JUD LO66.SFM 30/10/2003 L. L. M. LOZI ST1 MONGU ZAMBIA

JUDA

LIÑOLO LA

JUDA

 

1

1 Ki na Juda, mutang'a Jesu Kreste, ni munyan'a Jakobo.

 Ni ñolela ba ba bizizwe ki Mulimu, ba ba pila mwa lilato la Mulimu Ndate ni mwa pabalelo ya Jesu Kreste.

2 Sishemo, kozo ni lilato li be za mina ka buñata.

 

Baluti ba buhata

3 Balikani ba ka, ne ni eza mo ne ni konela kaufela ku mi ñolela ka za ku piliswa ko lu kopanezi, ha ni se ni ikutwa kuli ni swanezi ku mi ñolela liñolo le, ku mi susueza kuli mu zwelepili ku lwanela tumelo y'a fanelezi Mulimu kwa batu ba hae. 4 Kakuli ku na ni batu ba ba si ka lumela, ba ba icocomelize mwahal'a luna, ba si ka lemuhiwa. Batu bao ba sinya tuto bakeñisa sishemo sa Mulimu wa luna, ku pata buhule bwa bona, mi ba hana Jesu Kreste, Mulena ni Muñ`a luna a nosi. I se li kale Mañolo a bulezi ka za katulo ye ba lukela.

5 Niha mu se mu zibile hande zeo kaufela, ni bata ku mi hupulisa ka mo Mulena a piliselize batu ba Isilaele ka ku ba zwisa mwa naha ya Egepita, kono mwanulahonyana a bulaya ba ba ne ba hana ku lumela kamukana.

6 Mu hupule mangeloi a n'a si ka ina mwa libaka za bunduna bwa ona, kono a n'a zwile mwa litulo za ona. Mulimu a' buluka mwa lififi la kwatasi, a tamilwe ka mawenge a sa pumehi ku fitela Lizazi le lituna la Katulo. 7 Mu hupule Sodoma ni Gomora ni minzi ye ne bapani ni yona. Batu ba mwateñi ne ba fulalezi Mulimu sina mangeloi ale, bona ba kena mwa buhule, ba keluha mwa niti. Ba fiwa mulatu wa mulilo o sa feli kuli i be temuso kwa batu kaufela.

8 Kamukwaoswana, batu ba, mwa ku lola kwa bona, ba na ni lipono ze ba kenya mwa sibi se si silafaza mibili ya bona. Ba nyaziseza maata a Mulimu, mi ba shwaula ba ba kenile ba kwa lihalimu. 9 Nihaili Mikaele, nduna ya mangeloi, n'a si ka eza taba ye cwalo. Mwa likañi za bona ni Satani, ha ba ne ba zekisana ka za situpu sa Mushe, Mikaele h'a si ka lika ku atula Satani ka manzwi a kashwau. A mu bulelela feela, a li: “Mulena a ku kalimele!”

10 Kono batu ba, ba shwaula lika ze ba sa utwisisi. Mi lika ze ba ziba ka sipepo feela sina lifolofolo, ki zona ze ba bulaya. 11 Bumai ki bwa bona! Ba latelezi nzila ye ne ngilwe ki Kaine. Ba ikenyize mwa lifoso kabakala mali, sina mw'a n'a ezelize Balaami. Ba felile ku shwa mwa lipetuhelo ze swana si na petuhelo ya Kora.

12 Bao ki matiba a masila mwa mikiti ya mina ya lico, mo ba nwa ba sina maswabi. Ba ipabalela ili bona feela. Ba swana ni malu a fefulwa ki moya, mi a' sa tisi pula. Ba swana ni likota ze sa beyi miselo nihaili litabula, likota ze kumelelezwi ni mibisi, ze shwelezi. 13 Ba swana ni mandinda a bifile a liwate, mi likezo za bona ze swabisa li bonahala sina lufulo. Ba swana ni linaleli ze nze li yambaela, mi Mulimu u ba bulukezi sibaka mwa lififi le linsu ko ba ta ina kamita.

14 Ki yena Enoke, ya n'a li wa bu supa ku zwa ku Adama, ya n'a polofitile kale ka batu bao, a li: “Mu bone! Mulena u tuha a taha ni likiti za mangeloi a hae a kenile.

15 U ka t`o tisa katulo kwa batu kaufela, ku t'o atula baezalibi ba ba sa lumeli kabakala likezo za bona ze maswe ze ba ezize kaufela mwa ku fetuhela Mulimu kwa bona ni ka manzwi a bona a maswe a ba bulezi bakeñisa Mulimu, bona baezalibi bao ba ba si na likute!” 16 Batu bao ba tongoka nako kaufela ni ku bilaela. Ba latelela litakazo za bona ze maswe. Ba ikuhumusa, mi ba lumba ba bañwi kuli ba fumane se siñwi ku bona.

 

Litemuso ni likelezo

17 Kono mina, balikani ba ka, mu hupule se ne mu bulelezwi pili ki baapositola ba Mulen'a luna Jesu Kreste. 18 Ba ne ba ize ku mina: “Mazazi a mafelelezo h'a ka taha, ku ka taha batu ba ba ka t'o mi sheununa, batu ba ba latelela litakazo za bona ze maswe.”

19 Bao, ki bona batu ba ba tisa likauhano. Ba zamaiswa ki litakazo za bona, isiñi Moya wa Mulimu. 20 Kono mina, balikani ba ka, mu zwelepili mwa tumelo ya mina ye kenile hahulu. Mu lapele ka maata a Moya o Kenile. 21 Mu ipeye mwa lilato la Mulimu, ha mu sa litezi Mulen'a luna Jesu Kreste ku t'o mi fa bupilo bo bu sa feli ka sishemo sa hae.

22 Mu utwele butuku ba ba sa bilaela mwa tumelo ya bona. 23 Mu ba pilise ka ku ba zwisa mwa mulilo. Mu bonise makeke ni ku ba bañwi cwalo, kono ili makeke a kopani ni sabo, mu nze mu toile mane ni likubo za bona ze na ni matiba a bumaswe bwa bona.

 

Litumbo za mafelelezo

24 Ku yena ya kona ku mi tiisa kuli mu si ke mwa wa, ni ku mi tisa ka tabo fapil'a kanya ya hae mu si na mulatu, 25 ku Mulimu a li muñwi, Mupilisi wa luna ka Mulen'a luna Jesu Kreste, ku iswe kanya, bulena, maata ni bubusi, ku zwa kwa linako za kale, ni cwale, ni kuya kuile! Amen.