2PE LO62.SFM 30/10/2003 L. L. M. LOZI ST1 MONGU ZAMBIA

PITROSI

LIÑOLO LA BUBELI LA

PITROSI

 

Litumeliso

 

1

1 Liñolo le, li zwa ku Simoni Pitrosi, mutanga ni muapositola wa Jesu Kreste.

 Li ñolelwa ba ba filwe tumelo ya butokwa, ye swana ni ya luna, ka ku luka kwa Mulimu ni Mupilisi wa luna Jesu Kreste.

2 Mu fiwe sishemo ni kozo ka buñata, kabakala ku ziba Mulimu ni Jesu Mulen'a luna.

 

Ku biza ni ku keta kwa Mulimu

3 Ka maata a bumulimu bwa hae, Mulen'a luna u lu file ze lu tokwa kamukana kuli lu pile bupilo bwa silumeli ka ku mu ziba, yena ya lu bizelize ka ba ni kabelo kwa kanya ni bunde bwa hae. 4 Ka mukwa wo, u lu file lisepiso ze tuna-tuna, za butokwa, kuli ha lu se lu ikabela z'a lu sepisize, mu kone ku picuka bumaswe bwa litakazo ze tezi lifasi kaufela, ni ku fumana za bumulimu. 5 Ka lona libaka le, mu like mo mu konela kaufela ku ekeza bunde bwa pilu kwa tumelo ya mina, mi kwa bunde bo bwa mina, mu ekeze zibo. 6 Kwa zibo ya mina mu ekeze buiswalo. Kwa buiswalo bwa mina mu ekeze ku itiisa. Kwa ku itiisa kwa mina mu ekeze bulapeli. 7 Kwa bulapeli bwa mina mu ekeze lilato la mutu ku wahabo. Mi kwa lilato leo la mina mu ekeze lilato ku mañi ni mañi. 8 Zeo ki zona ze tokwahala ku mina. Haiba mu na ni zona ka buñata, ha mu na ku ba buzwa kapa ku palelwa ku sebelisa zibo ye mu na ni yona ka Mulen'aluna Jesu Kreste. 9 Kono ya si na zona, ki ya bata ku shwa meeto ni ku swana ni sibofu. U libezi kuli libi za hae za kale li takuzwi.

10 Hakulicwalo banabahesu mu like, mo mu konela kaufela, ku bonisa kuli mu bizizwe ni ku ketiwa ki Mulimu. Ha mu ka eza cwalo, ha mu na ku wa ni kamuta. 11 Mane, mu ta lumelelwa ku kena mwa Mubuso o si na ku fela wa Mulena ni Mupulisi wa luna Jesu Kreste.

12 Ka lona libaka le, ni ka na ni mi hupulisanga kamita litaba ze, nihaike mu se mu li zibile kale, mi mu tiile hande mwa niti ye mu na ni yona. 13 Ni bona kuli kwa ni lukela ku mi hupulisanga litaba zeo ha ni sa pila. 14 Kakuli ni ziba kuli ni tuha ni siya mubili wo, o shwa, sina mw'a ni bulelezi Mulen'a luna Jesu Kreste. 15 Ni ta lika, ki hona, ku mi fumanela mukwa wa ku hupula kamita litaba ze, ha ni se ni shwile.

 

Lipaki ze boni kanya ya Kreste

16 Kaniti ha lu si ka latelela matangu a' ezizwe ka butali, ha lu mi taluseza ku taha ka maata kwa Mulen'a luna Jesu Kreste, batili. Lu iponezi butuna bwa hae ka meeto a luna! 17 Lu ne lu li teñi h'a fiwa likute ni kanya ki Mulimu Ndate, ni h'a utwa linzwi le li zwa mwa Kanya-tuna, li li: “Yo ki Mwan'a ka ya latiwa, ya ni tabisa!”

18 Luna kasibili lu utwile linzwi leo ha li zwa kwa lihalimu, ha ne lu inzi ni yena fa lilundu le li kenile.

19 Cwale, lu na ni sepo ye tiile luli mwa litaba ze bulezwi ki bapolofita. Mu ta be mu ezize hande ha ne mu ka isa pilu ku zona, kakuli li swana ni lampi ye benya mwa lififi, ku fitela ku patalala, mi liseli la Lilungwe li benya mwa lipilu za mina. 20 Pili ni bata kuli mu hupule se. Ha ku na mutu ya ka kona ku talusa ili yena ze polofitilwe mwa Mañolo. 21 Kakuli ze polfitilwe ha li si ka zwa ni kamuta mwa tato feela ya mutu, kono ki ka susuezo ya Moya o Kenile batu ha ba bulezi ka libizo la Mulimu.

2

 

Baluti ba buhata

1 Kale bapolofita ba buhata ne ba bonahalanga mwahal'a batu. Mi kamukwaoswana baluti ba buhata ba ta bonahala ni bona mwahal'a mina. Ba ka tisa ka butali lituto ze si na niti, ze sinya, mi ba ta latula Mulen'a mina. Ba ka tisa ka butali lituto ze si na niti, ze sinya, mi ba ta latula Mulen'a bona ya ba pilisize, ba itiseze ili bona ku sinyeha kapili. 2 Ba bañata ba ta ba latelela mwa mikwa ya bona ye maswe, mi kabakala likezo za bona, batu ba ka bulela ze maswe ka nzila ya niti. 3 Kabakala ku lata bufumu kwa bona, baluti bao ba buhata ba ta mi puma ka lipulelo za butali. Kono muatuli wa bona u ba atuzi kale, mi mushandauli wa bona wa tona!

4 Mulimu h'a si ka swalela mangeloi a n'a fosize, kono u a poselize mwa mukoti wa manyando, mw'a inzi a nz'a tamilwe ka mawenge mwa lififi, a litezi Lizazi la Katulo. 5 Mulimu h'a si ka babalela lifasi la kale kuli li si ke la tahelwa ki ziezi, kono a tisa muunda mwa lifasi leo la batu ba ba maswe. U pilisize Nuwe feela, ya n'a bulela za ku luka, hamohocwalo ni batu ba bañwi ba supile.

6 Mulimu u atuzi minzi ya Sodoma ni Gomora, mi u i sinyize ka mulilo, i li ku ezeza ba ba maswe mutala ka se si ka ba tahela.

7 A pilisa feela Lota ya n'a lukile, ya n'a katazwa ki mikwa ya buhule ya batu ba ba maswe.

8 Mutu yo ya lukile, ya n'a pila mwahal'a bona ka zazi ni zazi, n'a bona ni ku utwa ze ne ba eza, mi pilu ya hae, ye nde, ne i katazwa ki likezo za bona ze maswe. 9 Nihakulicwalo, Mulena u ziba ku pilisa ba ba mu lata kwa miliko ya bona, ni ku bulukela ba ba maswe mulatu ku fitela Lizazi la Katulo. 10 Ki taba ya niti luli ku ba ba latelela litakazo ze masila za mibili ya bona, mi ba nyaziseza maata a Mulimu.

Baluti ba mahata be ni mi bulelezi za bona, ba na ni pilu-tata. Hape ki baikuhumusi, mi ha ba bonisi likute ku ba ba kanya ba kwa lihalimu, mane ba ba nyefula. 11 Niihaili mangeloi a' fita baluti bao ba mahata kwa maata ni butuna, h'a be*** atuli ka matapa fapil'a Mulena. 12 Kono batu bao, ba eza ka maikuto a swana ni a lifolofolo ze pepezwi ku swasiwa ni ku bulaiwa. Ba nyefula lika ze ba sa utwisisi. Ba ta bulaiwa sina lifolofolo za mwa naheñi. 13 Ba nyandisize ba bañwi, cwale ba ta nyandiswa ni bona. Ba tabela ku eza sifi ni sifi musihali, se si ta feza takazo ya mibili ya bona. Ba swabisa ni ku tompolola ha ba t'o kopana ni mina fa lico, ba nze ba ikola ku mi puma! 14 Ha ba lati ku talima ku sili konji kwa basali ba mahule. Takazo ya bona ya ku eza sibi ha i feli. Ba isa batu ba ba si ka tiya mwa silaha. Lipilu za bona li itutile ku lakaza bufumu. Ba kutilwe ki Mulimu! 15 Ba keluhile mwa nzila ye lukile, mi cwale ba latehile. Ba ngile nzila ye n'e ngilwe ki Balami, mwan'a Beori, ya n'a lata mali a n'a fumana fa ku eza ze maswe.

16 Kono n'a kalimezwi ka lifoso za hae. Kaniti kambongolo, niha ka sa buleli, ka bulela ka linzwi la mutu, ku hanisa kezo ya butanya ya mupolofita yo.

17 Batu bao, ba swana ni liliba ze kalile. Ba swana ni malu a' hasanyiwa ki moya wa liñungwa. Mulimu u ba bulukezi sibaka mwa lififi le lituna. 18 Ba bulela ka buikuhumuso manzwi a bukuba ku zusa litakazo ze maswe za batu, kuli ba kone ku swasa ba ba sa z'o banduka mwahal'a batu ba ba pila maswe. 19 Ba sepisa batu tukuluho, kanti bona kasibili ki batanga ba mikwa ye ba isa kwa ku sinyeha. Mutu kaufela ki mutanga wa se si mu komile kamukana. 20 Haiba batu ba ba bandukile kwa bumaswe bwa lifasi, ka ku ziba Mulena ni Mupilisi wa luna Jesu Kreste, ba t'o swaliwa hape ni ku tulwa ki bumaswe bo, batu ba ba cwalo ba mwa kozi ye tuna kwa mafelelezo ku fita kwa makalelo. 21 I n'e ka ba hande ku bona kambe ne ba si ka ziba nzila ye lukile ku fita ku kala ku i ziba pili, mi kihona ba fulalela taelo ye kenile ye ne ba filwe! 22 Se si ezahezi ku bona si bonisa kuli nguli i nepile, ye li: “Nja i kutela mataza a yona”, ni ye li: “Kulube ye sa z'o tapiswa i kutela ku itomba mwa sileze.”  

3

 

Sepiso ya ku taha kwa Mulena

1 Balikani ba ka! Le, ki liñolo la bubeli le ni mi ñolela. Ku ona mañolo a mabeli ao, ni likile ku zusa mihupulo ye kenile mwa minahano ya mina ka litaba ze ni mi hupulisize. 2 Ni bata kuli mu hupule manzwi a n'a bulezwi ki bapolofita ba ba kenile, kale, ni taelo ye ne zwa ku Mulena ni Mupilis, ye ne mu filwe ki baapositola ba mina. 3 Pili, ni bata kuli mu utwisise kuli ka mazazi a mafelelezo ku ka taha batu ba ba zamaiswa ki litakazo za bona ze maswe.

4 Ba ta mi sheununa, mi ba ta li: “U sepisize ku taha, nji ha ku cwalo? U kai? Bashemi ba luna ba shwile kale, kono lika kaufela li sa inzi mo ne li inezi lifasi ha li eziwa!” 5 Batu ba, ba libala kabomu taba ye. Kale, Mulimu a bulela, mi lihalimu ni lifasi za bupiwa. Lifasi la zwiswa mwa mezi mi la bulukwa mwahal'a mezi.

6 Hape ki ka mezi, ili a muunda o mutuna, lifasi la kale ha ne li sinyehile.

7 Kono lihalimu ni lifasi ze li teñi ka nako ye li sa bulukilwe, ki lona linzwi la Mulimu, kuli li sinyiwe ki mulilo. Li bulukezwi lizazi leo ba ba maswe ha ba ta atulwa ni ku bulaiwa.

8 Kono, balikani ba ka, ku na ni taba ye ñwi ye mu swanezi ku hupula. Kikuli: ku Mulena, ha ku na fapahano mwahal'a lizazi li liliñwi ni lilimo ze sikiti. Ku yena, ze peli zeo za swana.

9 Mulena h'a ezi ka ku liyeha s'a sepisize, sina mo ba hupulela ba bañwi. Nihakulicwalo u mi eza ka pilu- telele, kakuli h'a lati kuli ku shwe nihaili a li muñwi feela. S'a bata kikuli kaufela ba tuhele libi za bona.

10 Lizazi la Mulena li ta taha sina lisholi. Lizazi leo, lihalimu li ta fela ka lilata le lituna sina la mushika o sabisa. Ze kwahalimu li ka ca mulilo, mi lifasi ni ze ku lona kamukana li ta sinyeha.

11 Cwale, lika ze ha li lukela ku sinyeha cwalo, mina mu utwisise hande mo mu swanezi ku pilela! Mu swanezi ku pila bupilo bo bu lukile, mu nze mu itingile ku Mulimu. 12 Ha mu sa litezi Lizazi la Mulimu, mu lika mo mu konela kaufela ku li akufisa. Lizazi leo, lihalimu ha li ka ca mulilo ni ku sinyiwa, mi ni ze kwahalimu li ta shengunukiswa ki mufutumala-tuna wa ona. 13 Kono Mulimu u sepisize lihalimu le linca ni lifasi le linca mo ku ta ezwa tato ya Mulimu, mi ki sona se lu litezi.

14 Mi cwale, balikani ba ka, sina ha mu sa litezi Lizazi leo, mu like ka maata ku ikenisa. Mu si ke mwa nyazahala fapil'a Mulimu, mi mu be mwa kozo ni yena. 15 Mu bone pilu-telele ya Mulen'a luna, mi mu i talime ili litohonolo la mina le mu kona ku piliswa ka lona. Mwanahaboluna ya lateha Paulusi h'a mi ñolezi, ili ka nganga y'a filwe ki Mulimu. 16 Ki sona s'a ñozi mwa mañolo kaufela mw'a bulela ka yona taba ye. Ku na ni litaba ze ñwi ze tata kwa ku li utwisisa mwa mañolo a hae, mi batu ba ba si na zibo, ni ba ba si ka tiya, ba li talusa ka mafosisa, sina mo ba ezeza ni ka litimana ze ñwi za Mañolo. Ka ku eza cwalo, ba ipizeza ku sinyeha.

17 Kono mina, balikani ba ka, mu lemusizwe cwale. Mu tokomele kuli mu si ke mwa yaululwa ki lifoso za batu ba ba maswe, mu ka suhana mwa wa mwa ku tiya kwa mina. 18 Kono mu zwelepili mu nze mu hulela mwa sishemo ni zibo ya Mulena ni Mupilisi wa luna Jesu Kreste. Ku yena ku iswe kanya, cwale ni kamita! Amen.