lisa la Galilea. A t'o kubukanelwa ki batu ba bañata, mi a kala ku ba luta. 14 Mwa nzila, a bona Livi, mwan'a Alfea, a inzi mwa ofisi ya mutelo. A li ku yena: “Ni latelele!” Livi a yema, a mu latelela.

15 Kasamulaho, Jesu a ca lico mwa ndu ya Livi. Ne ku na ni batelisi ni baezalibi, ba t'o ca ni yena ni balutiwa ba hae, fa tafule. 16 Cwale, baluti ba bañwi ba Mulao, ili Bafalisi, ba bona kuli Jesu n'a ca ni ba ba maswe ni batelisi. Ba buza balutiwa ba hae, ba li: “Kikabakalañi h'a ca ni batelisi ni ba ba maswe cwalo?” 17 Jesu a ba utwa, mi a ba alaba, a li: “Ba ba pila hande ha ba bati ñaka. I batwa ki ba ba kula. Ha ni si ka t'o biza ba ba lukile, kono ni til`o biza baezalibi.”

 

Puza bakeñisa mukwa wa ku itima lico

(Mat. 9.14-17; Luk. 5.33-39)

18 Ka zazi le liñwi, balutiwa ba Joani Mukolobezi ni Bafalisi ne ba itima lico. Batu ba bañwi kiha ba t'o buza Jesu, ba li: “Kikabakalañi balutiwa ba Joani Mukolobezi ni balutiwa ba Bafalisi ha ba itimanga lico, kono ba hao ha ba ezi cwalo?” 19 Jesu a ba alaba, a li: “Kana mu hupula kuli ba ba memilwe kwa sinawenga ba ka itima lico munyali a nz'a inzi ni bona? Batili! Ka nako kaufela ha ba na ku itima lico munyali a nz'a inzi ni bona. 20 Kono, nako i ka taha munyali h'a ta zwiswa ku bona. Lizazi leo, kihona ba ta tola ni tala!

21 ”Ha ku na mutu ya ka lukela simanahani se sinca fa siapalo sa kale. H'a ka eza cwalo, simanahani se sinca si ka pazula siapalo sa kale, mi lisuba li ka ba le lituna ku fita pili. 22 Mi hape, ha ku na mutu ya sela bucwala bwa matutwa mwa lihwana za kale ze tibilwe hahulu. H'a ka eza cwalo, bucwala bu ka li pazula, mi lihwana ni bucwala li ka sinyeha kaufel'a zona. Batili, bucwala bo bunca bu be mwa lihwana ze nca!”

 

Puzo bakeñisa Lizazi la Pumulo

(Mat. 12.1-8; Luk. 6.1-5)

23 Ka zazi le liñwi, ili la Pumulo, Jesu n'a zamaya mwahal'a masimu a mabele. Mwa nzila, balutiwa ba hae ba kala ku loba makunka ni ku bubula bubeke.

24 Bafalisi kiha ba buza Jesu, ba li: “A ku bone, kikabakalañi balutiwa ba hao ba eza se si sa lumelelwi ki Mulao wa luna ka Lizazi la Pumulo?”

25 Jesu a ba alaba, a li: “Kikuli ha mu si ka bala se ne si ezizwe ki Davida zazi le liñwi ha n'a shwile tala ni b`a n'a zamaya ni bona? 26 N`a keni mwa ndu ya Mulimu, mi a ca kwa mahobe a n'a beezwi Mulimu. Zeo za ezahala Abiatare ha n'a li muprisita yo muhulu. Ka Mulao wa luna, ki baprisita feela ba ba lumelelwa ku ca mahobe ao. Kono Davida a ca kwateñi, mane a fa ni b`a n'a zamaya ni bona!”

27 Jesu kih'a li ku bona: “La Pumulo li tomezwi ku tusa mutu, ha si mutu ya ezelizwe la Pumulo. 28 Hakulicwalo na, Mwan'a Mutu, ni Mulena mane ni la Pumulo.”

3

 

Jesu u folisa mutu wa lizoho le li omelezi

(Mat. 12.9-14; Luk. 6.6-11)

1 Jesu a kutela hape kwa sinagoge. Mwateñi, ne ku na ni mutu wa lizoho le li omelezi. 2 Ba ba ne ba li teñi, ne ba talimisisa Jesu kuli ba bone kapa n'a ka folisa mutu yo ka Lizazi la Pumulo, kakuli ne ba bata ku mu tama litaba. 3 Jesu a bulelela mutu wa lizoho le li omelezi, a li: “Yema fapil'a nyangela.” 4 Kih'a buza nyangela, a li: “Kana Mulao wa luna u lu lumelela ku eza sifi ka Lizazi la Pumulo, ku eza hande kapa ku eza maswe, ku pilisa mutu kapa ku mu bulaya?” Kono ba kuza feela. 5 Jesu a ba talima ka buhali. N'a swabile hahulu kabakala ku sa utwisisa kwa bona. A li ku mutu yo: “Otolola lizoho la hao?” A li otolola, mi la fola. 6 Cwale Bafalisi ba zwa mwa sinagoge mi ba y'o kopana kapili ni ba sitopa sa Heroda. Ba lelisana ka mukwa o ba ka bulaya Jesu ka ona.

Buñata bu taha ku Jesu kwa Lisa la Galilea

7 Jesu a ikela ni balutiwa ba hae kwa Lisa la Galilea, mi batu ba bañata ba mu latelela. Ne ba zwa kwa Galilea ni kwa naha ya Judea. 8 Ne ba zwa mwa Jerusalema, kwa naha ya Idumea ni naha ye mwabuse bwa Jordani, ni mwa libaka ze fakaufi ni minzi ya Tire ni Sidoni. Buñata bo bwa batu bwa taha ku Jesu ka ku utwa z`a n'a eza. 9 Jesu a kupa bulatiwa ba hae kuli ba mu lukiseze mukolo nyangela i si ke ya mu pitihanyeza.

10 N`a sa folisize ba bañata, mi bakuli kamukana ne ba isundiliketa ku yena kuli ba mu ngunyute. 11 Mi, kamita mioya ye maswe ha ne i mu bona, ne i welanga kwa mahutu a hae, i nze i huwa, ili: “Wena, u Mwan'a Mulimu!” 12 Kono Jesu na i kalimelanga ka tata kuli i si ke ya mu zibahaza.

 

Jesu u keta Baapositola ba lishumi ka ba babeli

(Mat. 10.1-4; Luk. 6.12-16)

13 Cwale Jesu a kambamela fa lilundu. A biza batu b'a n'a tokwa kaufela, mi ba taha ku yena. 14 Kih'a keta ba lishumu ka ba babeli, mi a ba fa libizo la baapositola. A ba bulelela, a li: “Ni mi ketezi kuli mu t'o ina ni na. Ni ta mi lumanga ni mina kuli mu y'o kutaza. 15 Mi ni ta mi fa maata a ku leleka mioya ye maswe.” 16 Ba lishumi ka ba babeli b`a n'a ketile ki bao. Ki Simoni, mi Jesu a mu beya libizo la Pitrosi. 17 Ki Jakobo ni munyan'a hae Joani, ili bana ba Zebedea mi Jesu a ba fa libizo la Bonanergesi, kikuli Batu ba Mushika. 18 Ki Andreasi, ni Filipi, ni Bartolome, ni Mateu, ni Tomasi. Ki Jakobo mwan'a Alfea, ni Tadea, ni Simoni Mukanana, 19 Mi ki Judasi Isikariota, ili yena ya kile a beteka Jesu.

 

Bahabo Jesu ba bata ku mu nga

20 Cwale, Jesu a kutela kwa hae. Batu ba t'o kubukanela ku yena ka buñata, mane ba mu paleliswa ku ca lico, yena ni balutiwa ba hae cwalo. 21 Bahabo Jesu ha ba utwa zeo, ba bata ku t'o mu nga kakuli batu ne ba li: “S'a lyangani!”

 

Jesu u alaba ba ba mu tama litaba

(Mat. 12.22-32; Luk. 11.14-23; 12.10)

22 Baluti ba bañwi ba Mulao, ba ba ne ba zwa mwa Jerusalema, ne ba li: “U mwa maata a mulen'a mioya ye maswe ye bizwa Beelzebule, ili yena Satani!” Hape ne ba li: “Ki yena ya mu fa maata a ku i leleka!”

23 Cwale Jesu a biza batu, mi a ba bulelela ka linguli, a li: “Satani u kona cwañi ku iteleka ili yena? 24 Mubuso ha u koni ku tiya, batu ha ba fapahani, mi ba lwanisana. 25 Ba ndu iliñwi ha ba lwanisana, ndu yeo ha i na ku tiya. 26 Kamukwaocwalo, Satani h'a itwanisa, mubuso wa hae ha u kauhana, ha u na ku ina. U ta fela.

27 ”Ha ku na mutu ya ka kona ku kena mwa ndu ya muhali kuli a sinye libyana za hae, ni ku ikungela zona, konji h'a kala pili ku tama muhali yo. Ki hona a ka kona ku li nga.

28 ”Kaniti, na mi bulelela kuli batu ba kona ku swalelwa libi ni linyefulo za bona kaufela.

29 Kono mutu ufi kamba ufi ya ka nyefula Moya o Kenile, yo h'a na ku swalelwa kuya kuile, kakuli u ta ba ni mulatu wa sibi se si sa feli.”

30 Jesu n'a bulela cwalo kakuli ne ba ize: “U na ni moya o maswe.”

 

M'ahe Jesu ni lubasi lwa habo

(Mat. 12.46-50; Luk. 8.12-21)

31 M'ahe Jesu ni lubasi lwa habo ba fita. Ba t'o yema fande, mi ba luma mutu ku y'o mu biza. 32 Batu ba bañata ne ba inzi, ba mu beile mwahali. Ba mu bulelela, ba li: “Bona, m'aho ni bahenu ki ba, fande, mi ba ku bata.” 33 Jesu a ba alaba, a li: “Me ki mañi, mi bahesu ki bo mañi?” 34 Kih'a talima ba ba mu tingulukile, a li: “Mwa utwa! Bona ba, ki bona boma ni lubasi lwa hesu! 35 Ya eza se si latwa ki Mulimu, ki yena munyan'a ka, ni kaizel'a ka, ni bo ma!”

4

 

Nguli ya mucali

(Mat. 13.1-9; Luk. 8.4-8)

1 Jesu a kala ku luta hape fa munanga wa Lisa la Galilea. Kabakala buñata bwa batu ba ba til'o kubukana ku yena, a longana mwa mukolo, mi a ina mwateñi. Ba fuula hanyinyani, mi nyangela, yona, ya siyala fa likamba.

2 Kiha s'a ba luta ze ñata ka linguli, mi mwa tuto ya hae a li ku bona: 3 ”A mu teeleze! Mulimi yo muñwi n'a ile ku y'o cala. 4 H'a nz'a hasa peu mwa simu, peu ye ñwi ya wela mwa nzila, mi ya ciwa kapili ki linyunywani. 5 Ye ñwi ya wela mwa macwe mo ne ku si na mubu o muñata. Peu ya mela kapili, kakuli ne ku si na mubu o muñata. 6 Kono lizazi ha li pahama, mitungo ye melile ya letuka, mi kakuli mibisi n'e si ka kena hahulu mwa mubu, ya oma kapili. 7 Peu ye ñwi ya wela mwa mikakani, mi mikakani ha i hula, ya i yowelisa, mane peu ya palelwa ku beya. 8 Kono peu ye ñwi ya wela mwa mubu o munde. Ya tunguka, ya hula mi ya beya lico ze ñata.Ye ñwi ya beya mashumi a malalu, ye ñwi mashumi a silezi, ye ñwi mwanda.” 9 Jesu kih'a li: “Ya na ni lizebe, a utwe!”

 

Mulelo wa linguli

(Mat. 13.10-17; Luk. 8.9-10)

10 Jesu ha s'a siyezi a nosi, ba bañwi ba nyangela hamohocwalo ni ba lishumi ka ba babeli ba t'o buza litaluso za linguli.

11 A li ku bona: “Mina, mu filwe ku ziba likunutu za Mubuso wa Mulimu. Kono ba bañwi, ba ba sa li kwande, ba bulelelwa lika kaufela ka mukwa wa linguli feela, 12 ili kuli:

‘ Kwa ku bona, ba bone, kono ba si

ke ba bonisisa,

ni ku utwa, ba utwe, kono ba si ke

ba utwisisa.

Kabesicwalo ne ba ka swana ba sikuluhela

ku Mulimu, mi a ba swalela!”‘

 

Jesu u talusa nguli ya mucali

(Mat. 13.18-23; Luk. 8.11-15)

13 Mi Jesu a li ku bona: “Kana ha mu utwisisi taluso ya nguli yeo ya mucali? Mu ta utwisisa cwañi he linguli ze ñwi kaufela? 14 Mucali yoo, ki ya luta linzwi la Mulimu. 15 Batu ba bañwi ba swana ni nzila mo ku calwa linzwi. Ba man'o li utwa, Satani u pakisa ku t'o zwisa linzwi le mwa lipilu za bona. 16 Kamukwaocwalo, batu ba bañwi ba swana ni mubu o kopani ni macwe, mi ha ba utwa linzwi ba pakisa ku li amuhela ka tabo. 17 Kono, ba li tokwisa sibaka sa ku tiya hande mwa lipilu za bona, kakuli ha ba na mutundamenyi. Ha ku taha matomola kamba manyando kabakala linzwi la Mulimu, ba tuhela kapili! 18 Ba bañwi hape, ki ba ba swana ni mubu mo ku melile mikakani, ili bao ba utwile linzwi. 19 Kono maswenyeho a bupilo, ku yembululwa ki bufumu ni mifuta-futa ya litakazo, za kena ku t'o yowelisa linzwi, mi ba palelwa ku beya miselo. 20 Kono ba teñi ba bañwi ba ba swana ni mubu o munde. Ba utwa linzwi, ba li amuhela, mi ba beya miselo. Ba bañwi ba be ya mashumi a malalu, ba bañwi mashumi a silezi, ba bañwi mwanda.”

 

Nguli ya lampi

(Luk. 8.16-18)

21 Mi Jesu a ba buza, a li: “Kana mutu h`a ka tukisa lampi ni ku i kwahela ka tubana, kapa ku i beya mwatas'a mumbeta? Kana h'a na ku i beya fa ngandaleza?

22 Se si patilwe kaufela si ta patululwa, mi se si kwahezwi si ta kwahululwa.

23 Ya na ni lizebe, a utwe!”

24 Jesu a ba bulelela hape, a li: “Mu teeleze ka tokomelo se mu utwa! Milao ye mu sebelisa ha mu atula ba bañwi, ni Mulimu u ta i sebelisa ku mina, ka tata mane ni ku fita h'a ka mi atula.

25 Ya na ni se siñwi, u ka ekelezwa ku s'a sweli, kono ya si na u ta amuhiwa mane ni ka kanyinyani k'a na ni kona!”

\rt 4.25:

\rt Mat. 13.12, 25.29; Luk. 19.26

 

Nguli ya peu ya masitete

(Mat. 13.31-32,34; Luk. 13.18-19)

30 Hape Jesu a li: “Mubuso wa Mulimu lu ka u swanisa ni nto mañi? Kapa lu ka u talusa ka nguli ifi? 31 U swana ni peu ya masitete, ili peu ye nyinyani ku fita lipeu kaufela mwa lifasi, ha i calwa. 32 Kono, ha i se i cezwi, i hula ku fita ze ñwi kaufela kwa butuna. Mi i mela mitai ye mituna hahulu, mane linyunywani li t'o yaletela mwa muluti wa yona.”

33 Jesu n'a ba luta linzwi ka linguli ze cwalo ze ñata, ka mo ne ba konela ku utwisisa. 34 N'a sa buleli ni bona a sa itusisi linguli, kono ha n'a li kwa mukunda ni balutiwa ba hae, n'a ba talusezanga litaba kaufela.

 

Jesu u kuzisa liñungwa

(Mat. 8.23-27'Luk. 8.22-25)

35 Manzibwana a lona lizazi leo, Jesu a li kwa balutiwa ba hae: “A lu sileleñi mwabuse bwa lisa!” 36 Ba sin'o siya nyangela, balutiwa ba longana ni Jesu mwa sisepe. Ne ku na ni lisepe ze ñwi fakaufi. 37 Cwale kwa zuha liñungwa le lituna, mi mandinda a kala ku kenya mezi mwa sisepe, mane sa bata ku tiba. 38 Jesu n'a li kwa litusi la kwa mulaho, a samile fa musamo, a lobezi. Balutiwa kiha ba mu zusa, ba li: “Muluti, kiñi ha u sa bilaeli niha lu bata ku shwa!” 39 Jesu a zuha, mi a kalimela moya, a li: “Kuza!” Ni kwa mandinda a li: “Ombela!” Moya wa kuza, mi kwa ombela hahulu.

40 Cwale Jesu a li kwa balutiwa ba hae: “Mu sabiswa kiñi? Kikabakalañi ha mu si na tumelo?” 41 Bona ba saba hahulu, mi ba bulelisana, ba li: “Kanti yo, ki mañi, ya li moya ni mandinda kaufela za mu utwa?”

5

 

Jesu u folisa mutu ya na ni mioya ye maswe

(Mat. 8.28-34; Luk. 8.26-39)

1 Cwale ba y'o fweka mwabuse bwa Lisa la Galilea, mwa naha ya Mageraseni. 2 Jesu a sa longoka feela, a katanyezwa ki mutu ya n'a zwa fa mayumbelo. 3 Mutu yo, n'a na ni moya o maswe, mi n'a pila mwahal'a mabita. Ne ku si na mutu ya n'a kona ku mu tama, nihaikaba ka liwenge. 4 Hañata n'a tamiwanga kwa mazoho ni kwa mahutu ka mawenge, kono n'a pumanga. Ne ku si na mutu ya n`a kona ku mu ombalisa. 5 Musihali ni busihu n'a nz'a zamaya-zamaya mwahal'a mabita ni mwa malundu a nz'a huwa ni ku ikolofaza ka macwe.

6 A sin'o bona Jesu a sa li kwahule, a matela ku yena, mi a mu kubamela. 7 Kih'a huweleza ka linzwi le lituna, a li: “S'o bata ku na kiñi, wena Jesu Mwan'a Mulimu, Muambakani ya Pahami? Na ku lapela ka libizo la Mulimu, u si ke wa ni nyandisa!” 8 A bulela cwalo kakuli Jesu n'a ize ku yena: “Moya o maswe, zwa ku mutu yo!” 9 Cwale Jesu a mu buza, a li: “Ki wena mañi libizo la hao?” Mutu yo a mu alaba, a li: “Ki na Mpi kakuli lu ba bañata.” 10 Mi n'a pihelela ku kupa kuli Jesu a si ke a lelekela mioya ye maswe kwahule ni sibaka seo.

11 Ne ku na ni mutapi o mutuna wa likulube o n'o fulela fakaufi ni lilundu leo. 12 Mioya ye maswe kiha i kupa Jesu, ya li: “U lu lumele kwa likulube zeo, lu y'o kena ku zona!” 13 Mi Jesu a i lumelela. Cwale, mioya ye maswe ya zwa ku mutu, mi ya y'o kena mwa likulube. Honafo, mutapi kaufela wa likulube, ze ne bata ku eza likiti ze peli, za matela kwa liñope ni ku tulela mwa lisa mi za shwa mezi.

14 Balisana ba likulube ba zwa fo ka sabo, mi ba matela ku y'o hasanya taba yeo mwa munzi ni mwa naha. Cwale batu kiha ba y'o bona se ne si ezahalile. 15 Ba taha ku Jesu, mi ba fumana ya n'a kenwi ki mioya ye maswe ye miñata, a inzi inge a apezi liapalo, a iketile. Mi ba kenwa ki sabo. 16 Ba ba ne ba boni zeo kaufela ba kandekela batu ka se si tahezi wa mioya ye maswe ni likulube cwalo. 17 Cwale ba kala ku kupa Jesu kuli a zwe mwa naha ya bona.

18 Jesu ha s'a longana mwa sisepe, mutu ya n'a na ni mioya ye maswe a t'o mu kupa kuli a mu lumelele ku ina ni yena. 19 Jesu h'a si ka mu lumelela. A mu bulelela, a li: “U kutele kwa hae, kwa banabahenu, mi u y'o ba kandekela z'a ku ezelize Mulena kaufela, ni mw'a ku shemubezi.” 20 Mutu yo, kih'a funduka, a kena mwa silalanda sa Minzi ye Lishumi a nz'a taluseza batu linto kaufela z'a mu ezelize Jesu. Mi ba ba li utwa kamukana ba mbwetuka.

 

Mwan'a Jairuse ni musali ya n'a sweli kwa liapalo za Jesu

(Mat. 9.18-26; Luk. 8.40-56)

21 Jesu ha s'a kutezi hape mwabuse ka sisepe, batu ba bañata ba t'o kubukanela ku yena, honafo fa munanga. 22 Kiha ku fita nduna yo muñwi wa sinagoge ya n'a bizwa Jairuse. H'a bona Jesu, a wela fafasi kwa mahutu a hae. 23 A mu kupa ka tata, a li: “Mwan'a ka wa musizana s'a tandela. Na ku kupa, u tahe, u t'o mu beya mazoho, a fole mi a pile.” 24 Jesu a ya ni yena. Nyangela ya mu latelela ka buñata, mane a pitihanyezwa kwa maneku kaufela.

25 Mo, ne ku na ni musali ya n'a kulile mweya lilimo ze lishumi ka ze peli. 26 N'a nyandile hahulu mwa likalafo za liñaka ze ñata, mi niha n'a sinyehezwi ki mali a hae kaufela, ne ku si na tuso, mane butuku kihona bu hula. 27 N'a s'a utwile ka za Jesu. Kih'a kena mwa mukumbi o n'o li mwamulaho wa Jesu, mi a t'o swala kwa siapalo sa hae. 28 Kakuli n'a bulela mwa pilu kuli: “Ha ni ka swala nihaiba liapalo za hae feela, ni ta fola.” 29 Honafo, mweya wa hae wa yema, mi a ikutwa mwa mubili wa hae kuli u folile. 30 Ka yona nako yeo, Jesu a ikutwa kuli maata a hae a mañwi n'a zwile ku yena. Kiha s'a itemuna, mi a li kwa nyangela: “Ya sweli kwa liapalo za ka ki mañi?” 31 Balutiwa ba hae, ba li: “Wa bona kuli u pitihanyelizwe ki batu, mi hape u sa buza kuli ya ku sweli ki mañi!” 32 Kono Jesu n'a zamaisa batu ka meeto, a bata ku bona ya ezize cwalo kuli ki mañi. 33 Musali yo, ka ku lemuha se si ezahalile ku yena, a taha a ngangamiswa ki sabo, a t'o wela kwa mahutu a hae, mi a mu bulelela niti feela. 34 Jesu a mu bulelela, a li: “Mwan'a ka, tumelo ya hao i ku folisize. U zamaye ka kozo, mi u folelele luli kwa butuku bwa hao.” 35 Jesu h'a sa bulela zeo, kwa fita mañusa a n'a zwa kwa ndu ya nduna Jairuse. A t'o mu bulelela, a li: “Mwan'a hao u tokwahalile. U sa katalezañi Muluti hape?” 36 Kono Jesu h'a si ka isa pilu ku ze ne ba bulela, mi a li ku Jairuse. “ U si ke wa saba. U lumele feela.” 37 Kih'a hanisa batu kaufela ku mu latelela, haisi Pitrosi ni Jakobo ni Joani munyan'a Jakobo. 38 Ba y'o fita kwa ndu ya nduna wa sinagoge. Koo, Jesu a fumana batu ba ba filika. Ba taza lilata ni ku lila. 39 Ha s'a keni mwa ndu, a ba buza, a li: “Lilata le ki lañi. Hape mu lilañi? Mwana h'a si ka shwa. U lobezi feela.” 40 Ba kala ku mu sheununa. Kono yena a ba lelekela kwande kaufel'a bona. A nga bo ndat'ahe mwana ni m'ahe ni balutiwa ba hae ba balalu. A kena mw`a n'a lobalizwe mwana. 41 A mu swala kwa lizoho, mi a li ku yena: “Talita kumi”. Taluso kikuli: “Musizana, na ku bulelela, zuha!” 42 I sa li honafo, musizana a zuha, mi a kala ku zamaya-zamaya. Ne s`e li wa lilimo ze lishumi ka ze peli. Batu kaufela ha ba bona cwalo, ba siyala ba mbwetukile feela. 43 Kono Jesu a ba koñomeka hahulu, kuli ba si ke ba bulela taba yeo ku mutu, mi a li: “A mu mu fe sa ku ca, a ce!”

6

 

Ba Nazareta ba hana ku lumela ku Jesu

(Mat. 13.53-58; Luk. 4.16-30)

1 Jesu h'a zwa mo, a kutela kwa munzi wa habo, mi balutiwa ba hae ba mu latelela. 2 Ka Lizazi la Pumulo, a kala ku luta mwa sinagoge. Buñata bwa batu ha ba mu utwa ba komoka, mi ba li: “Ze z'a luta, u li fumani kai? Butali bw'a filwe ki bo bu cwañi bo bu mu konisa ku eza limakazo ze cwana? 3 Kana mutu yo ha si yena mubeti, mwan'a Maria, ili mwanahabo Jakobo, ni Joani, ni Juda, ni Simoni? Kana likaizeli za bona ha si bona ba, ba ba pila ni luna?” Mi taba yeo ya ba paleliswa ku lumela ku yena. 4 Jesu kih'a li ku bona: “Mupolofita u kutekiwa kai ni kai, konji mwa munzi wa habo, ni mwa lusika lwa habo, ni mwa lapa la habo.”

5 Mo, h'a si ka kona ku eza makazo, haisi ku folisa ba sikai feela ka ku ba beya mazoho. 6 Mi a komoka ku sa lumela kwa bona.

 

Jesu u luma ba lishumi ka ba babeli

(Mat. 10-5-15; Luk. 9.1-6)

Jesu kih'a potela minzi ye mwa silalo se, a nz'a luta batu. 7 A biza balutiwa ba hae ba lishumi ka ba babeli, mi a kala ku ba luma ba babeli, ka ba babeli. A ba fa ni maata a ku leleka mioya ye maswe. 8 A ba laela kuli ba si ke ba lwala se siñwi mwa musipili, i be buhobe, kamba mukotana wa ku kupela lituso, kamba mali mwa likwama. Ba lwale feela mulamu.

9 A li:”Mu tine makatulo a linjangwa, kono mu si ke mwa ekeza se siñwi ku ze mu apezi.” 10 Hape a li ku bona: “Ha mu fita mwa munzi, mu ine ni batu ba ba ta mi amuhela mwa mandu a bona ku fitela mu funduka. 11 Haiba mu fita mwa sibaka mo ba sa mi amuheli, kamba ku teeleza ze mu luta, mu funduke, mi mu tutule maluli a kwa mahutu a mina kuli i be temuso ku bona!”

  12 Kiha ba zamaya, mi ba y'o luta batu kuli ba bakele libi za bona. 13 Ba leleka mioya ye maswe ye miñata, mi ba folisa bakuli ba bañata ka ku ba toza oli.

 

Lifu la Joani Mukolobezi

(Mat. 14.1-12; Luk. 9.7-9)

14 Mulena Heroda a utwa za Jesu, kakuli libizo la hae ne li se li bubana. Batu ba bañwi ne ba li: “Joani Mukolobezi u zuhile kwa bafu! Kikabakaleo h'a na ni maata a ku eza limakazo ze cwalo.”

15 Ba bañwi ne ba li: “Ki mupolofita Elia.” Ba bañwi hape ne ba li: “Ki mupolofita, sina yo muñwi wa bapolofita ba kale.”

16 Heroda h'a utwa zeo, a li: “Ki Joani Mukolobezi ye ne ni pumile toho. U zuhile kwa bafu!” 17 Ne li Heroda kasibili ya n'a laezi kuli Joani a y'o swalwa, a tamiwe ni ku kenyiwa mwa tolongo. Heroda n'a ezize cwalo kabakala Herodiasi musali ya n'a yangile ni haike yo n`a li musal'a munyan'a hae Filipi.

18 Joani n'a bulelelanga Heroda kuli: “Ha u na tukelo ya ku nyala musal'a munyan'a hao.” 19 Ka taba yeo, Herodiasi n'a toile Joani mi n'a lakaza ku mu bulaya, kono n'a tokwile mw'a ka ezeza kabakala Heroda. 20 Heroda n'a saba Joani kakuli ne li munna ya na ni niti, ya lukile. Kikabakaleo n'a mu silelezanga. Ka tabo n'a lata ku utwa Joani h'a bulela, nihaike likelezo za hae ne li mu kataza mwa pilu.

21 Kwa mafelelezo, Herodiasi a fumana sibaka sa hae. Ne li lizazi la ku pepwa kwa Heroda, ha n'a ezeza mukiti manduna, ba bahulu ba mubuso wa hae, ni bazamaisi ba limpi, ni batu ba ba kutekeha ba mwa Galilea. 22 Mwan'a Herodiasi wa musizana, a kena mi a t'o bina. A tabisa Heroda ni baenyi ba hae. Mulena kih'a bulelela musizana, a li: “Ni kupe s'o lata kaufela, mi ni ta ku fa sona.” 23 Mane a konka, a li: “Ni ta ku fa s'o ka kupa ku na kaufela, nihaili kalulo ya mubuso wa ka!” 24 Musizana kih'a zwa, a y'o buza m`ahe, a li: “Ni ta y'o kupa sika mañi?” M'ahe a mu alaba, a li: “Kupa toho ya Joani Mukolobezi!” 25 Kapili-pili musizana a kutela ku mulena, mi a fitisa kupo ya hae, a li: “Ni kupa toho ya Joani Mukolobezi fa mukeke, hona cwale fa!” 26 Mulena a swaba hahulu, kono a palelwa ku hana kupo ya hae kabakala maci a n'a konkile fapil'a ba ba ne ba memilwe kwa mukiti. 27 Kih'a pakisa ku laela libuto kuli a tise toho ya Joani. A ya, mi a y'o puma toho ya Joani mwa tolongo. 28 A i tisa fa mukeke, mi a i fa musizana. Musizana, yena, a y'o i fa m'ahe. 29 Balutiwa ba Joani ha ba utwa taba yeo, ba t'o nga situpu sa hae, mi ba y'o si buluka mwa libita.

 

Jesu u fepa batu ba likiti li ketalizoho

(Mat. 14.13-21; Luk. 9.10-17; Joa. 6.1-14)

30 Baapositola ba kutela ku Jesu, mi ba t'o mu kandekela ze ne ba ezize kaufela ni ze ne ba lutile. 31 Kabakala buñata bwa batu ba ba ne ba taha ni ku kuta, Jesu ni balutiwa ba hae ne ba tokwa nihaili nako ya ku ca lico. Cwale Jesu a ba bulelela, a li: “A lu yeñi kwa mukunda, ko ku si na batu. Mu y'o ikatulusa hanyinyani.” 32 Ba fuula sisepe kuli ba y'o ina ba li nosi ko ku kuzize.

33 Nihakulicwalo batu ba bañata ba ba bona ha ba funduka, mi ba ziba kuli ki bona. Kiha ba zwa mwa minzi kaufela, ba matela kwa likamba mi ba y'o fita, Jesu ni balutiwa ba hae ba si ka fueka kale. 34 Jesu ha s'a longokile, a bona batu ba bañata. A ba shwela makeke kakuli ne ba swana inge lingu ze si na mulisana. Kih'a kala ku ba luta lika ze ñata.

35 Cwalehe, lizazi ha li se li likela, balutiwa ba Jesu ba taha ku yena, ba li: “Mo ki mwa naheñi, mi lizazi li se li likezi.

36 Hasanya batu bao, ba y'o itekela za ku ca mwa minzi ni minzinyana ye fakaufi.” 37 Jesu a ba alaba, a li: “Mu ba fe za ku ca ili mina.” Kono ba mu buza, ba li: “Kikuli lu y'o ba lekela mahobe ka mali a mañata a likana ni tuelo ya silimo kuli lu ba fe sa ku ca, nji? 38 Jesu a li ku bona: “Mu na ni mahobe a makai? A mu y'o bona!” Ha ba se ba boni, ba li: “Lu na ni mahobe a ketalizoho ni litapi ze peli.”

39 Jesu kih'a laela balutiwa ba hae ku inisa batu kaufela fa mwengelele ka litopa. 40 Mi ba ina cwalo ka litopa, ze ñwi mwanda, ze ñwi mashumi a ketalizoho. 41 Cwale Jesu a nga mahobe a ketalizoho ni litapi ze peli, a talima kwa lihalimu, mi a itumela ku Mulimu. Kih'a komauna mahobe, mi a fa balutiwa ba hae kuli ba abele batu. A eza cwalo ni kwa litapi ze peli. A ba abela zona kaufel'a bona. 42 Mutu ni mutu a ca mi a kula. 43 Cwale balutiwa ba taza lizuma ze lishumi ka ze peli za bungululwa bo bu ne bu siyezi fa mahobe ni litapi. 44 Bo, palo ya banna ba ba ne ba cile i ne i fita fa likiti li ketalizoho.

 

Jesu u zamaya fa mezi

(Mat. 14.22-33; Joa. 6.15-21)

45 Honafo, Jesu a laela balutiwa ba hae ku longana mwa sisepe kuli ba itangete ku ya kwa Betsaida mwabuse bwa lisa, yena h'a sa fundula nyangela. 46 A sin'o ba fundula, a ya fa lilundu ku y'o lapela. 47 Ka swalala, sisepe ne si se si li fahal'a lisa, haili yena Jesu n'a siyezi a nosi fa likamba. 48 A bona kuli balutiwa ba hae ne ba fuluha ka tata kakuli ne ba talimani ni moya. Cwale, nako ha i se ili mwahal'a hola ya bulalu ni ya busilela, kakusasana, Jesu a taha ku bona a nz'a zamaya fa mezi, mi a eza inge ya bata ku ba fitelela. 49 Kono, ha ba mu bona a zamaya fa mezi, ba hupula kuli ki silumba, mi ba kala ku huwa.

50 Kaufela ha ba mu bona, ba saba hahulu. Kono Jesu a bulela ni bona kapili, a li: “Mu tiye lipilu! Ki na. Mu si ke mwa saba.” 51 Cwale a kena mwa sisepe sa bona, mi moya wa kuza. Balutiwa ba imbwetukela feela. 52 Ne ba si ka utwisisa makazo ya mahobe, kabakala butata bwa lipilu za bona.

 

Jesu u folisa bakuli mwa Genezareta

(Mat. 14.34-36)

53 Ha ba se ba silile lisa, ba y'o fueka mwa naha ya Genezareta. 54 Ba sa longoka feela, batu ba ziba kapili kuli ki Jesu. 55 Kiha ba yamba sibaka seo kaufela, mi ba kala ku nanaulela ku yena bakuli ba nze ba lobezi mwa milobalo ya bona, kai ni kai ko ne ba mu utwela. 56 Mi kw`a n'a ya kaufela, mwa tunzinyana kapa minzi ye mituna, mane ni ku bona ba ba yahile ba li nosi kwahule ni minzi, ne ku tiswanga bakuli fa mapatelo. Batu ne ba kupanga Jesu kuli a ba lumelele ku swala nihaiba kwa mungundo feela wa siapalo sa hae, mi ba ba ne ba mu swala kaufela ne ba fola.

7

 

Tuto ye siilwe ki ba kwaikale

(Mat. 15.1-9)

1 Bafalisi ni baluti ba bañwi ba Mulao, ba ba ne ba zwa mwa Jerusalema, ba t'o kubukana ku Jesu. 2 Ba lemuha kuli ba bañwi kwa balutiwa ba hae ne ba ca lico ka mazoho a si ka kena, kikuli ne ba si ka tapa kwa mazoho ka milao ya sijuda.

3 Bafalisi ni Majuda kaufela ba latelela tuto ye ba fumani ku baikale. Ha ba ci lico, konji ha ba se ba tapile handende kwa mazoho ni miambo. 4 Hape ni haba zwa fa misika ha ba ci,konji ha ba tapile pili. Mi ku sa na ni mikwa ye miñata ye ba latelela, ye zwa ku baikale, sina ya ku tapisa likomoki, lipiza za lizupa ni za sipi ye fubelu.

5 Bafalisi ni baluti ba Mulao kiha ba buza Jesu, ba li: “Kikabakalñi Balutiwa ba hao ha ba sa lateleli mukwa wa baikale, mane ba ca lico ba si ka tapa kwa mazoho pili?” 6 Jesu a ba alaba, a li: “Isaya n'a nepile cwañi ha n'a polofitile za mina! Mu baipi, sina mw`a n'a ñolezi:

‘Ba sicaba se, ku bulela Muñ'a

Bupilo, ba ni kuteka ka milomo,

kono lipilu za bona li kwahule ni na.

7 Ba ni kubamela feela ku si na tuso,

kakuli ba luta milao ya batu, inge

ki ya Mulimu!’ “

8 Mi Jesu a li: “Mu siya litaelo za Mulimu mi mu kumalela mikwa ya batu.

9 Hape a ekeza, a li: “Mu na ni mukwa wa butali wa ku hana Mulao wa Mulimu kuli mu kakatele tuto ya sihabo mina. 10 Kakuli Mushe u ize: ‘Kuteka ndat'aho ni m'aho’. Hape a li: ‘Mutu ufi ni ufi ya bulela ze maswe ka ndat'ahe kamba m'ahe a bulaiwe.’

  11 Kono mina, mu luta mutu ku bulelela ndat'ahe kamba m'ahe, kuli: ‘Ze ne ni ka kona ku mi tusa ka zona ki Korbani, kikuli mpo ye bulukezwi Mulimu. 12 Mutu yo, mu se mu mu lumelela kuli a si ke a tusa ndat'ahe kamba m'ahe se siñwi. 13 Kamukwaocwalo, mu sinya maata a linzwi la Mulimu ka mikwa ya sihabo mina, ye mu nze mu siyelana cwalo. Mi ku sa na ni linto ze ñwi ze ñata za mufuta o cwalo ze mu eza “

 

Linto ze silafaza mutu

(Mat. 15.10-20)

14 Jesu kih'a bizeza hape nyangela ku yena, mi a ba bulelela, a li: “Mu ni teeleze, kaufel'a mina, mi mu utwisise taba ye! 15 Ha ku na ni se sikana, se si zwa kwande, se si ka kona ku silafaza mutu ha si kena ku yena. Kono ki se si zwa ku yena se si kona ku mu silafaza. 16 Ya na ni lizebe, a utwe!”

17 Jesu ha s'a siile nyangela, ku kena mwa ndu, balutiwa ba hae ba mu buza ka za nguli yeo. 18 Mi a li ku bona: “Kanti ni mina ha mu na kutwisiso? Kana ha mu lemuhi kuli ha ku na ni se sikana, se si zwa kwande, se si ka kona ku silafaza mutu ha si kena ku yena. 19 Ha si keni mwa pilu ya hae, kono si ya mwa mba, mi si y'o zwela mwa naheñi. “ Ka ku bulela cwalo, Jesu n'a tiisa kuli lico kaufela za lukela ku ciwa. 20 Mi a zwelapili, a li: “Se si zwa ku mutu, ki sona se si mu silafaza! 21 Kakuli ki mwahali, mwa lipilu za batu, mo ku zwa mihupulo ye maswe ye ba isa kwa ku eza ze swabisa, ku uzwa, ni ku bulaya,

22 ku buka, ni ku lakaza lika za ba bañwi, ku eza ka lunya, ni ku puma, ni ku pila ka buhule, ku ba ni muna, ku seba, ku ikuhumusa, mane ni ku eza za butanya. 23 Ze maswe zeo kaufela li zwa mwahali, mi ki zona ze silafaza mutu.”

 

Tumelo ya musali wa Mukanana

(Mat. 15.21-28)

24 Cwale Jesu a zwa mo, mi a ikela mwa naha ye bapani ni munzi wa Tire. A kena mwa ndu ye ñwi ka takazo ya kuli batu ba si ke ba ziba kuli u teñi. Kono a palelwa ku ipata. 25 Musali ya n'a na ni mwana wa musizana, ya n'a kenwi ki moya o maswe, a utwa za hae. A taha ku yena kapili, mi a ikwiseza kwa mahutu a hae. 26 Musali yo, ne li mulicaba wa mushobo wa Masyrofenisia. A kupa Jesu kuli a leleke moya o maswe ku mwan'a hae. 27 Kono Jesu a mu alaba, a li: “Swanelo ki ku uta bana pili. Ha si hande ku nga lico za bana ku li nepela linja!” 28 Musali a li: “Muñ'a ka, nihaili zona linja ze mwatas'a tafule li canga bungululwa bo bu siilwe ki bana.” 29 Jesu kih'a li ku yena: “Kabakala kalabo ya hao yeo, u ye feela kwa hae. Moya o maswe s'o zwile ku mwan'a hao!” 30 Kih'a kutela kwa hae, mi a y'o fumana mwan'a hae a lobezi fa mumbeta. Moya o maswe kaniti n`o s'o zwile ku yena.

 

Jesu u folisa mutu ye ne li sataambi

31 Cwale Jesu a zwa mwa sibaka sa Tire, ka nzila ya Sidone, mi a kutela hape kwa Lisa la Galilea ka ku pazula Minzi ye Lishumi fahali. 32 Kiha batu ba mu tiseza satambi, mi ba kupa kuli a mu beye mazoho. 33 Jesu a mu isa kwatuko, kwahule ni batu. A beya minwana mwa lizebe za hae, mi hape a mu swala fa lulimi ka mati. 34 Jesu kih'a talima kwa lihalimu, a lula moya, mi a li ku susu: “Effata” kikuli “Tibuluha!” 35 Honafo, lizebe za munna yo za tibuluha. Lulimi lwa hae lwa tamuluha, mi a kala ku bulela hande. 36 Jesu kih'a ba laela kaufela kuli ba si ke ba bulelela mutu taba yeo. Kono niha n'a tiiseza ku ba hanisa, bona kihona ba i bulela, mane ni ku fita pili. 37 Ne ba komokile ka ku fitisisa, mi ne ba li; “Mutu yo, ha si mw'a kondiseza z'a eza kaufela! Mane u utwisa ba ba tibani lizebe, ni ba ba sa buleli wa ba bulelisa!”

8

 

Jesu u fepa batu lwa bubeli

(Mat. 15.32-39)

1 Ha ku si ka fita nako ye telele, kiha ku t'o kubukana hape batu ba bañata ku Jesu. Kakuli ne ba si na lico, Jesu kiha s'a biza balutiwa ba hae, mi a li ku bona: 2 ”Ni utwela batu bao butuku, kakuli se li mazazi a malalu ba nze ba inzi ni na, mi ha ba sa na sa ku ca. 3 Ha ni ka ba kutiseza kwa mahae ni tala, ba ta welelela mwa nzila kakuli ba bañwi ku bona ba zwa kwahule.” 4 Balutiwa ba hae ba mu alaba, ba li: “Mwa naheñi mo, mutu a ka fumana kai lico za ku fa batu ba ba kuma fa?” 5 Jesu a ba buza, a li: “Mu na ni mahobe a makai?” Ba li: “Ki a ketalizoho ka a mabeli!”

6 Kih'a laela nyangela kuli ba ine fafasi. Cwale a nga mahobe ao a ketalizoho ka a mabeli. A sin'o itumela ku Mulimu, a' komauna, mi a' fa falutiwa ba hae kuli ba abele batu. Balutiwa ba eza cwalo. 7 Ne ba sa na ni tutapinyana tu sikai. Jesu a itumela ku Mulimu, mi a bulelela balutiwa kuli tu abiwe ni tona. 8 Ba ca kaufel'a bona, mane ba kula, mi kwa kutiswa lizuma ze ketalizoho ka ze peli ze tezi bungululwa bo bu siyezi. 9 Ibo, ba ba ne ba cile ne ba bata ku eza likiti ze ne. Jesu kih'a ba fundula. 10 A longana kapili mwa sisepe ni balutiwa ba hae, mi a ya mwa naha ya Dalmanuta.

 

Bafalisi ba kupa makazo

(Mat. 16.1-4)

11 Bafalisi ba bañwi ba taha ku Jesu, mi ba kala ku kanana ni yena. Ba mu lika ka ku kupa kuli a eze makazo ye bonisa kuli maata a hae n'a zwa ku Mulimu.

12 Jesu a lula moya, mi a li: “kikabakalañi batu ba kacenu ha ba kupa makazo? Kaniti na mi bulelela, kuli: ha ku na makazo ye ba ta fiwa.

13 Kih'a ba siya, a longana hape mwa sisepe, mi a silela mwabuse.

 

Mumela wa Bafalisi ni wa Heroda

(Mat. 16.5-12)

14 Balutiwa ne ba libezi ku longa lico, mi ne ba si na se siñwi mwa sisepe kwand`a buhobe bu li buñwi feela.

15 Jesu kih'a ba laela, a li: “Mu tokomele, mi mu ambuke mumela wa Bafalisi ni mumela wa Heroda.”

16 Balutiwa ba kala ku ambolisana mwahal'a bona fahalimw'a linzwi leo, ba li: “U bulela cwalo kakuli ha lu na mahobe!” 17 Jesu a ziba ze ne ba ambola, mi a li ku bona: “Kiñi ha mu ambola ka za ku tokwa mahobe? Kana ha mu si ka ba kale ni kutwisiso? Ha mu swali litaba? Kiñi lipilu za mina ha li sa tatafalile? 18 Mu na ni meeto. Kiñi ha mu palelwa ku bona? Mi mu na ni lizebe. Kiñi ha mu palelwa ku utwa? Ha mu sa hupuli kanti kiñi?

19 Ha ni kile na komaunena batu ba likiti li ketalizoho mahobe a ketalizoho, ne mu talize lizuma ze kai za bungululwa bo bu ne bu siyezi?” Ba mu alaba, ba li: “Ze lishumi ka ze peli.” 20 ”Mi ha ni kile na komaunena batu ba likiti ze ne mahobe a supile, ne li ze kai lizuma za bungululwa ze ne mu talize?” Ba li: “Ze supile!” 21 Mi Jesu a ba buza, a li: “Ni ka nako ye ha mu utwisisi?”

 

Jesu u folisa sibofu mwa Betsaida

22 Kiha ba fita mwa Betsaida, mo batu ba bañwi ba tisa mutu wa sibofu ku Jesu, mi ba mu kupa kuli a mu swale, a fole. 23 Jesu a swala mutu yo wa sibofu kwa lizoho, mi a mu isa kwand'a munzi. Ha s'a mu sweli fa meeto ka mati, a mu beya mazoho, mi a mu buza, a li: “Kana ku na ni s'o bona, nji?” 24 Mutu yo a talima, mi a li: “Ni bona batu. Ni ba bona inge likota, kono ba zamaya.” 25 Jesu a beya hape mazoho fa meeto a hae. Cwale a talimisisa, a folelela, mi a bona hande lika kaufela. 26 Jesu a mu fundula, mi a mu eleza kuli a kekuluhe munzi wa Betsaida.

 

Pitrosi u paka kuli Jesu ki Mesia

(Mat. 16.13-20; Luk. 9.18-21)

27 Cwale Jesu a ikela ni balutiwa ba hae kwa minzi ye bapani ni Sisarea wa Filipi. Mwa nzil a ba buza, a li: “Batu ba li ki na mañi?” 28 Ba mu alaba, ba li: “Kutwi u Joani Mukolobezi. Ba bañwi hape ba li ki wena Elia, haili ba bañwi, bona, ba li u yo muñwi wa bapolofita.”

29 Jesu cwale a ba buza, a li: “Mina bo, mu li ki na mañi?” Pitrosi a mu alaba, a li: “Ki wena Mesia.”

30 Jesu kih'a ba koñomeka kuli ba si ke ba taluseza mutu cwalo kuli ki yena Mesia.

 

Jesu u talusa za lifu ni zuho ya hae

(Mat. 16.21-28; Luk. 9.22-27)

31 Cwale Jesu a kala ku luta balutiwa ba hae, a li: “ Na, Mwan'a Mutu, ni swanezi ku utwiswa butuku hahulu. Ba bahulu ba sicaba, ni baprisita ba bahulu hamohocwalo ni Baluti ba Mulao, ba ta ni hana, ni ta bulaiwa, kono nihakulicwalo, ni ta zuha mwamulaho a mazazi a malalu.” 32 A ba bulelela taba yeo patalaza. Cwale Pitrosi kih'a mu bizeza kwatuko, mi a kala ku mu kalimela. 33 Kono Jesu a itemuna, a talima balutiwa ba hae, mi a omanya Pitrosi, a li: “Zwa ku na Satani, kakuli mihupulo ya hao ki ya butu, isiñi ya Mulimu!”

34 Ibehe, Jesu a biza nyangela ni balutiwa ba hae, mi a li ku bona: “Mutu h'a lata ku ni latelela, haisi kuli a itobohe, a lwale sifapahano sa hae, mi a ni latelele.

35 Mutu ufi ni ufi ya lakaza ku babalela bupilo bwa hae, u ta sinyehelwa ki bona. Kono ya ka sinyehelwa ki bupilo bwa hae kabakala ka ni la Litaba ze Nde, yo u ta ba a ipulukezi bona.

  36 Kana ku tusañi mutu nih'a ka luwa lifasi kaufela, mi a sinyehelwa ki bupilo bwa hae? 37 Ki sika mañi s'a ka zwisa mutu kuli a leke bupilo bwa hae hape? 38 Hakulicwalo, haiba mutu a ka ni swabela, na ni tuto ya ka, mwa nako ye ya bumaswe bwa ku sa saba Mulimu, na, Mwan'a Mutu, ni ta mu swabela zazi le ni ka taha mwa kanya ya Ndate ni mangeloi a kenile.”

9

1 Mi Jesu a zwelapili, a li: “Mu hupule taba ye! Ku na ni ba bañwi, hona mo, ba ba si ke ba shwa, ba si ka bona pili Mubuso wa Mulimu ha u taha ka maata.”

 

Jesu u bonahala ku benya inge liseli

(Mat. 17.1-13; Luk. 9.28-36)

2 Mwamulaho a mazazi a silezi, Jesu a nga Pitrosi, ni Jakobo, ni Joani, mi a kambama ni bona fa lilundu le litelele, ko ba y'o ina ba li nosi. Sibupeho sa hae sa fetuha ba nze ba talimezi.

3 Liapalo za hae za kala ku benya. Za ba ze sweu twaa, ili busweu bo bu si ka tahiswa ki mutu mwa lifasi kaufela.

4 Kiha balutiwa bao ba balalu ba bona Elia ni Mushe ba nze ba ambola ni Jesu. 5 Honafo, Pitrosi a li ku Jesu: “Mulen'a ka, ha si bunde bo ha lu inzi kwanu! Kabe lu yaha maongo a malalu. Lo luñwi lu be lwa hao, lo luñwi lwa Mushe ni lo luñwi lwa Elia!” 6 Yena hamoho ni ba bañwi, ne ba sabile hahulu, mane n'a sa zibi ni s`a n'a bulela. 7 Kwa taha lilu, mi la ba kwahela ka muluti wa lona. Mi kwa utwahala linzwi mwa lilu, le li li: “Yo ki Mwan`a ka luli ye ni lata. Mu mu utwe!”

8 Cwale honafo, balutiwa ba talima kafa ni kafa, kono ha ba si ka bona mutu haisi Jesu feela, ya inzi ni bona.

9 Ha ba nze ba shetumuka ku zwa fa lilundu, Jesu a ba laela, a li: “Mu si ke mwa bulelela mutu ze mu boni, konji na, Mwan'a Mutu, ha ni se ni zuhile kwa bafu.” 10 Ba mamela taelo yeo, kono ba buzana mwahal'a bona, ba li: “Taba ye ya ku zuha kwa bafu i talusañi? 11 Kiha ba buza Jesu, ba li: “kikabakalañi Baluti ba Mulao ha ba bulela kuli Elia u swanezi ku taha pili?”

12 Kalabo ya hae ya li: “Elia ki niti u swanezi ku taha pili ku t'o lukisa lika kaufela. Kono, kikabakalañi ha ku ñozwi kuli na, Mwan'a Mutu, ni ta nyandiswa hahulu ni ku shwaulwa? 13 Nihakulicwalo, ni mi bulelela kuli Elia u s'a tile kale, kono batu ba ezize ze ne ba lata kaufela ku yena, sina mo ku ñolezwi bakeñisa hae.”

 

Jesu u folisa mushimani wa moya o maswe

(Mat. 17.14-21; Luk. 9.37-43a)

14 Ha ba se ba li fakaufi ni balutiwa ba bañwi, ba bona kuli ne ba beilwe mwahali ki batu ba bañata ni kuli Baluti ba Mulao ne ba kanana ni bona. 15 Batu ba sa bona feela Jesu, ba komoka hahulu, mi ba ulumukela ku yena ku y'o mu lumelisa. 16 Jesu a buza balutiwa ba hae, a li: “Mu pihisana ka lifi ni bona?” 17 Mutu yo muñwi, mwahal'a nyangela, a mu alaba, a li: “Muluti, ni tisize mwan'a ka wa mushimani ku wena, kakuli u kenwi ki moya o maswe o mu paleleliswa ku bulela. 18 Fo u mu swalela kaufela, u mu wiseza fafasi. Hape, mwana u tubula nakambuti kwa mulumo, u kweca meeno mi wa omelela. Ni kupile balutiwa ba hao kuli ba leleke moya wo, kono ba palezwi.”

19 Jesu a li ku bona: “Mu batu ba ba cwañi, ba ba sa lumeli? Ni ta ina ni mina nako ye kuma kai? Ni ta konana lili ni mina? A mu ni tiseze mwanana!” 20 Mi ba mu tisa ku Jesu. Moya u sa bona feela Jesu, wa zuhela mwanana ka tata. Mwanana a wela fafasi, a pitika, mi a tubula nakambuti kwa mulomo. 21 Jesu a buza ndat'ahe, a li: “Se li nako ye kuma kai mwanana yo a nz'a li cwana?” Ndat'ahe a li: “N'a li cwalo ku zwa kwa bumbututu bwa hae. 22 Se li hañata u nz'o bata ku mu bulaya ka ku mu wisezanga mwa mulilo kamba mwa mezi. Haiba wa kona, u lu utwele butuku, mi u lu tuse!” 23 Jesu a li ku yena: “U li, haiba wa kona! Linto kaufela za konahala ku ya lumela!” 24 A sa utwa feela cwalo, ndat'ahe mwanana a kalumuka, a li: “Na lumela. Kono a ku ni tuse mwa ku fokola kwa tumelo ya ka.”

25 Ibehe, Jesu h'a bona kuli batu kamukana se ba taha ba mata, a kalimela moya o maswe, a li ku ona: “Moya wa busatambi, na ku laela, zwa ku mwanana yo, mi u si ke wa kutela ku yena hape.” 26 Cwale, moya wa huwa, mi wa mu wiseza fafasi a nz'a nyakaula ka tata. Kiha u zwa ku yena, mi mwanana a siyala inge situpu feela, mane ba bañata ne ba li: “U shwile!” 27 Kono Jesu a swala mwanana kwa lizoho, a mu yemisa, mi a nanuha.

28 Jesu ha s'a li mwa ndu, balutiwa ba hae ba mu buza kwa mukunda, ba li: “Kanti kiñi luna ha ne lu palezwi ku leleka moya wo?” 29 Mi Jesu a ba alaba, a li: “Moya wa mufuta wo, ha u koni ku zwiswa ki se siñwi, konji ka tapelo feela!”

 

Jesu u talusa hape za lifu ni zuho ya hae

(Mat. 17.22-23; Luk. 9.43b-45)

30 Ba zwa mwa sibaka seo, mi ba pazula naha ya Galilea fahali. Jesu n'a sa lati kuli batu ba zibe kw'a n'a inzi. 31 N'a nz'a luta balutiwa ba hae. N'a li: “ Na, Mwan'a Mutu, ni ta fiwa batu ba ba ta ni bulaya. Nihakulicwalo mazazi a malalu ha s'a felile, ni ta zuha kwa bafu.” 32 Kono balutiwa ne ba sa utwisisi s`a n'a bulela, mi ne ba saba ku mu buza.

 

Yo mutuna ki mañi?

(Mat. 18.1-5; Luk. 9.46-48)

33 Ba fita mwa Kapernauma. Ha s'a keni mwa ndu, Jesu a buza balutiwa ba hae, a li: “Ne mu ambola ka lifi mwa nzila?” 34 Kono ba kuza feela, kakuli mwa nzila ne ba kananile fa taba ya kuli yo mutuna ku bona ki mañi?

35 Jesu kih'a ina, a biza balutiwa ba lishumi ka ba babeli, mi a li ku bona: “Mutu h'a lata ku ba wa pili, u swanezi ku ikeza wa mafelelezo ni sikombwa sa ba bañwi kaufela.”

36 Kiha s'a nga mwanana, mi a mu yemisa fapil'a bona. A kambeka mazoho fahalimw'a hae, mi a li ku bona: 37 ”Mutu kaufela ya amuhela yo muñwi wa banana ba banyinyani sina yo, ka libizo la ka, u amuhela na. Mi ya ni amuhela h'a amuheli na feela, kono u amuhela ni ya ni lumile.”

 

Ya sa lu lwanisi wa lu yemela

(Luk. 9.49-50)

38 Joani a li ku Jesu: “Muluti, lu boni mutu ya n'a leleka mioya ye maswe ka libizo la hao, mi lu mu bulelezi kuli a tuhele ku eza cwalo, kakuli ha si wa ku luna.” 39 Kono Jesu a alaba, a li: “Mu si ke mwa lika ku mu hanisa, kakuli ha ku na mutu ya kona ku eza makazo ka libizo la ka, hape ku zwa fo a y'o ni sinya libizo. 40 Ya sa lu lwanisi wa lu yemela.

41 Luli na mi bulelela, kuli ya ka mi fa komoki ya mezi kakuli mu ba Kreste, yo u ta fumana mupuzo wa hae.

 

Ze sitatalisa

42 ”Haili ya ka sitatalisa yo muñwi wa bao ba banyinyani ba ba lumela ku na, ne i ka ba hande ha n'a ka tamelelwa licwe le lituna mwa mulala, mi a nepelwa mwa liwate. 43 Haiba lizoho la hao li ku isa mwa sibi, u li pume. Ne i ka ba hande ku wena ha n'o ka kena mwa bupilo ni lizoho li li liñwi, ku fita ku ba ni mazoho a mabeli, mi u y'o nepelwa mwa lyangalilo, mwa mulilo o sa timi.

44 Mo ni mabuku a ca litupu a sa shwi, ni mo ku sa timi mulilo. 45 Haiba ki lihutu la hao le li ku isa mwa sibi, u li pume. Ne i ka ba hande ku wena ha n'o ka kena mwa bupilo ni lihutu li li liñwi, ku fita ku ba ni mahutu a mabeli mi u y'o nepelwa mwa lyangalilo.

46 Mo ni mabuku a ca litupu a sa shwi, ni mo ku sa timi mulilo. 47 Mi, haiba ki liito la hao le li ku isa mwa sibi, u li longole. Ne i ka ba hande ku wena ha n'o ka kena mwa Mubuso wa Mulimu u li simpolyo, ku fita ku ba ni meeto a mabeli mi u y'o nepelwa mwa lyangalilo.

48 Mo ni mabuku a ca litupu ku sa shwi, ni mo ku sa timi mulilo.

49 ” Mañi ni mañi u ta ncafazwa ka lizwai la mulilo. 50 Lizwai li munati, kono ha li sampuka li ka natifiswa kañi? Mu be ni lizwai, mi mu pilisane ka kozo.”

 

10

 

Jesu u luta ka za telekano

(Mat. 19.1-12; Luk. 16.18)

1 Cwale Jesu a zwa moo, mi a ya mwa naha ya Judea ni mwabuse bwa Jordani. Batu ba t'o kubukana hape ku yena ka buñata bo butuna, mi a kala ku ba luta sina mwa n'a ezezanga kamita.

2 Bafalisi ba bañwi ba taha ku yena ka muhupulo wa ku mu lika. Ba mu buza, ba li: “Kana ki tukelo kuli munna a leleke musal'a hae?” 3 Jesu a ba alaba ka puzo, a li: “Mushe u mi laezi cwañi?” 4 Bona ba li: “Mushe u lumezi kuli munna a ñole liñolo la telekano, kihona a ka leleka musal'a hae.”

5 Kono Jesu a li ku bona: “Kikabakala butata bwa lipilu za mina Mushe h'a mi tomezi mulao wo. 6 Ku zwa kwa makalelo, Mulimu h'a bupa linto kaufela, u ezize banna ni basali.

7 Kabakaleo, munna u ka tuhela ndat'ahe ni m'ahe, a kumalele musal'a hae.

8 Cwale bubeli bwa bona, se ba ta fetuha mutu a li muñwi. Cwale ha i sa li ba babeli, kono se li mutu a li muñwi. 9 Hakulicwalo, mutu a si ke a kauhanya se si kopanyizwe ki Mulimu.”

10 Ha ba se ba kutezi mwa ndu, balutiwa ba buza hape Jesu ka taba yeo. 11 Mi a li ku bona: “Munna, h'a ka leleka musal'a hae mi a nyala u sili, wa mu foseza ka bubuki.

12 Mi kamukwaoswana ni yena musali h'a ka hana munn'a hae ku nyalwa ki u sili, wa buka!”

 

Jesu u fuyaula banana

(Mat. 19.13-15; Luk. 18.15-17)

13 Batu kiha ba tisa banana ku Jesu kuli a ba fuyaule, kono balutiwa ba ba hanisa. 14 Jesu h'a bona cwalo a nyema, mi a bulelela balutiwa ba hae, a li: “Mu tuhele banana, ba tahe ku na! Mu si ke mwa ba hanisa, kakuli Mubuso wa Mulimu ki wa ba ba swana ni bona. 15 Kaniti na mi bulelela, kuli:’ Ya sa amuheli Mubuso wa Mulimu sina mwanana, h'a na ku kena ku ona ni hanyinyani.”‘

16 Kih'a nga banana, a beya mazoho fahalimw'a bona, mi a ba fuyaula.

 

Mucaha wa mufumi

(Mat. 19.16-30; Luk. 18.18-30)

17 Jesu ha s'a bata ku funduka, kwa taha munna a nz'a mata. A t'o kubama fapil'a hae, mi a mu buza, a li: “Muluti yo munde, ni swanezi ku eza cwañi kuli ni fumane bupilo bo bu sa feli?” 18 Jesu a li ku yena: “U ni bizezañi yo munde? Ha ku na yo munde haisi Mulimu a nosi! 19 Wa ziba milao ye li: ‘U si ke wa bulaya, u si ke wa buka, u si ke wa uzwa, u si ke wa paka za buhata, u si ke wa nga za yo muñwi ka ku puma, mi u kuteke ndat'aho ni m'aho.’ “

20 Munna yo a li ku yena: “Muluti, zeo kaufela ni li bulukile ku zwa kwa bwanana bwa ka!” 21 Jesu a mu talima ka lilato, mi a li ku yena: “Kanti u sa tokwa nto iliñwi feela. Zamaya, u y'o lekisa tutu ya hao kaufela, mi mali, u a fe babotana. Kihona u ta ba ni bufumu kwa lihalimu. Ku zwa fo, u tahe, u ni latelele!” 22 Kono munna yo a swaba h'a utwa cwalo, mi a ya a nz'a ishondile, kakuli n'a fumile hahulu.

23 Cwale Jesu a zamaisa batu ka meeto, mi a li kwa balutiwa ba hae: “Ku tata cwañi kuli mufumi a kene mwa Mubuso wa Mulimu!” 24 Balutiwa ba hae ba komokiswa ki manzwi ao, kono Jesu a ekeza, a li: “Bana ba ka, luli ku tata ku kena mwa Mubuso wa Mulimu! 25 Mane ne ku ka ba bunolo kuli kamele i kene mwa liito la ndonga, ku fita kuli mufumi a kene mwa Mubuso wa Mulimu.” 26 Balutiwa ba komoka ni ku fita, mi ba buzana, ba li: “Hakulicwalo, ya ka piliswa ki mañi?”

27 Jesu a ba talima, mi a li ku bona: “Ze pala kwa batu, ku Mulimu ha li pali, kakuli ku yena linto kaufela li bunolo.”

28 Pitrosi kiha s'a bulela, a li ku yena: “Bona, luna lu siile linto kaufela, mi lu ku latelezi!” 29 Jesu a mu alaba, a li: “Ee, ku cwalo,mi hae na mi bulelela kuli, mutu a siye ndu ya hae, kapa banabahabo, kapa likaizeli za hae, kapa m'ahe, kapa ndat'ahe, kapa bana ba hae, nihaiba masimu a hae kabakala ka ni la Litaba ze Nde. 30 Ya cwalo u ta amuhela, ka yona nako ye, lika ze mwanda ku se siñwi ni se siñwi sa n'a siile, i li mandu, banabahabo, likaizeli, bo m'ahe, bo ndat'ahe, bana, ni masimu hamohocwalo ni manyando. Mi kwapili, a fumane bupilo bo bu sa feli. 31 Kono ba bañata ba ba li ba pili ka nako ye, ba ta ba ba mafelelezo, mi ba bañata ba ba li ba mafelelezo ka nako ye, ba ta ba bona ba pili.”

 

Jesu u talusa lwa bulalu za lifu ni zuho ya hae

(Mat. 20.17-19; Luk 18.31-34)

32 Cwale, ha ba li mwa nzila ye kambamela kwa Jerusalema, Jesu n'a zamaya kwapili, mi balutiwa ba hae ne ba mu latelela ba nze ba ikomokezi. Batu ba ba ne ba mu sindeketa ni bona ne ba saba. Jesu a ya hape kwatuko ni ba lishumi ka ba babeli, mi a kala ku ba bulelela ze ka mu tahela. 33 A ba bulelela, a li: “Mu lemuhe kuli lu kambamela kwa Jerusalema ko, na, Mwan'a Mutu, ni ta fiwa baprisita ba bahulu ni Baluti ba Mulao. Ba ta ni atulela lifu, mi ba ta ni siya mwa maata a balicaba. 34 Bao ba ta ni shenda, ba ta ni kwelaka mati, ba ta ni nata ka litupa, mane ba ni bulaye. Kono mwamulaho a mazazi a malalu, ni ta zuha hape.”

 

Kupo ya Jakobo ni Joani

(Mat. 20.20-28)

35 Cwale Jakobo ni Joani, bana ba Zebedea, ba sutelela ku Jesu, mi ba li ku yena: “Muluti, ku na ni nto ye ñwi ye lu lakaza kuli u lu ezeze yona.” 36 Jesu a li ku bona: “Kanti ki nto mañi ye mu bata kuli ni mi ezeze?” 37 Ba mu alaba, ba li: “Lu kupa kuli ha u s'o li mwa bulena bwa hao, u lu lumelele ku ina ni wena, yo muñwi ku la bulyo, yo muñwi ku la nzohoto.” 38 Kono Jesu a li ku bona: “Ha mu zibi se mu kupa. Kana kikuli mu ka kona ku nwela mwa sinwiso sa manyando se ni ta nwela ku sona, kapa ku kolobezwa ka kolobezo ye butuku ye ni ta kolobezwa ka yona?”

 

39 Ba mu alaba, ba li: “Lu ta kona!” Jesu a li ku bona: “Ee, ki niti, mu ka nwela mwa sinwiso seo ni ta nwela ku sona, mi mu ka kolobezwa ka kolobezo ye ni ta kolobezwa ka yona. 40 Kono haili ka ku ina ku la bulyo kapa la nzohoto la ka, fo ha ni na maata a ku mi fa cwalo. Ki Mulimu feela ya ta fa libaka zeo ku ba ba li lukiselizwe.”

41 Balutiwa ba bañwi ba lishumi ha ba utwa kupo yeo, ba kala ku halifela Jakobo ni Joani. 42 Jesu kih'a ba biza kaufela, mi a li ku bona: “Mwa ziba kuli be lu hupula kuli ki bazamaisi ba sicaba ba si busa ka tata, ni kuli ba ba na ni litulo ze tuna ba bonisa sicaba seo maat'a bona.

43 Kono ku mina ha ku cwalo. Ya lata ku ba yo mutuna mwahal'a mina, a be sikombwa sa mina.

44 Ya lata ku ba wa pili, a be mutang'a ba bañwi kamukana. 45 Kakuli na, Mwan'a Mutu, na kasibili, ha ni si ka tela ku t'o sebelezwa, kono ni tile ku t'o sebeleza batu, ni ku fa bupilo bwa ka kuli ku liululwe ba bañata.”

 

Jesu u folisa sibofu ya bizwa Bartimea

(Mat. 20.29-34; Luk. 18.35-43)

46 Ba t'o fita mwa Jeriko. Cwale Jesu h'a zwa mwateñi, hamoho ni balutiwa ba hae ni batu ba bañata ñata cwalo, sibofu ya n'a bizwa Bartimea, mwan'a Timea, n'a inzi kwatuko a nzila, a nz'a kupa tuso. 47 Ha s'a utwile kuli ki Jesu wa Nazareta, a kala ku huwa, a li: “Jesu! Mwan'a Davida! A ku ni utwele butuku!” 48 Ba bañata ne ba mu omanya, ba nze ba mu bulelela kuli a kuze. Kono yena kih'a huwa ni ku fita a nz'a li: “Mwan'a Davida, a ku ni utwele butuku!” 49 Jesu a yema, mi a li: “A mu mu bize!” Cwale ba mu biza, mi ba li ku yena: “Itiise! Yema. Wa ku biza!” 50 Kih'a lata kubo ya hae, a yema kapili, mi a taha ku Jesu. 51 Jesu a mu buza, a li: “U bata kuli ni ku ezezeñi?” Mutu wa sibofu a mu alaba, a li: “Mulen'a ka, ni bata ku bona hape!” 52 Mi Jesu a li ku yena: “U zamaye! Tumelo ya hao i ku folisize!” Honafo, a bona hape, mi a latelela Jesu.

11

 

Jesu u kena mwa Jerusalema

(Mat. 21.1-11; Luk. 19.28-40; Joa. 12.12-19)

1 Ha ba se ba atumezi kwa Jerusalema, fakaufi ni minzi ya Betefage ni Betania, kwatuko a Lilundu la Likota za Olive, Jesu a luma balutiwa ba hae ba babeli. 2 A li ku bona: “Mu ye mwa munzi o fapil'a mina. Mu sa kena feela mwateñi, mu ta fumana kambongolo ka ka fungilwe, ka ka si ka pahamiwa kale ki mutu. Mu ka fungulule, mi mu ka tise kwanu. 3 Mi mutu h'a ka mi buza, a li: ‘Se si mi ezisa cwalo kiñi?’ Mu mu alabe, mu li: ‘Mulena wa ka bata, mi u ka tuha a ka kutisa.’ “ 4 Ba ya, mi ba fumana kambongolo ka ka fungilwe fa munyako wa ndu, kwande kwatukw`a nzila. Ba ka fungulula. 5 Ba bañwi ba ba ne ba yemi fo ba ba buza, ba li: “Yela mina, kiñi ha mu fungulula kambongolo kao?” 6 Balutiwa ba ba alaba sina mw`a n'a bulelezi Jesu, mi batu bao ba ba tuhela. 7 Ba tisa kambongolo ku Jesu. Ba yala likubo za bona fahalimw'a kona, mi Jesu a pahama fateñi. 8 Batu ba bañata ba yala liapalo za bona mwa nzila, mi ba bañwi ba eza cwalo ka macacani a ne ba lemile mwa masimu. 9 Ba ba ne ba etelezi Jesu ni ba ba ne ba mu latelela ne ba huweleza, ba li: “Ku lumbekwe Muñ 'a Bupilo! Ku tohonolofazwe ya taha ka libizo la Mulena!

\rt 11.9:

\rt Lipi. 118.25-26

18 Baprisita ba bahulu ni Baluti ba Mulao ba utwa taba yeo, mi ba bata mukwa wa ku bulaya Jesu. Ne ba mu saba kakuli nyangela kaufela ne i komokiswa ki tuto ya hae.

19 Ka nako ya mazibwana, Jesu a zwa mwa Jerusalema ni balutiwa ba hae.

 

Tuto bakeñisa kota ya feiga ye kutilwe. Maata a tumelo

(Mat. 21.20-22)

20 Habusa, i sa li kakusasana, ha ne ba nze ba zamaya mwa nzila, ba bona yona kota yani ya feiga. I se i omile ni mibisi. 21 Pitrosi a hupula ze ne ezahalile, mi a li ku Jesu: “Muluti, bona kota ya feiga yo n'o kutile. I omile!” 22 Jesu kiha s'a bulelela balutiwa ba hae, a li: “Haiba mu lumela ku Mulimu, 23 luli ne mu ka laela lilundu le kuli: ‘Nanuha, u y'o itatela mwa liwate!’ Ha mu sa bilaeli mwa lipilu za mina, kono mu lumela kuli se mu bulela si ta ezahala, mu ta si fiwa.

24 Kabakaleo ni li ku mina, mwa linto kaufela ze mu kupa ka tapelo, mu lumele kuli mu se mu li amuhezi, mi mu ta li fiwa. 25 Mi ha mu yemi mu nze mu lapela, haiba ku na ni ya mi foselize, mu mu swalele, ili kuli Ndat'a mina ya kwa lihalimu a mi swalele milatu ya mina.

26 Kono haiba mu sa swaleli ba ba mi foselize, Ndat'a mina ya kwa lihalimu, ni yena h'a na ku mi swalela milatu ya mina.”

 

Bulena bwa Jesu bu zwa kai?

(Mat. 21.23-27; Luk. 20.1-8)

27 Cwale ba kutela kwa Jerusalema. Jesu ha n`a nz'a zamaya-zamaya mwa lapa la Tempele, baprisita ba bahulu ni Baluti ba Mulao hamohocwalo ni bahulu ba sicaba ba taha ku yena.

28 Ba mu buza, ba li: “Maata a u eza zeo ka ona u a fumani kai? Mi hape ya ku file tukelo ya ku li eza ki mañi?” 29 Jesu a ba alaba, a li: “Ni bata ku mi buza puzo iliñwi feela. Ha mu katabela ku ni alaba, kihona ni na, ni ta mi bulelela maata a ni eza zeo ka ona. 30 Ya lumile Joani kuli a kolobeze, n`e li mañi. Mulimu kapa batu? A mu ni alabe.” 31 Ba elezana hamoho, ba li: “Ha lu alaba kuli ki Mulimu ya mu lumile, u ta li: ‘Kiñi ha mu si ka lumela ku yena?’ 32 Kono ha lu alaba kuli ki batu ba ba mu lumile . . . Fohe ne ba saba batu, kakuli kaufela ne ba kozwi kuli Joani ne li mupolofita kasibili. 33 Cwale ba alaba Jesu, ba li: “Ha lu zibi!” Mi Jesu a li ku bona: “Ni na, ha ni na ku mi bulelela kw'a zwa maata a ni eza zeo ka ona!”

12

 

Nguli ya balimi ba ba maswe

(Mat. 21.33-46; Luk. 20.9-19)

1 Jesu kih'a kala ku bulela ni bona ka linguli, a li: “Ne ku na ni mutu ya n'a calile simu ya likota za veine. A i sileleza ka lukwakwa, a yepa mwateñi silubelo, mi a yaha kalani. A beya simu mwa pabalelo ya balimi, mi a nga musipili.

  2 Ka nako ya kutulo, a luma mutanga kwa balimi kuli a y'o nga kalulo ya hae ya ze kutuzwi mwa simu. 3 Kono balimi bao ba swala mutanga, ba mu nata, mi ba mu lundula ba si ka mu fa se siñwi. 4 Muñ'a simu kih'a ba lumela hape mutanga yo muñwi. Yo, ba mu pobaula matuma mwa toho, mi ba mu tompolola. 5 A luma yo muñwi hape, mi yo, ba mu bulaya. Mi ba nyandisa batanga ba bañata kamukwaoswana. Ba bañwi ba lindaulwa, ba bañwi ba bulaiwa. 6 Muñ`a simu n'a sa siyalezwi ki mutu a li muñwi, yena mwan'a hae ya n'a lata hahulu. Kwa mafelelezo a ba lumela yena, a nz'a hupula kuli: ‘Mwan'a ka ba ta mu kuteka.’ 7 Kono balimi bao ba lelisana, ba li: ‘Shwana ki yo. A mu te, lu mu bulaye, kuli simu i be ya luna!’ 8 Kiha ba mu swala, ba mu bulaya, mi ba nepela situpu sa hae kwand'a simu.”

9 Jesu a buza, a li: “Kana muñ'a simu u ta eza cwañi ka balimi bao? U ka taha, a t'o ba bulaya, mi simu a i fe ba bañwi.

10 Kikuli ha mu si ka bala linzwi, le li li:

‘Licwe le ne li kendilwe ki bayahi,

ki lona le li fetuhile licwe le li tiisize lilulu la ndu. 11 Ki sona s'a si ezize Mulena,

mi sa komokisa mwa meeto a luna.’ “

12 Bazamaisi ba Majuda ba bata ku swala Jesu, kakuli ne ba lemuhile kuli n'a shedekela bona ka nguli yeo, kono ba saba sicaba. Kiha ba mu siya, mi ba ikela.

 

Puzo bakeñisa mutelo

(Mat. 22.15-22; Luk. 20.20-26)

13 Ba lumela ku Jesu bafalisi ba bañwi ni ba sitopa sa Heroda ku t'o mu swasa ka lipuzo. 14 Ba t'o mu bulelela, ba li: “Muluti, lu ziba kuli u na ni niti. Ha u na taba kuli yo ki mañi. Ha u na sobozi, kono u luta niti yeo Mulimu a bata kuli batu ba zamaye ka yona. A ku lu taluseze kapa kwa lukela kuli lu zwiseze puso ya Baroma mutelo, kapa ha ku lukeli? Lu tele, kapa lu si ke lwa tela?” 15 Kono Jesu a lemuha bupumi bwa bona, mi a li: “Mu ni likelañi? A mu ni tiseze mali a muwaya-waya, ni a bone!” 16 Ba mu tiseza ona, mi Jesu a ba buza, a li: “Siswaniso se, ni ze ñozwi fateñi, ki za mañi?” Ba li: “Ki za Sesare!” 17 Jesu a li ku bona: “Mu kutisize ku Sesare ze li za Sesare, ni ku Mulimu ze li za Mulimu!” Mi kalabo ya hae ya ba komokisa hahulu.

 

Puzo bakeñisa zuho ya bafu

(Mat. 22.23-33; Luk. 20.27-40)

18 Basaduki ba bañwi, ili bona batu, bao ba ba latula zuho ya bafu, ba taha ku Jesu, mi ba mu buza, ba li:

19 ”Muluti, Mushe u lu tomezi mulao o li: ‘Mwanahabo mutu haiba a ka shwa a siya musali ya si na mwana, mutu yo u swanezi ku nyala mbelwa ku zuseza mwanahabo ya shwile lusika.”

  20 Cwalehe, ne ku na ni micaha ba supile, ili bana ba mutu a li muñwi. Yo muhulu ku bona a nyala musali, mi a shwa a si ka pepa ni yena. 21 Ya mu tatama a nyala mbelwa yo. Ni yena hape a shwa a si na mwana. Kwa ba cwalo ni ku wa bulalu. 22 Mane kaufela bona ba supile ba shwa ku si na ya pepile mwana ni yena. Kwa mafelelezo ni yena musali a shwa.

23 Cwale, ka lizazi la zuho ya bafu, musali yo u ta ba wa mañi, kakuli kaufel'a bona ba supile ne ba mu nyezi?”

24 Jesu a ba alaba, a li: “Fo mwa fosa ka ku sa ziba, mi se si mi fosisa kikuli ha mu zibi Mañolo nihaiba maata a Mulimu. 25 Kakuli ba ba shwile, ha ba ta zuha, banna ni basali ha ba sa na ku nyala kapa ku nyaliwa hape, kono ba ta pila sina mangeloi mwa lihalimu. 26 Haili ka za ba ba shwile kuli ba ta zuha hape, kana ha mu si ka bala mwa Buka ya Mushe taba ya sicacani se si ne si tuka, Mulimu h'a bulelela Mushe, a li: ‘Ki na Mulimu wa Abrahama, Mulimu wa Isaka ni Mulimu wa Jakobo?’

27 Mulimu, ki Mulimu wa ba ba pila, isiñi wa ba ba shwile. Fo mu fosize hahulu!”

 

Mulao o mutuna ku fita ye miñwi

(Mat. 22.34-40; Luk. 10.25-28)

28 Muluti yo muñwi wa Mulao n'a ba utwile ha ne ba nze ba kanana. A bona kuli Jesu n'a ba alabile hande. Kih'a sutelela, mi a mu buza, a li: “Kanti mulao o mutuna kufita ye miñwi kamukana ki ufi?”

  29 Jesu a mu alaba, a li: “Mulao wa pili ki wo: ‘Teeleza Isilaele! Mulena Mulimu wa luna ki yena Mulena a nosi.

  30 U swanezi ku lata Mulena Mulimu wa hao ka pilu ya hao kaufela, ni ka moya wa hao kaufela, ni ka ngana ya hao kaufela, ni ka maata a hao kaufela.’ 31 Mi mulao wa bubeli ki wo: ‘U swanezi ku lata wahenu sina mo u itatela’. Mi ha ku na mulao o muñwi hape o fita milao yeo kwa butuna.”

32 Muluti wa Mulao a li ku yena: “Ki hande Muluti! S'o bulela ki niti. Mulena ki yena Mulimu a nosi, mi ha ku na Mulimu u sili, konji yena.

33 Mutu u swanezi ku lata Mulimu ka pilu ya hae kaufela, ni ka kutwisiso ya hae kaufela, ni ka maata a hae kaufela, mi u swanezi ku lata wahabo sina mw'a itatela. Milao yeo i na ni tuso hahulu ku fita ku bulaela Mulimu limunanu ze ciswa fa katala ni ku mu ezeza litabelo za mifuta-futa!”

34 Jesu a lemuha kuli n'a alabile ka butali, kih'a mu bulelela, a li: “Ha u yo kwahule ni mubuso wa Mulimu!” Ku zwa foo, ne ku si na mutu ya n'a na ni pilu-tata ya ku mu buza se siñwi hape.

 

Puzo bakeñisa Mesia, Mwan'a Davida

(Mat. 22.41-46; Luk. 20.41-44)

35 Ha n'a luta mwa malapa a Tempele, Jesu a buza puzo yeo, a li: “Baluti ba Mulao ba buleliswa kiñi kuli Mesia ki Mwan'a Davida? 36 Kanti yena Davida, ka ku susuezwa ki Moya o Kenile, u ize:

‘Mulimu u bulelezi Mulen'a ka, a li:

Ina ku la bulyo la ka,

ku fitela ha ni ka beya lila za hao

kwatas'a mahutu a hao.’

37 Davida, ili yena kasibili, h'a mu biza Mulena, Mesia u ka ba cwañi mwan'a hae hape?” Mi nyangela kaufela ne ba mu teeleza ka tabo.

 

Jesu u nyaza Baluti ba Mulao

(Mat. 23.1-36; Luk. 20.45-47)

38 Jesu, ha n'a luta batu, n'a ba bulelelanga kuli: “Mu tokomele Baluti ba Mulao, ba ba tabela ku pota-pota ba apezi liapalo ze telele, mi ba ba lata ku lumeliswa mwa mapatelo. 39 Batu bao, ba bata lipula ze kwapili mwa masinagoge ni mabaka a kutekeha mwa mikiti. 40 Ba putelela limbelwa, mi ba ba uzweza ze mwa mandu a bona ba nze ba ba puma-puma ka ku ba ezeza litapelo ze telele. Katulo ya bona i ta ba ye tata ni ku fita.”

 

Mpo ye zwisizwe ki mbelwa

(Luk. 21.1-4)

41 Jesu ha n'a inzi fakaufi ni sibulukelo sa mali a Tempele, n'a talimezi batu mo ne ba zwiseza limpo za bona. Bafumi ba bañata ne ba zwisa hahulu. 42 Musali wa mbelwa wa mubotana a taha, mi a beya mwateñi malinyana a n'a bata ku eza tungwee to tubeli feela. 43 Jesu kih'a biza balutiwa ba hae, mi a li ku bona: “Kaniti na mi bulelela kuli: musali yo wa mbelwa, ya shebile, u zwisize hahulu ku fita ba bañwi kamukana ba ba beile limpo za bona mwa sibulukelo. 44 Kakuli ba bañwi kaufela ba ngile kwa mali a mañata a ba na ni ona. Kanti yena, mwa bubotana bwa hae, u zwisize s'a na ni sona kaufela, ili s`a n'a ka pila ka sona.”

13

 

Jesu u zibisa ka za ku shandauka kwa Tempele

(Mat. 24.1-2; Luk. 21.5-6)

1 Jesu h'a zwa kwa Tempele, yo muñwi wa balutiwa ba hae a mu bulelela, a li: “Muluti, bona bunde bwa macwe ao, ni butuna bwa miyaho yeo!” 2 Jesu a li ku yena: “Wa i bona miyaho yeo ye mituna? Ha ku na licwe le li ta siyala fahalimw'a le liñwi. Miyaho kaufela i ta shandaulwa.”

 

Makalelo a manyando

(Mat. 24.3-14; Luk. 21.7-19)

3 Jesu n'a inzi fa Lilundu la Likota za Olive, ku libana ni Tempele. Pitrosi, Jakobo, Joani ni Andreasi ba mu buza puzo ha ba li kwa mukunda. 4 Ba li:”A ku lu bulelele kanti li ka ezahala lili z'o bulela, mi ki sifi sisupo se si ka lu bonisa kuli li ka tuha li ezahala?”

5 Jesu a ba taluseza, a li: “Mu tokomele kuli mu si ke mwa pumiwa ki mutu. 6 Batu ba bañata ba ka taha ka libizo la ka, ba nze ba li: ‘Ki na Kreste ya n'a libelezwi!’ Mi ba ta puma ba bañata. 7 Ha mu ka utwa za lindwa ni mabulatwi a zona, mu si ke mwa ikalelwa. Ki swanelo kuli zeo li bonahale, kono ha si kuli i s'e li mafelelzo a lifasi, batili! 8 Licaba ni mibuso li ta lwanisana. Lizikinyeho li ta ba teñi kafa ni kafa. Tala ni yo na i taba teñi. Mi zeo i ta ba makalelo feela a manyando.

9 ’Haili mina, mu itukise kakuli batu ba ta mi isa kwa likuta. Mu ta shapiwa mwa masinagoge. Mu ta yemiswa fapil'a babusi ni malena kabakala ka, kuli mu fe bupaki ku bona.

  10 Litaba ze Nde li na ni ku hasanyiwa pili mwa macaba kaufela. 11 Cwale, ha ba ta mi swala ku mi isa kwa kuta, mu si ke mwa ikalelwa ni ku bilaela kuli mu ka y'o bulela cwañi. Mu bulele feela se mu ka fiwa ku bulela ka yona nako yeo, kakuli ha si mina mu ka bulela, kono ki Moya o Kenile. 12 Mutu u ta beteka wahabo kuli a shwe. Mushemi u ta eza ewalo ku mwan'a hae, mi bana ba ta lwanisa bashemi ba bona kuli ba bulaiwe. 13 Mu ka toiwa ki batu kaufela kabakala libizo la ka, kono ya ka tundamena ku isa kwa mafelelezo, u ta piliswa.

 

Manyando a matuna

(Mat. 24.15-28; Luk. 21.20-24)

14 ” Kono, mu ta bona Bumaswe bo bu Sabisa bu inzi mo bu sa lukeli. Ya bala a utwisise hande! Fohe, ba ba mwa Judea ba lukela ku sabela kwa malundu.

15 Mutu ya inzi fa situwa sa ndu, a si ke a sinya nako ya ku kena mwa ndu ku y'o nga mwateñi sika se siñwi.

16 Mi ya inzi mwa simu, a si ke a kutela kubo kwa hae. 17 I ta ba bumai bo bu cwañi ku ba ba itwezi ni ba ba anyisa ka mazazi ao! 18 Mu lapele ku kupa ku Mulimu kuli zeo li si ke za ezahala ka nako ya maliha! 19 Kakuli ka ona mazazi ao, ñalelwa i ta ba ye tuna ku fita ye lu boni kaufela ku zwa kwa simuluho, Mulimu h'a bupa linto kamukana, mane ku fitela cwale. Ñalelwa ye kuma fa, ha i sa na ku ba teñi kuya kuile.

  20 Mi kambe Mulimu n'a si ka lata ku kusufaza mazazi a manyando ao, ne ku si ke kwa ba nihaili a li muñwi ya n'a ta banduka. Kono bakeñisa baketwa ba hae, u a kusufalize.

21 ”Mi ya ta mi bulelela kuli Kreste ki yo, kapa Kreste ki yale, mu si ke mwa lumela! 22 Ba ba ipiza bo Kreste ni bapolofita, ka buhata, ba ta ba teñi. Ba ta eza limakazo ni ze komokisa ku puma nihaiba ba ba ketilwe ki Mulimu, ha ku konahala. 23 Mu tokomele cwale, kakuli ni mi lemusize lika kaufela ze ka taha kwapili.

 

Ku taha kwa Jesu ka kanya

(Mat. 24.29-31; Luk. 21.25-28)

24 ”Ka nako yeo, manyando ha s'a felile, lizazi li ta unsufala ni kweli ha i na ku benya!

25 Linaleli li ta wa kwahalimu, mi ze maata za kwahalimu li ta zikinyeha.

26 Honafo, ba ta ni bona, na, Mwan'a Mutu, ni taha fa malu ka maata a matuna ni kanya.

27 Mi kihona ni ta luma mangeloi kwa maneku a mane a lifasi ku kubukanya batu ba ba ketilwe ki Mulimu, ku zwa ko li kalela lifasi ni ku isa mane ko li y'o felela.

 

Tuto ye fiwa ka kota ya feiga

(Mat. 24.32-35; Luk. 21.29-33)

28 ”Mu itute se siñwi ka kota ya feiga. Mitai ya yona ha i shoshela, mu ziba kuli matabula s'a li fakaufi. 29 Kamukwaocwalo mina, ha mu ta bona zeo kaufela li ezahala, mu zibe kuli mafelelezo a fakaufi luli! 30 Kaniti na mi bulelela kuli, lusika lo ha lu na ku fela, lika ze li si ka ezahala kale. 31 Lihalimu ni lifasi li ta fela. Manzwi a ka, ona, h'a na ku fela.”

 

Mulimu ki yena feela ya ziba nako ya mafelelezo

(Mat. 24.36-44)

32 ”Kono, haili ka za lizazi leo ni nako ya teñi, ha ku na ya li ziba, nihaiba mangeloi kwa lihalimu, nihaiba Mwana, konji Ndate feela a nosi, ki yena ya li ziba.

33 Mu libelele. Mu tone, kakuli ha mu zibi nako, kuli i ta ba lili. 34 Ku ta swana sina mutu h'a nga musipili. U siya ndu ya hae, mi u i beya mwa pabalelo ya batanga ba hae. U fa yo muñwi ni yo muñwi musebezi wa hae, mi u laela mulibeleli wa munyako kuli a libelele.

  35 Mu libelele, kakuli ha mu zibi nako y'a ka fita muñ'a ndu, kana ki manzibwana, kamba malungasiku, kamba ha ku patalala, kamba ha li se li pazuzi. 36 A ka swana a taha ka sipundumukela, mi a mi fumana, mu lobezi. 37 Se ni mi bulelela, ni si bulelela batu kamukana, ni li:’ Mu libelele!”‘

14

 

Mulelo wa ku bulaya Jesu

(Mat. 26.1-5; Luk. 22.1-2; Joa. 11.45-53)

1 Ne ku sa siyezi mazazi a mabeli feela kuli ku be ni Mukiti wa Paseka ni wa Linkwa ze si na Mumela. Baprisita ba bahulu ni Baluti ba Mulao ne ba bata mukwa wa ku swala Jesu ka sitalifi kuli ba mu bulaye.

2 Ne ba li: “Ha ku konahali kuli lu mu swale ka nako ya mukiti, mwendi sicaba si ka swana sa tahisa mufili-fili.”

Musali u sela sende fa toho ya Jesu mwa Betania

(Mat. 26.6-13; Joa. 12.1-8)

3 Jesu n'a li mwa Betania, mwa ndu ya Simoni wa mbingwa. N'a inzi fa tafule ha ku kena musali ya lwezi piza ya alabastera ye tezi mafula a sende, a teko ye tuna. A loba mulala wa piza, mi a sela sende fa toho ya Jesu.

4 Cwale ba bañwi se ba nyema mi ba bulelisana, ba li: “Kanti tuso ya ku sinya sende yeo ki ifi? 5 I ne i ka kona ku lekiswa mali a fita fa tuwelo ya silimo kuli mali ao a fiwe babotana!” Mi ba omanya musali yo. 6 Kono Jesu a li: “A mu mu tuhele. Mu mu katalezañi? U ni ezelize kezo ye nde. 7 Kakuli mu ta inanga ni babotana nako kaufela, mi mu ta kona ku ba tusa mo mu latela. Kono na, ha mu na ku inanga ni na kamita.

8 U ezize mw`a n'a konela kaufela. U tozize mubili wa ka, ka sende ku u lukiseza kepelo, nako i si ka fita kale. 9 Kaniti na mi bulelela kuli ko Litaba ze Nde li ta bulelwa mwa lifasi kaufela, musali yo u ta hupulwa ka kezo y'a ezize!”

 

Judasi u lumela ku beteka Jesu

(Mat. 26.14-16; Luk. 22.3-6)

10 Cwale Judasi Isikariota, yo muñwi wa ba lishumi ka ba babeli, a y'o bulelela baprista ba bahulu ka mw`a n'a ka ba fela Jesu. 11 Ha ba utwa cwalo, ba taba, mi ba sepisa ku mu fa mali. Mi Judasi a bata mukwa o munde wo ba ka swala Jesu ka ona.

 

Jesu u ca Mukiti wa Paseka ni balutiwa ba hae

(Mat. 26.17-25; Luk. 22.7-14; 21-23; Joa. 13.21-30)

12 Ka lizazi la pili la Mukiti wa Linkwa ze si na Mumela, fo ne ku tabelwanga lingunyana za Paseka, balutiwa ba Jesu ba mu buza, ba li: “K'o bata kuli lu y'o ku lukiseza mulalelo wa Paseka ki kakai?” 13 Jesu a luma ba babeli kwa balutiwa ba hae, mi a li ku bona: “Mu ye mwa munzi, mi mwateñi mu ta katana mutu ya lwezi ndondo ya mezi. Mu mu latelele. 14 Mw`a ka y'o kena kaufela, mu bulelele muñ'a ndu, mu li: ‘Muluti u li: Sibaka si kai mwa ndu ya hao, moo a ta cela mulalelo wa Paseka ni balutiwa ba hae?’ 15 Mi u ta mi bonisa ili yena muzuzu o mutuna o kwahalimu, ko ku na ni ze tokwahala kaufela. Mona mo mu ta lu lukiseza mulalelo.” 16 Balutiwa ba ya, ba kena mwa hae, mi ba fumana linto kaufela sina mw`a n'a ba bulelezi Jesu. Kiha ba se ba lukisa mulalelo wa Paseka.

17 Lizazi ha li likezi, Jesu a fita ni balutiwa ba lishumi ka ba babeli. 18 Ha ne ba li fa tafule, ba nze ba ca, Jesu a li: “Kaniti na mi bulelela kuli yo muñwi wa mina, ya ca ni na, u ta ni beteka!”

19 Balutiwa ba swaba hahulu, mi yo muñwi ni yo muñwi a mu buza, a li: “Kana ki na, nji?” 20 Jesu a ba alaba, a li: “Ki yo muñwi wa mina ba lishumi ka ba babeli, ya sunsa mwa mukeke ni na. 21 Ee na, Mwan'a Mutu, ni tuha ni shwa sina mo ku ñolezwi bakeñisa ka, kono bumai ki bwa mutu ya ta ni beteka. Bunde kikuli mutu yo kambe n'a si ka pepwa!”

 

Ku tomwa kwa Silyela

(Mat. 26.26-30; Luk. 22.15-20; 1 Bakor. 11.23-25)

22 Ha ne ba nze ba ca, Jesu a nga buhobe, mi a sin'o itumela ku Mulimu, a bu komauna, mi a bu fa balutiwa ba hae, a li: “A mu nge. Se ki mubili wa ka.” 23 Cwale a nga sinwelo sa waine, mi a sin'o itumela ku Mulimu, a ba fa sona. Mi ba nwela ku sona, kamukan`a bona. 24 Kih'a li ku bona: “Se ki mali a ka, mali a tiisa bulikani bwa Mulimu, mi a sululelwa batu ba bañata.”

  25 Kaniti na mi bulelela, ni li: “Ha ni sa na ku nwa waine hape ku fitela lizazi leo ha ni ta nwa ye nca mwa Mubuso wa Mulimu.” 26 Mi ha ba se ba opezi pina, ba zwela kwande, ba liba kwa Lilundu la Likota za Olive.

 

Jesu u sinula kuli Pitrosi u ta mu yaya

(Mat. 26.31-35; Luk. 22.31-34; Joa. 13.36-38)

27 Jesu a li kwa balutiwa ba hae: “Mu ka tuha mu ni sabela kamukan'a mina kakuli ku ñozwi kuli: ‘Ni ta bulaya mulisana, mi lingu li ka hasanela kai ni kai.’

28 Kono, ha ni se ni zuhile kwa bafu, ni ta itangeta kwa Galilea.”

29 Pitrosi a mu bulelela, a li: “Ba bañwi kaufela niha ba ka ku sabela, na, ha ni na ku eza cwalo!” 30 Jesu a li ku yena: “Kaniti, ni li ku wena:’ Bona busihu bo, mukombwe u si ka lila lwa bubeli, wena u ta be s'o ni latuzi halalu!”‘

31 Kono Pitrosi a tiisa hape ka tata, a li: “Nihaili kuli ni bulaiwe ni wena, ha ni na ku ku yaya.” Mi balutiwa ba bañwi kaufela ba bulela cwalo.

 

Jesu u lapela mwa Getsemani

(Mat. 26.36-46; Luk. 22.39-46)

32 Kiha ba fita mwa sibaka se siñwi se si bizwa Getsemani, mi Jesu a bulelela balutiwa ba hae, a li: “A mu ine fa, ha ni sa y'o lapela.” 33 Ibe a nga Pitrosi ni Jakobo ni Joani, a ya ni bona. A kala ku swalwa ki sabo ni ku ikalelwa. 34 Cwale a ba bulelela, a li: “Ni lobehile pilu, mane inge ni ta shwa. Mu siyale fa. Mu tone!” 35 Ha s'a ba siile hanyinyani, a ikwiseza fafasi, mi a lapela, a li: “Ha ne i ka ba kuli kwa konahala, kambe nako ye, ye butuku, ne i si ke ya taha ku na. 36 ”Ndate, u kona linto kaufela. A ku zwise sinwelo se sa manyando ku na. Nihakulicwalo, ku ezwe m'o latela wena, isiñi mo ni latela na!”

37 Mi h'a kuta a ba fumana ba lobezi. Kiha s'a li ku Pitrosi: “Simoni, u lobezi? Kanti ha u koni ku tona nihaili hola i liñwi feela? 38 Mu tone, mi mu lapele kuli mu si ke mwa kena mwa muliko. Pilu ya mutu i lata ku eza hande, kono mubili wa hae wa fokola!”

39 A ya hape, mi a lapela ka manzwi a swana. 40 Cwale a kutela kwa balutiwa ba hae, mi a ba fumana hape ba lobezi, kakuli ne ba ozela hahulu. Mi ne ba sa zibi mo ne ba ka mu alabela.

41 H'a kuta lwa bulalu, a li ku bona: “Kanti mu sa lobezi ni ku pumula? Yela, ku felile! Nako i fitile. A mu bone, na, Mwan'a Mutu, se ni betekwa ni ku beiwa mwa mazoho a baezalibi. 42 A mu yeme, lu zamaye, kakuli ya ni beteka s'a fitile!”

 

Jesu wa swalwa

(Mat. 26.47-56; Luk. 22.47-53; Joa. 18.3-12)

43 Honafo, Jesu a sa bulela cwalo, kwa fita Judasi yo muñwi wa ba lishumi ka ba babeli. N'a zamaya ni sitopa se situna sa batu ba ba ne ba sweli lisabule ni milamu. Ne ba lumilwe ki baprisita ba bahulu, ni Baluti ba Mulao ni bahulu ba sicaba. 44 Mubeteki, yena Judasi, n'a file sitopa seo sisupo, a li: “Munna ye ni ta tubeta, ki yena ye mu bata. Mu mu swale, mi mu ye ni yena mu nze mu tokomela kuli a si ke a mi tobela.”

45 A sin'o fita, Judasi a sutelela ku Jesu, a li ku yena: “Muluti!” Kiha s'a mu tubeta. 46 Cwale ba bañwi ba sutelela ku Jesu, mi ba mu swala. 47 Kono, yo muñwi wa ba ba ne ba li teñi foo, a comola sabule ya hae, mi a puma zebe ya mutanga wa muprisita yo muhulu. 48 Jesu kih'a li ku bona: “Kana kikuli ni sisinyi nji, ha mu tile ni lisabule ni milamu ku t'o ni swala? 49 Ka mazazi kaufela ne ni inanga ni mina. Ne ni lutanga mwa malapa a Tempele, ibo ha mu si ka ni swala. Kono, zeo ha li ezahala, kikuli ku talelezwe ze ñozwi.”

50 Honafo, balutiwa kaufela ba mu siya, mi ba saba.

51 Ne ku na ni mucaha yo muñwi ya n'a latelela Jesu, a icoletile lisila feela. Ba lika ku mu swala. 52 Nihakulicwalo a siya lisila mwa mazoho a bona, mi a mata mapunu.

 

Jesu u iswa kwa Kuta

(Mat. 26.57-68; Luk. 22.54-55, 63-71; Joa. 18.13-14, 19-24)

53 Ba isa Jesu ku muprisita yo muhulu, ko ne ku kopanezi baprisita ba bahulu kaufela hamohocwalo ni bahulu ba sicaba ni baluti ba Mulao. 54 Pitrosi n'a latelezi Jesu a nz'a li kwahule, mane a t'o kena mwa lapa la muprisita yo muhulu. N'a ola mulilo ni balibeleli. 55 Baprisita ba bahulu hamoho ni ba Kuta kaufela ne ba bata bupaki bo ba ka atulela Jesu lifu ka bona, kono ne ba sa bu fumani. 56 Ba bañata ne ba mu tameleza litaba za buhata, kono bupaki bwa bona ne bu sa lumelelani.

57 Ba bañwi ba yema, mi ba mu tama taba ya buhata, ba li: 58 ”Lu mu utwile h'a li: ‘Ni ta tuba Tempele yeo ye yahilwe ki batu, mi ka mazazi a malalu, ni ta be ni yahile i sili ye si ke ya ezwa ka mazoho a batu!’ “

59 Kono ni mwa taba yeo bupaki bwa bona ne bu sa lumelelani.

60 Muprisita yo muhulu kih'a yema fapil'a bona kaufela, mi a buza Jesu, a li: “Kikuli ha u na s'o alaba? Batu ba, ba ku tama ka lifi?” 61 Kono Jesu a kuza, a sa alabi se siñwi. Muprisita yo muhulu a mu buza hape, a li: “Kana ki wena Mesia,

 

Mwan'a Mulimu ya Lumbekwa

62 Jesu a li: “Ee, ki na, mi mu ta ni bona kaufel'a mina, na, Mwan'a Mutu, ni inzi ku la bulyo la Mulimu ya maata, ha ni taha mwa malu a lihalimu.”

63 Cwale Muprisita yo Muhulu a pazula liapalo za hae, mi a li: “Lu sa batelañi lipaki?

64 Mu ikutwezi h'a nyefula? Cwale mina mu liñi?” Kaufel'a bona ba mu beya mulatu wa kuli: u swanelwa ki lifu.

65 Ba bañwi ba kala ku mu kwelaka mati, mi ba mu tama lisila kwa meeto. Ba mu nata ka liñondo, ba li: “Nuha, ya ku natile ki mañi?” Mi balibeleli ni bona ne ba mu bakaula ka mabaka.

 

Pitrosi u latula Jesu

(Mat. 26.69-75; Luk. 22.56-62; Joa. 18.15-18, 25-27)

66 Pitrosi n'a sa li kwande mwa lapa ha ku fita musizana, ili yo muñwi wa batanga ba muprisita yo muhulu. 67 A bona Pitrosi ya n'a ola mulilo, mi a mu talimisisa, a li: “Ni wena, n'o inzi ni Jesu wa Nazareta!” 68 Kono a latula, a li: “Ha ni zibi, mane ha ni utwisisi s'o bulela!” Kih'a zwa, a y'o yema mwa munyako wa lapa. Honafo, mukombwe wa lila. 69 Kono musizana yo a mu bona, mi a bulelela hape ba ba ne ba li teñi moo, a li: “Mutu yo, ki wa ku bona!” 70 Pitrosi a kutela ku latula. Mwamulahonyana, ba ba ne ba li teñi ba bulelela Pitrosi hape, ba li: “Kaniti u yo muñwi wa bona kakuli ni wena u Mugalilea!” 71 Pitrosi kih'a kala ku konka ka luci, a li: “Faa luli, ha ni mu zibi mutu yo ye mu bulela!” 72 Mi i sa li honafo, mukombwe wa lila lwa bubeli. Cwale Pitrosi a hupula linzwi l'a n'a mu bulelezi Jesu, la kuli: “Mukombwe u si ka lila lwa bubeli, u ta be s'o ni latuzi halalu!” Kih'a kala ku lila.

15

 

Jesu fapil'a Pilato

(Mat. 27.1-2, 11-14; Luk. 23.1-5; Joa. 18.28-38)

1 Bu sin'o sa feela, baprisita ba bahulu ba kopana ni bahulu ba sicaba ni Baluti ba Mulao ni ba Kuta kaufela ku lelisana. Kiha ba tama Jesu, ba mu isa ku Pilato, mi ba mu beya mwa maata a hae. 2 Pilato a mu buza, a li: “Kana luli ki wena mulena wa Majuda?” Jesu a mu alaba, a li: “Ee, ki na, sina m'o bulelela!” 3 Haili baprisita ba bahulu, bona, ne ba nze ba tameleza Jesu litaba ze ñata. 4 Pilato kih'a mu buza hape, a li: “Ha u ikalabeli? Ha u utwi litaba ze ñata ze ba ku tameleza?” 5 Kono a kutumana feela, mi taba yeo ya komokisa Pilato hahulu.

 

Jesu u atulelwa lifu

(Mat. 17.15-26; Luk. 23.13-25; Joa. 18.39-19.16)

6 Kamita, ka nako ya Mukiti wa Paseka, Pilato n'a lukululelanga sicaba mupantiti ye ne ba kupa kaufela. 7 Mi mwahal'a batu ba ba ne ba li mwa tolongo ka nako yeo, ne ku na ni munna ya n'a bizwa Barabasi, ya n'a bulaile mutu mwa mufili-fili wa petuhelo. 8 Batu kamukana kiha se ba kambamela ku Pilato, mi ba kala ku kupa kuli a ba ezeze mw'a n'a ezezanga. 9 Pilato a ba alaba, a li: “Na, mu lata kuli ni mi lukululele mulena wa Majuda, nji?” 10 Kakuli n'a limbuluzi baprisita ba bahulu, kuli ha ba mu tiselize Jesu, i n'e li ka muna feela. 11 Kono baprisita ba bahulu ba susueza nyangela ku kupa Pilato kuli a ba lukululele Barabasi, isiñi u sili. 12 Pilato a buza nyangela hape, a li: “Hakulicwalo, mu bata kuli ni eze cwañi ka yena ye mu biza mulena wa Majuda?” 13 Ba huwa, ba li: “U mu kokotele fa sifapahano!” 14 Pilato a ba buza, a li: “Bumaswe bw'a ezize, ki bufi?” Kono ba huwa ka ku tiisa, ba li: “U mu kokotele fa sifapahano!. 15 Pilato, ka ku lakaza ku tabisa nyangela, a ba lukululela Barabasi. Kih'a laela kuli Jesu a natiwe litupa, mi a ba fa yena kuli ba y'o mu kokotela fa sifapahano.

 

Masole ba sheununa Jesu

(Mat. 27.27-31; Joa. 19.2-3)

16 Masole ba sulaeta Jesu ku mu isa kwa lapa la mubusisi, mi ba biza ba bañwi kaufela ba sitopa sa bona kuli ba t'o kopanela mwateñi. 17 Ba apesa Jesu kubo ye fubelu, mi ba tata kali ya miutwa ku i eza inge kuwani ya bulena, mi ba i beya kwa toho ya hae. 18 Mi ba kala ku mu lumelisa, ba li: “Yo-shoo, Mulena wa Majuda!” 19 Ba mu nata kwa toho ka mulamu, ba mu kwelaka mati, mi ba kubama, ba mu showelela. 20 Ba sin'o mu sheununa cwalo, ba mu tubulisa kubo ye fubelu, mi ba mu apesa liapalo za hae. Kiha ba mu isa fande kuli ba y'o mu kokotela fa sifapahano.

 

Jesu u kokotelwa fa Sifapahano

(Mat. 27.32-44; Luk. 23.26-42; Joa. 19.17-27)

21 Mutu wa munzi wa Sirene, ya n'a bizwa Simoni, ili ndat'ahe Alexandere ni Rufusi, n'a fita ku zwa kwa masimu. Masole ba mu hapeleza ku lwala sifapahano sa Jesu. 22 Ba isa Jesu mwa sibaka se si bizwa Gologota, ki kuli: Sibaka sa Katendele. 23 Ba mu tiseza waine ye ne zwakilwe ni mulyani o bizwa mira, kono Jesu a hana ku i nwa. 24 Kiha ba mu kokotela fa sifapahano, mi ba ikabela liapalo za hae ka ku laula s'a ta fumana mutu ni mutu.

25 I n'e li ka hola ya buketalizoho ka ze ne kakusasa ha ba mu kokotela fa sifapahano. 26 Mulatu w`a n'a atulezwi lifu ka ona n'o ñozwi cwana fa pulanga: “Mulena wa Majuda”. 27 N'a kokotezwi fa sifapahano hamoho ni lisinyi ze peli, se siñwi ku la bulyo, se siñwi ku la nzohoto. 28 Kamukwaocwalo kwa talelezwa se ne si ñozwi kuli: “U balelezwi hamoho ni lisinyi.”

29 Ba ba ne ba ipitela, ne ba mu shwaula ba nze ba nyunga litoho. Ba li: “Ehee, yela wena, ya n'a bata ku tuba Tempele ni ku i yaha sinca ka mazazi a malalu!

30 A ku ipilise i sa li wena. U tuluke fa sifapahano foo!” 31 Mi baprisita ba bahulu ni Baluti ba Mulao ne ba mu eza lishea mwahal'a bona, ba li: “U pilisize ba bañwi, kono h'a koni ku ipilisa ili yena! 32 Mesia, Mulena wa Isilaele, a tuluke cwale fa sifapahano! Lu bone, mi lu lumele!” Mane ba ba ne ba takisizwe ni yena ne ba mu shubaula ni bona.

 

Lifu la Jesu

(Mat. 27.45-56; Luk. 23.44-49; Joa. 19.28-30)

33 Lizai ha li li fahal`a toho, lififi la apesa naha kaufela ka lihola ze talu. 34 Jesu kih`a huwa ka linzwi le lituna, a li: “Eloi, Eloi, lama sabaktani?” kikuli “Mulimu wa ka, Mulimu wa ka, u ni tuheleziñi?”

  35 Ba bañwi ba ba ne ba inzi fakaufi ba mu utwa, mi ba li: “Mwa utwa, u biza Elia!” 36 Cwale, yo muñwi a mata, a y'o cupwa siponji mwa sino se si baba se si bizwa vinega, a si beya kwa lutaka, mi a si suteleza ku Jesu kuli a nwe, a nz'a li: “A mu tuhele, lu bone kapa Elia u ka t'o mu pahulula!”

37 Cwale Jesu a huwa ka linzwi le lituna, mi a shwa.

38 Lisila la mwa Tempele la pazuha fahali ku kalela kwahalimu ku tisa fafasi.

39 Muzamaisi wa masole wa Muroma, ya n'a yemi fapil'a Jesu, h'a bona mw'a shwezi, a li: “Kaniti mutu yo ne li Mwan'a Mulimu!” 40 Basali ba bañwi ne ba li teñi foo, mi ne ba talimezi ba li kwahulenyana. Mwahal'a bona ne ku na ni Maria wa munzi wa Magdala, ni Maria m'ahe Jakobo yo munyinyani ni Josefa, ku beya Salome.

41 Ne ba latelezi Jesu ni ku mu babalela ha n'a li mwa Galilea. Ne ku na ni basali ba bañwi ba bañata ba ba ne ba kambamezi ni yena kwa Jerusalema.

 

Jesu u beiwa mwa libita

(Mat. 27.57-61; Luk. 23.50-56; Joa. 19.38-42)

42 Ne i s'e li manzibwana, mi n'e li lizazi la buitukiso bwa Mukiti wa Paseka, lona le li tatamwa ki la Pumulo. 43 Mi Josefa wa munzi wa Arimatea a taha. I n'e li yo muñwi wa Kuta ya Majuda, mutu ya kutekeha, ya n'a libelezi ni yena ku taha kwa Mubuso wa Mulimu. A itiisa pilu, a ya ku Pilato, mi a kupa situpu sa Jesu. 44 Pilato a komoka h'a utwa kuli s'a tokwahalile. Kih'a biza muzamaisi wa masole, mi a mu buza kana Jesu s'a shwile kale. 45 Ha s'a utwile ku muzamaisi wa masole kuli ku cwalo, a fa Josefa situpu. 46 Josefa a leka lisila le linde le lisweu, a pahulula situpu fa sifapahano, a si putela mwa lisila leo, mi s`a si beya mwa libita le ne li cakuzwi mwa licwe. Kih'a pikuluseza licwe le lituna fa munyako wa libita. 47 Maria wa mwa Magdala ni Maria m'ahe Josefa ne ba bona, ba talimezi mw'a n'a bulukiwa.

16

 

Zuho ya Jesu

(Mat. 28.1-8; Luk. 24.1-12; Joa. 20.1-10)

1 Lizazi la Pumulo ha li se li felile, Maria wa mwa Magdala, ni Maria m'ahe Jakobo, ni Salome ba leka mafula a nunka hande ku y'o toza situpu sa Jesu. 2 Mi ka lizazi la pili la sunda, ba pakelela kwa libita, lizazi li sa z'o pazula. 3 Ne ba ipuza, ba li: “Ki mañi ya ta lu pikuluseza licwe le li fa munyako wa libita?” 4 Kono ha ba nanula meeto, ba bona kuli licwe ne li se li pikulusizwe kale, ibo n'e li le lituna luli. 5 Ha ba kena mwa libita, ba bona mucaha ya n'a inzi ku la bulyo, ya apezi siapalo se sitelele, se sisweu, mi ba saba.

6 Kono a ba bulelela, a li: ‘Mu si ke mwa saba. Mu bata Jesu wa Nazareta ya n'a kokotezwi fa sifapahano.U zuhile kwa bafu! H'a yo mu. A mu bone fo ne ba mu lobalize. 7 Cwale mu ye, mu y'o bulelela balutiwa ba hae, sihulu Pitrosi, kuli: ‘U itangetile kwa Galilea ko mu ka y'o mu bona sina ha n'a mi bulelezi.’ “

8 Kiha ba zwa mwa libita, mi ba mata kakuli ne ba kenezwi ki sabo, ni ku ngangama. Mi ha ku na se ba bulelezi mutu kakuli ne ba sabile hahulu.

 

Jesu u iponahaza ku Maria wa mwa Magdala

(Mat. 28.9-10; Joa. 20.11-18)

9 Ka lizazi la pili la sunda, i sa li kakusasa, Jesu ha s'a zuhile kwa bafu, a iponahaza pili ku Maria wa mwa Magdala, ya n'a zwisizwe ki Jesu mioya ye maswe ye supile. 10 Maria a y'o kandeka taba yeo ku ba ba ne ba inanga ni Jesu, ba ba ne ba swabile, ba silisa. 11 Kono ha ba utwa a bulela kuli Jesu wa pila, ni kuli u mu boni, ha ba si ka mu kolwa.

 

Jesu u iponahaza kwa balutiwa ba babeli

(Luk. 24.13-35)

12 Mwamulaho, Jesu a iponahaza ka sibupeho si sili ku ba babeli ba ku bona, ha ba ne ba li mwa nzila, ba ya kwa matakanyani. 13 Ba kuta ku y'o bulelela balutiwa ba bañwi, kono ni ku bona hape ha ba si ka kolwa.

 

Jesu u iponahaza kwa balutiwa ba lishumi ka a li muñwi

(Mat. 28.16-20; Luk. 24.36-49; Joa. 20.19-23; Lik. 1.6-8)

14 Jesu a iponahaza lwa mafelelezo kwa balutiwa ba lishumi ka a li muñwi ha ne ba inzi fa tafule ba ca. A ba nyaza ka ku tokwa tumelo ni ka bungulunde bwa bona, ha ba palezwi ku lumela ba ba mu boni ha s'a zuhile kwa bafu. 15 Mi a li ku bona: “Mu ye mwa lifasi kaufela, mi mu lute batu kamukana Litaba ze Nde.

16 Ya ta lumela mi a kolobezwa, u ta piliswa, kono ya ta hana ku lumela, u ta fiwa mulatu. 17 Ba ba ta lumela, ba ta eza limakazo ze maata. Ba ta leleka mioya ye maswe ka libizo la ka. Ba ta bulela lipuo ze nca.

18 Ba ta swala linoha ka mazoho, mi niha ba ka nwa mabeela ha ba na ku telwa ki kozi. Ba ta beya mazoho fahalimw'a bakuli, mi ba ta fola.”

 

Jesu u kutela kwa lihalimu

(Luk. 24.50-53; Lik. 1.9-11)

19 Mulena Jesu ha s'a felize ku bulela cwalo ni bona, a nanulelwa kwa lihalimu, mi a ina ku la bulyo la Mulimu. 20 Balutiwa ba ya, mi ba y'o luta Litaba ze Nde kai ni kai. Mulena n'a sebelisana ni bona, mi n'a tiisa tuto ya bona ka ku ba fa maata a ku eza limakazo.