1PE LO61.SFM 30/10/2003 L. L. M LOZI ST1 MONGU ZAMBIA

PITROSI

LIÑOLO LA PILI LA

PITROSI

 

Litumeliso

 

1

1 Liñolo le, li zwa ku Pitrosi, muapositola wa Jesu Kreste. Li ñolelwa ba ba ketilwe ki Mulimu, ba ba hasani ni ku y'o koza mwa manaha a Ponte, ni Galatia, ni Kapadosia, ni Asia, ni Bitinia. 2 Mu ketilwe kabakala mulelo wa Mulimu Ndate, kuli mu eziwe batu ba ba kenile ka Moya wa hae, i li kuli mu kone ku utwa Jesu Kreste ni ku keniswa ka mali a hae.

 Mu atelwe ki sishemo ni kozo.

 

Sepo ye tiile

3 A lu itumeleñi ku Mulimu Ndat'a Mulen'a luna Jesu Kreste! Kabakala musa wa hae o mutuna, u lu file bupilo bo bunca ka ku zusa Jesu Kreste kwa bafu. Kezo ye, i lu fa ni sepo ye tiile. 4 Lu libelezi limbuyoti ze tuna zeo Mulimu a li bulukela batu ba hae. U li bulukela mina kwa lihalimu, ko li si ke za bola, kamba ku sinyeha kamba ku unda. 5 Ki za mina, mina ba ba babalezwi ki maata a Mulimu ka tumelo, sina ha mu libelezi ku piliswa ko ku ta bonahala kwa mafelelezo a linako.

6 Ze, li mi tabise, nihaike ku sa tokwahala kuli mu be ni maswabi nakonyana, kabakala manyando a mifuta-futa. 7 Tuso ya manyando ao ki ku bonahaza kuli tumelo ya mina ki tumelo ye tiile. Nihaili gauda, ye kona ku sinyeha, i likwa ka mulilo. Cwalehe, tumelo ya mina, ye fita gauda kwa butokwa, i swanezi ku likwa ni yona, i bonise ku tiya kwa yona. Kifo, mu ta kona ku lumbiwa, ni ku fiwa kanya ni likute Lizazi leo Jesu Kreste a ta bonahazwa. 8 Mwa mu lata niha mu si ka mu bona. Mu lumela ku yena niha mu sa mu boni cwale. Ki lona libaka ha mu nyakalalile ka mukwa o sa konwi ku taluswa. 9 Mu eza cwalo kakuli mu fumani mupuzo wa tumelo ya mina, i li ku piliswa kwa mioya ya mina.

10 Ki kona ku piliswa ko, ko ku batisisizwe ka tokomelo ki bapolofita, ba nze ba buzisisa hande linto kaufela. Ki bona ba ba polofitile bakeñisa mpo yeo Mulimu n'a bata ku mi fa yona. 11 Ba likile ku ziba nako, ni mukwa wo, lika ze mo ne li ka ezahalela. Moya wa Kreste o n'o li ku bona, n'o ba bonisa lika ze. Moya n`o ba sinulela manyando a Kreste a n`a ka latelelwa ki kanya. 12 Mulimu, u sinulezi bapolfita bao kuli litaba ze ne ba filwe ku bulela ne li sa supi bona, kono ne li supa mina. Litaba zeo mu li amuhezi cwale. Ba ba luta Litaba ze Nde za Mulimu ka maata a Moya o Kenile o zwa kwa lihalimu, ba mi lutile zona. Mane ni ona mangeloi kasibili a lakaza ku li ziba.

 

Ku pilwe ka ku kena ni ka lilato

13 Kabakaleo, mu itukiseze ku sebeza. Mu libelele, mi mu beye sepo ya mina kaufela fa litohonolo le mu ta fiwa, Jesu Kreste h'a s'a bonahalizwe. 14 Mu utwe Mulimu, mi mu si ke mwa lumelela bupilo bwa mina ku fetulwa ki litakazo ze ne mu na ni zona, ha ne mu si ka ba kale ni zibo. 15 Ya mi bizize u kenile. Cwale ni mina mu be ba ba kenile ku ze mu eza kaufela. 16 Kakuli ku ñozwi kuli: “Mu swanezi ku kena, kakuli na ni kenile.”

17 Ha mu lapela Mulimu, mu mu biza Ndat'a mina, yena ya atula batu kamukana ka ku swana, kikuli ka ku ya ka musebezi o ezizwe ki yo muñwi. Cwalehe, mu mu sabe nako kaufela ha mu sa pila mwa fafasi. 18 Kakuli mwa ziba se si lifilwe kuli mu lukululwe mwa bupilo bo bu si na tuso, bo mu hozize ku bo kukw'a mina. Ha ku si ka ezwa ka lika ze sinyeha feela sina silivela kamba gauda, 19 batili, kono mu lukuluzwa*** ka mali a butokwa a Kreste ya ezizwe sitabelo sina ngu ye si na mulatu, ye si na koli. 20 Kreste n'a ketilwe ki Mulimu, lifasi li si ka eziwa kale, mi u til'o bonahazwa mwa mazazi a, a mafelelezo, kabakala mina. 21 Ki ka yena ha mu lumela ku Mulimu, ya mu zusize kwa bafu ni ku mu fa kanya. Mi cwale ki ka yena ha mu na ni tumelo ni sepo ku Mulimu.

22 Mu ikenisize ka ku latelela niti, kuli mu kone ku ba ni lilato luli kwa balumeli ba bañwi. Mu latane, ka pilu ya mina kaufela. 23 Kakuli, ka linzwi la Mulimu le li pila, le li sa feli, mu pepilwe sinca sina bana ba mutu ya sa shwi, isiñi ya shwa. 24 Sina mo ku ñolezwi, kuli:

“Batu kamukana ba swana sina

bucwañi bwa mwa naheñi,

mi kanya ya bona kaufela

i swana ni palisa ya teñi.

Bucwañi bwa oma,

ni palisa ya bona ya tutuleha.

25 Kono linzwi la Mulena li ina kuyakuile.”

Le, ki lona linzwi le li tisizwe ku mina ki Litaba ze Nde.

 

2

 

Licwe le li pila ni Sicaba se si kenile

1 Hakulicwalo, mu lisele bumaswe kaufela, bupumi ni buikuhumuso, muna ni lusinyo! 2 Mu swane ni limbututu ze sa z'o pepwa. Mu nyolelwe nako kaufela mabisi a kenile a Moya, i li kuli ka ku a nwa, mu kone ku hula ni ku piliswa. a kenile a Moya, i li kuli ka ku a nwa, mu kone ku hula ni ku piliswa. 3 Sina mo ku ñolezwi: “Mu se mu utwile bunde bwa sishemo sa Mulena.”

4 Mu tahe ku Mulena, ku lona licwe le li pila, le li hanilwe ki bayahi, kono le li ketilwe, ili la butokwa, ki Mulimu. 5 Ni mina mu tahe, mi mu t'o sebeliswa sina macwe a pila kwa ku yaha tempele ya moya. Mwateñi, mu ta ba sitopa sa baprisita ba ba kenile, bao musebezi wa bona i ta ba wa ku iseza Mulimu litabelo za moya ze ta amuheleha ku yena ka Jesu Kreste. 6 Ku ñozwi kuli:

“Ni ketile licwe la butokwa

le ni toma cwale mwa lilulu la Sione.

Ya ta lumela ku lona kaufela h'a

na ku waba ni kamuta.”******

7 Licwe le ki la butokwa hahulu ku mina ba ba lumela. Kono haili ku ba ba sa lumeli:

“Licwe le li hanilwe ki bayahi

kuli ha li na tuso,

ki lona le li fetuhile licwe

la mwa lilulu.”

8 Mi ku ñozwi hape, kuli:

“Le, ki lona licwe

fo ba ka sitatala batu,

licwe le li ta ba wisa.”

Ba sitatile  kakuli ba hanile ku lumela linzwi. Yeo, i n'e li tato ya Mulimu ku bona. 9 Kono mina mu lusika lo lu ketilwe, baprisita ba Mulena, sicaba se si kenile, batu ba Mulimu. Mu ketezwi ku talusa misebezi ye komokisa ya Mulimu, yena ya mi zwisize mwa lififi ku mi tisa mwa liseli la hae le li komokisa.

10 Pili ne mu si batu ba Mulimu, kono cwale mu sicaba sa hae. Pili ne mu sa zibi sishemo sa Mulimu, kono cwale mu si fumani.

 

Balumeli ba pile sina Batanga ba Mulimu

11 Balikani ba ka, na mi kupa, sina ha mu li bazwahule ba ba til'o koza feela mwa lifasi le, kuli mu kauhane ni litakazo ze maswe ze lwanisa moya. 12 Mu be ni mikwa ye minde mwahal'a bahedeni, kuli niha ba ka mi tameleza kuli mu eza ze maswe, ba lemuhe ze nde ze mu eza, mi ka mukwa wo ba lumbe Mulimu zazi l'a ka taha.

13 Kabakala Mulena, mu ipeye kwatas'a ba ba filwe maata a ku zamaisa, pili kwatas'a mulena, yena muzamaisi yo muhulu. 14 Mu ipeye ni kwatas'a babusi ba ba lumilwe ki yena ku fa ba ba eza maswe mulatu ni ku lumba ba ba eza hande. 15 S'a lata Mulimu kikuli mu kuzise ka likezo ze nde, ze mu eza, lipulelo za bukuba za batu ba ba sa zibi se siñwi. 16 Mu pile sina batu ba ba lukuluhile. Nihakulicwalo, mu si ke mwa sebelisa tukuluho ya mina ku kwahela bumaswe, kono mu pile sina batanga ba Mulimu. 17 Mu kuteke batu kaufela, mu late balumeli ba bañwi, mu sabe Mulimu, mi mu kuteke mulena.

 

Mutala wa Manyando a Kreste

18 Mina batanga, mu ipeye kwatas'a malen'a mina, mi mu ba bonise likute la mina kaufela, isiñi feela ku ba ba na ni sishemo ni musa, kono ni ku bona ba ba na ni buhali. 19 Luli ki nto ye nde ku itiisa mwa manyando, ha lu nyandiswa ka ona niha lu si na mulatu, kakuli ki mw'a latela Mulimu.

20 Mupuzo o mu ta fumana ki ufi ka ku itiisa ha mu natelwa ze mu fosize? Kono haiba mu itiisa mwa manyando, niha mu ezize hande, fohe ki nto ye nde fapil'a Mulimu. 21 Ki sona s'a mi bizelize Mulimu, Kreste kasibili, u mi nyandezi, mi u mi siyezi mutala, kuli mu hate mw'a hatile. 22 Ha ku na sibi s'a ezize, mi ha ku na ya mu utwile a bulela buhata ka mulomo wa hae.

23 Ha n'a tapaulwa, h'a si ka alaba ka litapa. Ha n'a nyandishwa, h'a si ka fumbela, kono a beya sepo ya hae ku Mulimu, muatuli ya lukile.

24 Kreste kasibili u lwezi libi za luna fa mubili wa hae, fa sifapahano, kuli lu shwe kwa sibi mi lu pile mw'a latela Mulimu. Ki ka mañiba a hae ha mu folisizwe.

25 Ne mu swana ni lingu ze latehile. Kono cwale mu kutiselizwe ku yena ya li mulisana ni mubuluki wa mioya ya mina.

 

3

 

Banna ni Basali

1 Kamukwaoswana, ni mina basali, mu ipeye kwatas'a banna ba mina, kuli haiba ba bañwi ku bona ba sa lumeli linzwi la Mulimu, ba tiswe mwa tumelo ki mikwa ya mina. Ha ku tokwahali kuli mu bulele linzwi.

2 Ba ta iponela i sa li bona ku kena ni ku luka kwa mikwa ya mina. 3 Mu si ke mwa lika ku ekeza kwa bunde bwa mina, ka ze bonahala kwande, i be ka mo mu lukiseza milili ya mina, kamba ka lifaha za gauda ni liapalo ze nde ze mu ka apala.

4 Kono bunde bwa mina i be bwa mwahali, ili bunde bo bu sa feli, bwa pilu ye kuzize, ye na ni musa, ya butokwa mwa meeto a Mulimu. 5 Kakuli ka nako ye felile, ki mo ne ba ezeza basali ba ba kenile, ba ba ne ba sepile Mulimu. Ne ba ikabisa ka ku utwa banna ba bona, ba ipeyile kwatas'a bona. 6 Sara n'a li cwalo. N'a utwa Abrahama, mane n'a mu bizanga “Mulen'a ka.” Ni mina mu bana ba hae ba basali ba Sara cwale, haiba mu eza ze nde, mi mu sa sabiswi ki se siñwi.

7 Ni mina banna cwalo, mu pile ni basali ba mina, mu nze mu hupula kuli ki batu ba ba fokola. Kabakaleo mu ba kuteke, kakuli ni bona, hamoho ni mina, ba ta amuhela mpo ya bupilo ku Mulimu. Mu eze cwalo kuli litapelo za mina li si ke za paleliswa ki se siñwi.

 

Ku nyandisezwa ku luka

8 Ka ku feleleza, ni li cwana. Kaufel'a mina mu be ni mihupulo ni maikuto a li mañwi. Mu latane sina bana ba mba, mi mu be ni musa ni buikokobezo. 9 Mu si ke mwa kutisa bumaswe ka bumaswe, kamba litapa ka litapa. Kono mu tohonolofaze, kakuli ki litohonolo l'a sepisize ku mi fa lona Mulimu, muta a mi biza. 10 Sina mo ku ñolezwi, kuli:

“Mutu kaufela ya bata ku ikola bupilo

ni ku ba ni mazazi a tezi tabo,

a tuhele ku bulela ze maswe,

ni buhata.

11 A tuhele ku eza ze maswe,

mi a eze ze nde.

A batisise kozo, mi a i tundamene.

12 Kakuli Mulimu u talimezi

ba ba lukile,

mi kamita u teeleza litapelo za bona.

Kono ba ba eza ze maswe,

wa ba kelyeka!”

13 Ki mañi ya ka mi utwisa butuku haiba mu tundamezi ku eza ze nde? 14 Mane niha mu ka nyanda kabakala ku eza hande, mu na ni litohonolo! Mu si ke mwa saba batu, mi mu si ke mwa filikana.

15 Kono mu be ni likute ku Kreste mwa lipilu za mina, a be yena Mulen'a mina. Mu itukiseze ka nako kaufela ku alaba mutu ufi ni ufi ya kupa ku talusezwa ka sepo ye mu na ni yona. 16 Kono mu eze cwalo ka musa ni ka likute. Mu be ni lizwalo le linde, kuli ha mu tamiwa litaba, bao ba ba bulela ze maswe ka mikwa ya mina ye minde, sina ha mu li balateleli ba Kreste, ba te ba swabiswe ki ze ba bulela. 17 Kakuli ki ko kunde ku nyandisezwa likezo ze nde, haiba ki yona tato ya Mulimu, ku fita ku nyandisezwa likezo ze maswe. 18 Kanti yena Kreste kasibili u mi shwezi. U shwezi libi za batu hañwi feela .Yena ya n'a li yo munde, u shwezi libi za batu hañwi feela. U shwezi ba ba maswe kuli a mi ise ku Mulimu. Niha ku shwile mubili wa hae, moya wa hae, ona, u pilisizwe. 19 Mi ki ka moya kuli u il'o luta mioya ye si ka lukululwa, ko i sa tamezwi. 20 Yeo ki yona mioya ya ba ba ne ba hanile ku utwa Mulimu, ha n'a s'a litezi ka pilu-telele, mazazi a o Nuwe ha n'a sa yaha Aleka. Batu ba sikai, ba 8****** feela ba ba ne ba keni mwa Aleka, ki bona ba ba pilisizwe kwa mezi.

21 Mezi ao, n'a swanisa kolobezo, ili yona ye mi pilisa ka nako ye. Kolobezo yeo, ha si ya ku tapisa masila a fa mubili, kono ki ya ku kupa ku Mulimu lizwalo le linde. Kolobezo i mi pilisa ka zuho ya Jesu Kreste. 22 U ile kwa lihalimu u inzi ku la bulyo la Mulimu ku busa mangeloi ni ba ba na ni maata kaufela mwa lihalimu.

4

 

Mwa bupilo ku be ni petuho

1 Cwale ka ku bona kuli Kreste u utwile butuku mwa mubili kabakala mina, mu swanezi ku itiisa ni mina ka ku ba ni muhupulo o swana ni wa Kreste. Kakuli ya utwile butuku mwa mubili wa hae u tobohile sibi. 2 Cwale, ku zwa nako yona ye, mu swanezi ku pila bupilo bwa mina mwa lifasi mo ka ku latelela tato ya Mulimu, isiñi litakazo za mibili ya mina. 3 Mwa mazazi a felile, mu sinyize nako ye telele mu nze mu eza ze latiwa ki bahedeni. Bupilo bwa mina bu sinyehezi mwa buhule, litakazo ze maswe ni butahwa, mwa likopano mo ku ciwa ni ku nwiwa maswe ni mwa masila a ku lapela milimu ya buhata. 4 Mi cwale bahedeni ba komokile ha mu sa kopani ni bona mwa buhule ni mwa ku sa ipabalela, mi ba mi nyefula. 5 Kono ba ta ikalabela ili bona fapil'a Mulimu ya itukiselize ku atula ba ba pila ni ba ba shwile. 6 Ki ka lona libaka le, Litaba ze Nde za Mulimu ha ne li iz'o lutiwa ni ku bona ba ba shwile, ili ba ba atuzwi mwa bupilo bwa bona, sina mo ba atulelwa batu kamukana. Ba li lutilwe kuli ka moya ba kone ku pila sina mw'a pilela Mulimu.

 

Likombwa ze lukile za Mulimu

7 Mafelelezo a lika kaufela a fakaufi. Kifohe, mu pile ka ku iswala, mi mu tone kuli mu kone ku lapela. 8 Sihulu, mu be ni lilato la niti yo muñwi ku yo muñwi, kakuli lilato li kwahela libi ze ñata.

9 Mandu a mina a kwalulelwe ba bañwi mu sa tongoki. 10 Yo muñwi ni yo muñwi wa mina a sebelise mpo y'a filwe ki Mulimu ka tusa ba bañwi, sina sikombwa se si sebelisa hande limpo ze fapani ze zwa ku Mulimu. 11 Ya kutaza kaufela, u swanezi ku kutaza ka manzwi a Mulimu. Ya sebeleza ba bañwi, u swanezi ku ba sebeleza ka maata a' fiwa ki Mulimu, kuli Mulimu a lumbiwe mwa lika kaufela ka Jesu Kreste. Kanya ni maata ki za hae kamita ni mita! Amen.

 

Ku nyandela bulumeli

12 Balikani ba ka, mu si ke mwa komokiswa ki muliko wa manyando ao mu li ku ona, inge mu tahelwa ki nto ye mu si ka twaela. 13 Kono, mu tabe kakuli mu ikabela manyando a Kreste, i li kuli zazi leo kanya ya hae i ka bonahazwa, ni mina mu be ni tabo ye tuna. 14 Haiba mu nyefulwa kakuli mu balateleli ba Kreste, mu na ni litohonolo. Kakuli ku bonahala cwalo kuli Moya wa kanya, Moya wa Mulimu, u tile fahalimw'a mina. 15 Ku si ke kwa bonahala nihaiba a li muñwi ku mina ya nyandiswa kakuli ki mubulai, kamba lisholi, kamba sisinyi, kamba ya lika ku ikenya mwa litaba za ba bañwi. 16 Kono haiba yo muñwi a nyanda kakuli ki mulumeli, a si ke a swaba, kono a itumele ku Mulimu h'a kona ku ipiza ka libizo la Kreste.

17 Nako i se i fitile kuli katulo i kale, mi batu ba Mulimu ki bona ba ba ta atulwa pili. Cwale, haiba katulo i kala ka luna, ku ta ba cwañi ku bona ba ba sa lumeli Litaba ze Nde za Mulimu? 18 Sina mo ku ñolezwi, kuli:

“Haiba ku tata kuli

batu ba ba lukile ba piliswe,

ku ta ba cwañi ku ba ba sa lumeli

ni kwa baezalibi?”

Ku ta ba cwañi ku ba ba sa lumeli

ni kwa baezalibi?”

19 Cwalehe, ba ba nyanda ka ku eza tato ya Mulimu, ba zwelepili ba nze ba eza hande, mi ba beye sepo ya bona kaufela ku Mubupi wa bona ya sepahala.

5

 

Ku babalelwe mutapi wa Mulimu

1 Cwale, ni eleza mwahal'a mina ba ba li bahulu ba keleke. Ni na, ni muhulu. Ni paki ya manyando a Kreste, mi ni na ni kabelo mwa kanya ye ta bonahala. Se ni kupa ku mina ki se. 2 Mu be balisana ba mutapi w'a mi file Mulimu. Mu u lise ka ku tabela, sina mw'a latela Mulimu, isiñi ka ku hapelezwa. Mu eze musebezi wa mina, isiñi ka takazo ya ku fumana mali kono i li ya ku lata ku sebeza.

3 Mu si ke mwa lika ku busa bao mu filwe ku ba babalela, kono mu be mutala kwa mutapi. 4 Mi Imutongo yo Muhulu h'a ka fita, mu ta fiwa mupuzo wa kanya, wa bulena, o sa sinyehi.

5 Kamukwaoswana, ni mina micaha mu ipeye kwatas'a banna-bahulu. Mu be ni buikokobezo kaufel'a mina, mu nze mu tusana hande. Kakuli ku ñozwi kuli. “Mulimu u hanyeza baikuhumusi, kono u shemuba ba ba ikokobeza.”

6 Kabaka leo, mu ikokobeze mwatas'a lizoho le li maata la Mulimu, kuli a mi hulise ka nako ye swanela.

7 Mu nepele lipilaelo za mina kaufela ku yena, kakuli wa mi babalela.

8 Mu tokomele, mi mu libelele! Sila sa mina, Satani, u zamaya a potoloha a nz'a lila sina tau ye bata yo i ka ca. 9 Mu tiye mwa tumelo ya mina mi mu mu hane, kakuli mwa ziba kuli banabahabo mina ba balumeli, ba ba hasanezi kai ni kai mwa lifasi, ba mwa manyando a swana ni a mina. 10 Kono ha mu se mu nyandile nakonyana, Mulimu ya na ni sishemo kaufela, ya mi bizelize ku tabela kanya ya hae ye sa feli ka ku kopana ni Kreste, u ta mi kondisa ili yena, a mi tiise, a mi fe maata, mi a mi tome fa mutomo o tiile. 11 Maata ki a hae kuya-kuile! Amen.

 

Litumeliso za mafelelzo

12 Ni mi ñolezi liñolo le li kuswani le, ka ku tusiwa ki mwanahabo luna Silvano, ye ni bona kuli wa sepahala. Ni bata ku mi eleza ni ku mi kolwisa, ka bupaki bwa ka, kuli se ki sona sishemo sa Mulimu sa niti. Mu tiyele ku sona.

13 Keleke ye mwa Babilona, ili ye ketilwe ki Mulimu ni yona, ya mi lumelisa, hamohocwalo ni mwan'a ka Mareka.

14 Mu tubetane ka lilato la balumeli.

Kozo i be ni mina kaufela ba ba li ku Kreste.